Read wanga EZEKIELI 30 Bible Online

EZEKIELI 30 - wanga bible

EZEKIELI 30

¹OMWAMI Nyasaye yamboolela ari,

²“Mwana womundu, rumbula akobulakusi noboola mbu, isie OMWAMI Nyasaye emboola endi, Mwikhuule nimuboola muri, ‘Inyanga yamasila yitsanga!’

³Okhuba inyanga eyo yili ahambi okhuula, inyanga eya OMWAMI Nyasaye yili ahambi okhuula. Yakhabe inyanga yelifuumbi, inyanga yamanyakhano khumahanga.

⁴Lihe liakhabe Misiri, nabo abeshialo shia Etsiopia, bakhahende omwoyo, olwa abandu abanji bakherwe mushialo shia Misiri. Khandi olwa emiandu chiabwe chiyaaywa, nachio emise chielihanga elo nichilikululwa.

⁵Abandu ba Etsiopia, Lidia, Ludi, Arabia nende Libia, nende boosi abaliimaana ninabo bakheerwe nolukanga.

⁶“Isie OMWAMI Nyasaye emboola mbu, Abo abaterera Misiri baleerwa, nabo abelihelie bamaani bakhamululwe, okhurula khwitookho lia Migidoli emasaba okhuula khwitookho lia Aswani emulambo, boosi bakherwe nolukanga. Nolwa isie OMWAMI Nyasaye emboola.

⁷Lihanga lia Misiri elo liakhakwe likunda hakari wamahanga kandi akakwisibwa amakunda. Nako amatookho kalio koosi kakhasasibwe.

⁸Olwa ndakhamulule eshialo shia Misiri nomulilo, nolwa bakhamanye mbu isie nisie OMWAMI Nyasaye, nabo abakhoonyi babwe boosi bakheerwe.

⁹“Khunyanga eyo, ndakharume abarume okhutsia okhuriisia abelihanga lia Etsiopia abapaaranga mbu bali nomulembe. Bakhatiilwe neindenga khunyanga yamanyakhano ka Misiri, okhuba inyanga eyo yiitsanga.

¹⁰“Isie OMWAMI Nyasaye emboola mbu, ndakhekhonyele Nebukadineza omuruchi wa Babuloni, okhusasia obuyinda bwa Misiri,

¹¹Omuruchi Nebukadineza nende abelihelie bamaani, bakhasasie lihanga lia Misiri. Bakhaseere eshialo shia Misiri netsinganga tsiabwe, nibeera abandu abanji.

¹²Ndakhakhamie omwalo kwa Naili, nende okhukusia lihanga elo khubandu abamayanu. Ndakhekhonyele abarende okhukwisia eshialo shia Misiri likunda. Isie OMWAMI Nyasaye nisie ouboolile.

¹³Isie OMWAMI Nyasaye emboola mbu, ndakhasasie abanyasaye babwe nende okhwakamia ebifwanani biabwe ebili mwitookho lia Memufisi. Omuruchi shiyakhabekhwo mushialo shia Misiri tawe. Nolwa ndakharere indenga mushialo shia Misiri.

¹⁴Ndakhakwisie litookho lia Patsirosi likunda, nihafia litookho lia Zoani omulilo. Ndakhahelesie litookho lia Tsebezi eshinyasio.

¹⁵Ndakhamalile liruma lianje khwitookho lia Pelusiumu, elili olukoba lwa Misiri, nende okhumulula abandu ba Tsebezi.

¹⁶Ndakhasambe eshialo shia Misiri. Litookho lia Pelesiumu lilaba mumanyakhano Amasisi ka Tsebezi kakhakwisibwe hasi. Memufisi nalio liakhaseerwe mushiteere hakari.

¹⁷Abaraaka belitookho lia Oni nende elia Pibesetsi balamululwa nolukanga, nabo abandu bandi balayilwa mubuhambe.

¹⁸Litookho lia Tapanihesi liakhafuunikhwe neshiilima, olwa ndakhafunache oburuchi bwa Misiri, nende okhwakamia obwichinjimisi bwalio. Lileesi liakhafuunishe eshialo shia Misiri, nabo abandu bamatookho kashio boosi bakhayilwe mubuhambe.

¹⁹Olwa ndakhehelesie lihanga lia Misiri eshinyasio, nolwa bakhamanye mbu, isie nisie OMWAMI Nyasaye.”

²⁰Khunyanga yomusafu, yomwesi kwambeli, mumuyika kwekhumi namulala nikhuli mubuhambe, OMWAMI Nyasaye yamboolela ari,

²¹“Mwana womundu, isie esasiye obunyali bwomuruchi wa Misiri. Ne lola, kata shinabekhwo nende oumukhoonya kho mbu enyalilwe okhutiila olukanga khandi tawe.

²²Khulweshio isie OMWAMI Nyasaye emboola mbu, ndalalwana omuruchi wa Misiri, ne ndalafunaka emikhonochie chiosi chibili, kata okulimwo amaani nende okwali nikwafunikha. Ne nditsa okhukwisia hasi olukanga okhurula mumukhonokwe.

²³Ndalasalaasia abandu ba Misiri mumahanga nende mubialo biosi.

²⁴Ndalahelesia omuruchi wa Babulonia obunyali, nende okhumuhelesia olukanga lwanje. Nebutswa ndalayiengula emikhono chia omuruchi wa Misiri, naye alabinda imbeli womuruchi wa Babuloni shinga omundu ousaalisiibwe obutinyu.

²⁵Ndalahelesia omuruchi wa Babuloni amaani. Nebutswa ndalayiengula emikhono chia omuruchi wa Misiri. Mana abandu boosi balamanya mbu isie nisie OMWAMI Nyasaye. Olwa ehana olukanga lwanje mumukhono kwomuruchi wa Babuloni, alalunyiila naseera eshialo shia Misiri.

²⁶Ndalasalaasia abandu ba Misiri mumahanga nende mubialo biosi. Nolwa balamanya mbu isie nisie OMWAMI Nyasaye.”