Read wanga EZEKIELI 3 Bible Online

EZEKIELI 3 - wanga bible

EZEKIELI 3

¹Mana OMWAMI Nyasaye niyamboolela ari, “Mwana womundu, olie shioheebwa. Olie eshitabu eshikanye shino mana otsie oboolele abandu boluyia lwa Isiraeli.”

²Kho nindaasama omunwa kwanje, naye niyambelesia eshitabu eshikanye eshio nendia.

³Niyamboolela ari, “Mwana womundu, lia eshitabu eshikanye shino wikure.” Kho neshilia, nashio nishiba eshimilamilu mumunwa kwanje shinga obuushi.

⁴Naye niyamboolela ari, “Mwana womundu, tsia khubandu ba Isiraeli, obaboolele amakhuwa kekhubooleele.

⁵Okhuba shiekhurumanga khubandu bolulimi olucheni noho lwolanyala okhuhulila ta, nebutswa ekhurumanga khuboluyia lwa Isiraeli.

⁶Shiekhurumanga khumahanga amanji akolulimi olucheni, noho lwolanyala okhuhulila noho okhumanyilisia eshisina shiamakhuwa kabwe tawe. Nindakhakhurumile khumahanga shinga ako, toto mwene bakhakhuhuliile.

⁷Nebutswa abandu ba Isiraeli abo shibalakhuhulila ta shichila shibenyanga okhumbulila isie ta. Okhuba abandu ba Isiraeli boosi nabamakosi amoomu khandi nabemioyo emitinyu.

⁸Ekhukholile okhuba omukhandalanu okhubayinga obukhandalanu bwabwe, khandi okhuba womurwe omuumu okhuyinga obuumu bwemirwe chiabwe.

⁹Ekholile omurwekwo okhuumilana okhushila lichina lieimbaale. Shiolabariakhwo noho okhutechesibwa nokhufwana khwabwe ta, okhuba nabandu abakhayi.”

¹⁰Khandi nameeta okhumboolela ari, “Mwana womundu, rechelesia ohulile namarwiko, amakhuwa koosi kekhuboolela, okabiishe mumwoyokwo.

¹¹Mana otsie oboolele abandu benywe abali mubuhambe ori, ‘Kano niko aka OMWAMI Nyasaye aboola,’ kata nibaba nibahulila, noho nibakhaya okhuhulila.”

¹²Mana Roho wa Nyasaye niyanjiinguula hekulu, ne lwoluyali olwa OMWAMI Nyasaye lwachinguukha hekulu, ndahulila munyuma wanje omwoyo nikukukuma obutinyu nikuboola kuri, “OMWAMI Nyasaye ouli hekulu mwikulu ahebwe oluyali.”

¹³Khandi ndahulila obuyoka bwetsimbaha tsiebilonje bili mwoyo ebio nitsitiilanangakhwo buli lulala khulundi, khandi nende obuyoka bwemikurutumu chiali nichili mumbafu wabio, echiakholanga obuyoka shinga bwokhukukuma okhukhongo khweshialo.

¹⁴Mana Roho owa OMWAMI Nyasaye niyanjinguula niyarusiaho niyambila ehale. Ndatsia nesinyiishe mumwoyo khandi nendi noburuma obunji, nabwo obunyali obwa OMWAMI Nyasaye bwali obunji mwisie.

¹⁵Kho ninduula Telabibu khumwalo kwa Kebari, ewa abahambe bali nibamenya. Mana nemenya ninabo khulwa tsinyanga musafu neng'ang'alile.

¹⁶Olunyuma lwetsinyanga musafu, OMWAMI Nyasaye yamulanga omulakusi Ezekieli namuboolela ari,

¹⁷“Mwana womundu, ekhwemekhanga okhuba omulindi khuboluyia lwa Isiraeli. Olabachetsiyinjia nende amakhuwa akarula mumunwa kwanje.

¹⁸Nemba nemboolela abamayanu endi, ‘okhuula mulafwa,’ nawe nolabachetsiyia noho okhubakaya mbu baleshe obwonooni bwabwe, kho mbu bahonokosie obulamu bwabwe ta, abandu abamayanu abo balafwa khulwa obwonooni bwabwe. Nebutswa ndalakhubaanza eshitsayi shiabwe.

¹⁹Nebutswa noba nochetsiyia omundu naye nalehanya okhurula khubumayanubwe, noho okhurula khutsinjilatsie tsiobumayanu ta, alafwa khulwa obumayanubwe, nawe olaba nohonokosiye obulamubwo.

²⁰Khandi omundu omulunjishi naba nashiama narula khubulunjishibwe, nakhola akobumayanu, nasi nera eshisichirasio imbeliwe, alafwa okhuba shiolaba nomuchetsiyiye tawe. Alafwa khulwa obwonoonibwe, ne akobulunjishibwe akayali niyakhola kalebililwa koosi. Nebutswa ndalakhubaanza iwe okhufwakhwe.

²¹Nawe noba nochetsiyia omundu omulunjishi okhulekha obwonooni, mana aleshe okhwonoona, alaba mwoyo okhuba ahuliile obuchetsiyibwo, nawe olaba nohokosiyie obulamubwo.”

²²Mana obunyali obwa OMWAMI Nyasaye nibunzitsamwo, naye niyamboolela ari, “Sinjila orule otsie mwibanda, nasi ndalaboola ninawe ebweneyo.”

²³Kho nesinjila nerula nenzia mwibanda, nendola oluyali olwa OMWAMI Nyasaye nilusinjiileyo shinga olwa ndali nendutsi butswa khumwalo kwa Kebari. Mana nifuumamia obweni bwanje hasi nindinamila OMWAMI Nyasaye.

²⁴Nebutswa Roho owa OMWAMI Nyasaye yanzinjilamwo niyasinjisia shilunji, niyamboolela ari, “Tsia wiyikalile munzumwo.

²⁵Mwana womundu, iwe olabohwa khumukoye mbu kho okhaywe okhurula nobatsiila abandu.

²⁶Ndalahandia olulimilwo mushinakhuna mbu kho okhaywe okhuhalabila abandu abo. Okhuba naboluyia lwobukhayi.

²⁷Nebutswa buli olwa ndalaboolanga ninawe, ndalaasaminjia omunwakwo, nawe olababoolelanga ori, ‘Kano niko aka OMWAMI Nyasaye aboola.’ Abeenya okhuhulila bahulile, nabo abakhaya okhuhulila lekha bakhaye, okhuba noluyia lwobukhayi.”