Read wanga EZEKIELI 29 Bible Online

EZEKIELI 29 - wanga bible

EZEKIELI 29

¹Khunyanga yekhumi nakhabili yomwesi kwekhumi, mumuyika kwekhumi kwomubuhambe bwefwe, OMWAMI Nyasaye yamboolela ari,

²“Mwana womundu, shiukhana ohenje omuruchi wa Misiri, orumbule obulakusi khuye nende khubandu ba Misiri boosi noboola mbu,

³isie OMWAMI Nyasaye emboola mbu, ekhufukula iwe omuruchi wa Misiri, iwe okukwena okukhongo okukonanga hakari wemialo, nikuboola kuri, ‘Omwalo kwa Naili nokwanje, nisie omwene owakulonga.’

⁴Ndalara olulobo mumunwakwo, mana ekhole tsinyeni tsiomumialochio tsihande khumakhambayako[3], mana ndalakhuyinia nikhura khulukuku lwemialochio, halala nende tsinyeni tsiemialochio etsilahanda khumakambako ako.

⁵Mana ndalakhusukuna mushitsiimi, iwe nende tsinyeni tsiosi tsiemumialochio; olakwa mubulimo, ne shiolatoolwa noyabilwa tawe. Ndalakhuhaana khutsisolo nende khumanyonyi obe eshiokhulia shiabio.”

⁶Nolwa abamenya mushialo shia Misiri balamanya mbu, isie nisie OMWAMI Nyasaye. Okhuba niwe owa abandu boluyia lwa Isiraeli bali nibesika, nebutswa wali butswa shielikata lifunakwe.

⁷Olwa bakhutiila nomukhono, wafunikhamwo ebitonye, ne norandula amabeka kabwe. Ne olwa bakhuyeekhakhwo, wafunikhamwo, nochila emikongo chiabwe nichitechela.

⁸Khulweshio isie OMWAMI Nyasaye emboola mbu, ndalareera olukanga khwiwe, nende okhwira abandubo nende tsisolotsio.

⁹Eshialo shia Misiri shilatong'a likunda likhaya. Nolwa balamanya mbu, isie nisie OMWAMI Nyasaye. Khulwa okhuba iwe waboola mbu, omwalo kwa Naili nokukwo, khandi niwe owakulonga,

¹⁰kho lola, ndalakhufukula iwe nende emialochio, ndalakhola eshialo shia Misiri okhutong'a likunda, okhurula khwitookho lia Migidoli emasaba okhuula khwitookho lia Aswani emulambo, okhutsia okhuula khutsinzakho tsia Etsiopia.

¹¹Abulaho omundu yesi kata isolo oulabiramwo. Khulwa emiyika amakhumi kane eshindu shiosi shiosi shishilamenyakhwomwo tawe.

¹²Khandi ndalakhola eshialo shia Misiri okhukwa likunda hakari webialo bindi ebiakwisibwa likunda; nako amatookho kashio kalatong'a amakunda khulwemiyika amakhumi kane hakari wamatookho akamala khale okhusasibwa. Ndalasalaasia abandu ba Misiri mumahanga kandi nende mubialo biosi.

¹³“Okhuba isie OMWAMI Nyasaye emboola mbu, olunyuma lwemiyika amakhumi kane, ndakhabunjelesia abandu ba Misiri, okhurula mubialo biabasalaasibwamwo;

¹⁴mana ndakhabakalusilie tsikhabi tsiabwe, nimbakalusia mushialo shiabwe, eshialo shiabebulilwamwo, ne ebweneyo bakhabe lihanga liteshele.

¹⁵Bakhabe lihanga liteshele mumahanga kandi koosi, ne ndakhabakhole okhuba batuutu muno abalanyala okhurukakhwo amahanga kandi khandi ta.

¹⁶Aboluyia lwa Isiraeli shibakheleetekhwo khubo khandi ta, bakhetsulile obumayanu bwabwe olwa batsia khubamisiri okhukhaaba obukhoonyi. Nolwa abandu ba Isiraeli bakhamanye mbu, isie nisie OMWAMI Nyasaye.”

¹⁷Khunyanga yambeli yomumwesi kwambeli, mumuyika kwamakhumi kabili namusafu, OMWAMI Nyasaye yamboolela ari,

¹⁸“Mwana womundu, Nebukadineza omuruchi wa Babuloni yakhosia abelihelie emilimo emitinyu chiokhuseera lihanga lia Tiro. Emirwe chiabelihebe chiakhweyukha nichikwa ebiole, nako amabeka kabwe nikafubukha. Nebutswa ye omwene kata abelihelie abo, shibanyoolakhwo inganga yosi yosi okhurula Tiro, khulwa emilimo chia bali nibakholile chiokhuseera lihanga elo tawe.

¹⁹Khulweshio kano niko aka isie OMWAMI Nyasaye emboola mbu, ndalahana eshialo shia Misiri mumakhono ka Nebukadineza omuruchi wa Babuloni. Alayaaya emiandu chiashio chiosi nachibukula okhuba omurungo kwabelihebe.

²⁰Emalile okhuhelesia omuruchi Nebukadineza eshialo shia Misiri okhuba omurungokwe khulwa emilimo chia yakhola, okhuba abelihebe baakholela isie emilimo. Nolwa isie OMWAMI Nyasaye emboola.

²¹“Khunyanga eyo, ndakhakhole abandu ba Isiraeli okhuba namaani amanji, ne ndakhakhukhole iwe Ezekieli okhurumbula nomwoyo omukhongo kho mbu, buli mundu ahulile. Mana bakhamanye mbu isie nisie OMWAMI Nyasaye.”