Read wanga EZEKIELI 31 Bible Online

EZEKIELI 31 - wanga bible

EZEKIELI 31

¹Khunyanga yambeli yomwesi kwakhataru, mumuyika kwekhumi namulala kwomubuhambe bwefwe, OMWAMI Nyasaye yamboolela ari,

²“Mwana womundu, boolela omuruchi wa Misiri nende abandube boosi mbu, Oli wamaani muno! Ndakhakhuchelaasia khulishi?

³Lola, ofwana shinga omusiita okuli Lebanoni, okuli namasaka amatendemu khandi akakholanga eshiinikha shinga eshiomutsuru, khandi nomurambi muno, obutenje bwakwo buula mumaleesi.

⁴Amaatsi amanji kachila kwakhula nikutendeema, tsisiba tsiamatsi tsiakukhusia nikuba omurambi, nikukhola emialo chiakwo okhukholomokha, nichibotokhana mushisina shiakwo, emikhula chiachio nichisalaana mumisaala chindi chiosi chiomumutsuru.

⁵Khulweshio kwakhula nikurambiha okhushila emisaala chindi chiomumutsuru chiosi, amasaka kakwo katsiililila okhuraabaala nikaba amarambi muno, okhurulana namaatsi amanji akali mumisi chiakwo.

⁶Amanyonyi koosi komwikulu, kombakha ebitsu biako mumasaka kakwo. Tsisolo nabulimo tsiebulanila mushiinikha shiakwo, khandi amahanga koosi amakhongo kahuluusilanga mushiinikha shiakwo.

⁷Kwali kwobukoondo obulayi muno mubukhongo bwakwo, nende muburambi bwamasaka kakwo; okhuba emisi chiakwo chianyeleela nichiyinikha mumaatsi amanji.

⁸Mumisaala chiemisiita chiomumukunda kwa Nyasaye, shikwaliho okwakhachelaasibwa ninakwo ta, kata emitaarakwe shichiahelaana namasaka kakwo ta. Emisaala chiemiaramoni shichiali eshindu, nochelaasia namasaka kakwo tawe. Shikwaliho omusaala kwosi kwosi mumukunda kwa Nyasaye okwobukondo obulayi shinga kwo ta.

⁹Ndakukhola okhuba kwobukondo obulayi, khulwobunji bwamasaka kakwo. Khandi emisaala chindi chiosi chia Edeni, omukunda kwa Nyasaye, chiatiilwa neimbalikha khulwa obulayi bwako.

¹⁰“Khulweshio isie OMWAMI Nyasaye emboola mbu, okhuba kwarambiha muno mana obutenje bwakwo nibuula mumaleesi, ne nikuba neinjinia khulwa oburambi bwakwo,

¹¹ndakhakuhaane mumakhono kelihanga elala khumahanga kamaani. Toto mwene lilakukholela akakhoyeele obumayanu bwakwo. Isie emalile okhukwibala nokhukubufuuba.

¹²Abandu bamariisia muno okhurula mumahanga kandi bakhakureme nibakukwisia nende okhukulekha. Amasaka kakwo koosi kakhakwe khubikulu nende mumabanda, khandi amasaafu kakwo kakhabungulushe mumiombe chiosi chiamaatsi khushialo. Nabo abandu bokhushialo boosi bakharule mushiinikha shiakwo nibakwibala.

¹³Amanyonyi koosi kokhwikulu kakhetse nikakuyeelakhwo, natsio tsisolo nabulimo tsiakhasenachile amasaka kakwo.

¹⁴Ako koosi kakwikholeeshekhwo kho mbu omusaala kwosi kwosi okwaraakwa khumwalo kuleshe okhuba omuraambi okhushila echindi chiosi, khandi mbu obutenje bwako buleshe okhuula mumaleesi tawe. Khandi mbu, omusaala kundi kwosi kwosi okukhusibwa khulwa amaatsi amanji kuleshe okhurambiya kurio, okhuba eshihesi shia buli shindu nokhufwa. Biakhafwe nibiyabilwa halala nende abandu abafwa nibatsia emakombe.

¹⁵Khulweshio isie OMWAMI Nyasaye emboola mbu, khunyanga yomusaala kwomusiita okwo kwakhole emakombe, ndakhakufuunishe neshiilima shinga eshilolelo shiokhwikhuula, khandi ndakhekalile emialo chiakwo nindakamia amaatsi kakwo mbu kaleshe okhukholomokha. Ndakhafuunishe ebikulu bia Lebanoni neshibeela khulwakwo, khandi emisaala chiosi chiomumutsuru chiakhaniale khulwakwo.

¹⁶Ndakhakhole amahanga okhutechela khulwokhukwa khwakwo, olwa ndakhakufuube emakombe nikuyabilwa halala nende abatsiayo. Nachio emisaala chiosi echia Edeni, emilobole khandi emilayi chia Lebanoni, chiosi echiali nichiasamilwa amaatsi, echiekha emakombe, chiakhasangaalile okhukwa khwakwo.

¹⁷Khandi chiosi halala ninakwo chiakhamululwe nichiyabilwa emakombe mubandu bafwila mwihe, abamenyanga mushiinikha shiakwo hakari wamahanga.

¹⁸Kubulaho omusaala kwosi kwosi okwafwanana ninakwo muluyali nende mubukhongo, mumisaala chiosi chiomumukunda kwa Edeni tawe. Shiolafwa noyabilwa halala nende abandu abalamumanyile Nyasaye ta, abafwila mwihe. Iwe omuruchi wa Misiri nende abandubo mwakhabe murio. Nolwa isie OMWAMI Nyasaye emboola.”