Read wanga EZEKIELI 28 Bible Online

EZEKIELI 28 - wanga bible

EZEKIELI 28

¹OMWAMI Nyasaye yamboolela ari,

²“Mwana womundu, boolela omuruchi wa Tiro mbu, OMWAMI Nyasaye aboola mbu, iwe wichinjimisinjia, noboola mbu, oli omunyasaye, khandi mbu, wikhalanga khushifumbi shiabanyasaye, khandi wabotokhanwa neinyanza, nebutswa oli butswa omundu namundu, shioli omunyasaye tawe, kata niwikholanga mbu oli nobuchesi bweshinyasaye.

³Toto oli omuchesi okhushila Danieli, shibulaho eshiakhakhwibisila.

⁴Obuchesibwo nende obumanyilisibwo, bwakhunyoolela obuyinda, webunjelesilia mubiachibio itsahabu nende ifetsa.

⁵Khulwa obuchesibwo obunji mukobukhala wenjiyia obuyindabwo, mana mubuyindabwo niwichinjimisia.

⁶Khulweshio isie OMWAMI Nyasaye emboola mbu, khulwa okhuba wikholanga okhuba omuchesi shinga omunyasaye,

⁷ndalakhureerera abarende, abandu abamahanga amahalaba okhushila akandi koosi, nabo balakhuseera netsinganga tsiabwe, nibasasia emianduchio chiolukoosi echia wenyoolela mubuchesibwo, niboonoonia oluyalilwo.

⁸Balakhufuuba mubuko, nawe olafwila mulusuba hakari weinyanza, shinga omundu owirirwe.

⁹Kho olatsiililila okhwichinjimisia noboola mbu oli omunyasaye imbeli wabeeribo noho? Kata kario oli omundu namundu butswa, imbeli wabeeribo shioli omunyasaye tawe.

¹⁰Shiolafwa lifwa liomundu oulamumanyile Nyasaye ta, olafwila mubunyali bwabandu abarende. Nolwa isie OMWAMI Nyasaye emboola.”

¹¹OMWAMI Nyasaye yamboolela khandi ari,

¹²“Mwana womundu, yimba niwikhuula omuruchi wa Tiro noboola mbu, OMWAMI Nyasaye aboola khwiwe ari, ‘Iwe wali eshilolelo shiobulamba, niwetsulamwo obuchesi, khandi owelikondo lilayi po.

¹³Iwe wamenya mu Edeni, omukunda kwa Nyasaye. Wesiaha namachina kobukusi, aka ilulu, aka alumasi, aka topazi, aka zaramadi, aka shoshamu, aka yashepi, aka isapiri, aka nopeki nende aka baraketsi. Ebiokhwisiahakhwo biali nibiakasibwa okhurula khutsahabu. Khunyanga yawalonjelwakhwo, niyo eyabiarechekhwa.

¹⁴Ndakhwahulila omumalaika wokhukhulinda, wali khushikulu eshitakatifu shia Nyasaye; wachenda hakari wamachina komulilo.

¹⁵Okhurula khunyanga yawebulilwakhwo, shiwalikhwo neshiisichirasio shiosi shiosi ta, okhuula olwa wachaaka okhukhola obwonooni.

¹⁶Olwa inganga yobukhalabwo yameetekha wetsulamwo oburaasi, mana niwonoona. Kho ndakhuloonda nekhufuuba okhurula khushikulu shia Nyasaye, naye omumalaika wokhukhulinda oyo yakhulonda okhurula hakari wamachina komulilo.

¹⁷Wechinjimisia khulwa likondolio lilayi, niwonoonia obuchesibwo mbu kho winyoolele oluyali. Kho ndakhufuuba hasi mumaloba, nekhubakala habulafu imbeli wabaruchi, mbu bakhurangaale.

¹⁸Khulwa obunji bwobwonoonibwo, mubumayanu bwobukhalabwo wafwabia habunduwo hokhwinamila Nyasaye. Khulweshio ndakhurubulakhwo omulilo, nikukhumulula pe, nekhukwisia likoshe khushialo, imbeli wabandu bakhurangaala boosi.

¹⁹Abandu boosi abali nibakhumanya, bahuchisibwa namakhuwa akakhukwiila, wulile khushihesishio shiokhuriisia, ne shiwakhabekhwoho khandi tawe ebisoni nebisoni.’ ”

²⁰Mana OMWAMI Nyasaye niyamboolela ari,

²¹“Mwana womundu, shiukhana ohenje litookho lia Sidoni, mana olakule nolifukula,

²²olirumbulile obulakusi noboola khulio mbu, isie OMWAMI Nyasaye emboola mbu, ekhufukula iwe Sidoni, ndalalolesia obutakatifu bwanje hakariwo. Olwa ekhuhelesia eshinyasio, nende okhulolesia oluyali lwanje, nolwa abamenya mwiwe balamanya mbu, isie nisie OMWAMI Nyasaye.

²³Okhuba ndalakhurumila olumbe olubi, nende okhuraatsia eshitsayi khumihandachio. Olaseerwa nolukanga olumemu okhurula tsimbeka tsiosi, abandu abanji balalakakha hasi nibafwile. Nolwa balamanya mbu, isie nisie OMWAMI Nyasaye.”

²⁴OMWAMI Nyasaye aboola ari, “Amahanga akabotokhana Isiraeli shikalabakhwo amahwa noho ebisisia biokhusalisia nende okhusandia Abaisiraeli khandi tawe. Nolwa balamanya mbu, isie nisie OMWAMI Nyasaye.

²⁵“Isie OMWAMI Nyasaye emboola mbu, ndakhabunjelesie aboluyia lwa Isiraeli okhurula mumahanga akabasalasibwamwo. Ndakhakhole abamahanga abo okhulola obutakatifu bwanje mubo. Mana abandu ba Isiraeli bakhamenye mushialo shiabwe abeene, eshia ndahelesia omukhalabani wanje Yakobo.

²⁶Nabo bakhamenyemwo mumulembe, khandi bakhombashemwo tsinzu nibaraakamwo emitsabibu. Bakhamenye mumulembe, olwa ndakhahelesie abamenyani babwe ababasandia eshinyasio. Nolwa bakhamanye mbu, isie nisie OMWAMI Nyasaye wabwe.”