Read wanga EZEKIELI 32 Bible Online

EZEKIELI 32 - wanga bible

EZEKIELI 32

¹Khunyanga yambeli yomwesi kwekhumi nakhabili, mumuyika kwekhumi nakhabili, OMWAMI Nyasaye yamboolela ari,

²“Mwana womundu, wikhuule khulwa omuruchi wa Misiri, noboola mbu, wilolanga mbu oli italanyi mumahanga kandi, nebutswa oli butswa shinga ikwena mumaatsi komunyanza. Weelemanga mumialochio, notuubuula amaatsi nebilenjebio.

³Isie OMWAMI Nyasaye emboola mbu, ndalakhureka nolukhanda lwanje, nabo abandu balakhutiila nibakhuyila khulukuku.

⁴Ndalakhufuuba khushialo eshihangalafu, nekhubakala habulafu, khandi ndalakhola amanyonyi akapulukhanga koosi okhukhuyeelakhwo, natsio tsisolo nabulimo tsiosi tsilakhulia.

⁵Ndalasalaasia inyama yomubilikwo khubikulu, nende okhuyitsusia mumabanda.

⁶Ndalayeembia amatsayiko khushibala okhuula khubikulu, nachio emialo chiletsulamwo amatsayiko.

⁷Olwa ekhumulula pe, ndalafuunikha likulu, nindiilimia tsing'ining'ini tsialio. Ndalafuunikha eliuba nelileesi, nakwo omwesi shikulaakha tawe.

⁸Ndalasimia ebiashilo biomwikulu biosi, khandi ndalelimia eshialo shienywe. Nolwa isie OMWAMI Nyasaye emboola.

⁹Ndalabeelesia emioyo chiabandu abanji, olwa ekhuyila mumbohe mumahanga kandi, mubialo biolamanyile tawe.

¹⁰Ndalakhola abandu abanji okhuhuchisibwa ninawe. Olwa enzomola olukanga lwanje, abaruchi balatechela khulwa oburi. Buli mundu alahendela obulamubwe, khunyanga yokhumululwakhwo.

¹¹Okhuba isie OMWAMI Nyasaye emboola mbu, olukanga lwomuruchi wa Babuloni lulakhuseera.

¹²Ndalamulula abandubo abanji khulwa tsinganga tsiabandu bamaani, abali bamariisia okhushila boosi mumahanga koosi pe. Balaakamia obwichinjimisi bweshialo shia Misiri, khandi abandu bashio abanji balamululwa.

¹³Ndalamulula emirukochio chiosi hamialo eminji chiamaatsi, ne omundu yesi yesi shialatuubuulakhwo amaatsi kachio khandi ta, noho tsindekeyi tsiemiruko okhuseenachilamwo khandi tawe.

¹⁴Mana ndalakhola amaatsi kemialo chiabwe kabe ameeleleshe, natsio tsisebele tsikholomosie amaatsi shinga amafura, nolwa isie OMWAMI Nyasaye emboola.

¹⁵Olwa ndakhakwisie eshialo shia Misiri likunda khandi olwa emiandu chiabwe chiosi chiakhabukulwe, nabo abandu bamenyangamwo nibamululwa boosi, nolwa bakhamanye mbu, isie nisie OMWAMI Nyasaye.

¹⁶Luno nolwimbo lwa bakhembe nibekhuula. Abakhasi bamahanga kandi bakhembe nibakalushila. Bakhekhuule khulwa lihanga lia Misiri nende khulwa abandu balio boosi, nolwa isie OMWAMI Nyasaye emboola.”

¹⁷Khunyanga yekhumi nakharano yomwesi kwambeli mumuyika kwekhumi nakhabili, OMWAMI Nyasaye yamboolela ari,

¹⁸“Mwana womundu, wikhuule khulwa abandu ba Misiri boosi. Obayile emakombe, mushialo shiabafu, halala nende amahanga kandi kamaani, batsie ebweneyo halala nabafu.”

¹⁹Bareebe mbu, “Muli abalayi okhushila wina? Mutsie mube emakombe halala nende abalamumanyile OMWAMI Nyasaye ta.”

²⁰Abandu ba Misiri balamululwa halala nende abafwila mwihe. Bakhamululilwe halala nende abandu bandi abanji.

²¹Abemilisi babwe bamaani halala nende abakhonyi babwe bakhaboolenje nibali emakombe tsana eyo bari, “Abandu ba Misiri beeshile emakombe mubafu, ne baliyo halala nende abandu abalamumanyile Nyasaye ta, abafwila mwihe.”

²²“Abandu ba Asiria baliyo, babotokhaanwe nebilindwa biabelihe babwe boosi abafwila mwihe.

²³Ebilindwa biabwe bili hasi bwene wemakombe. Abelihe babwe bamululilwa mwihe boosi pe, ne ebilindwa biabelihe tsana bibabotokhaane. Khale, olwa bali nibashili mwoyo, bariisinjia abandu mushialo shia abali mwoyo.

²⁴Abandu ba Elamu bosi baliyo, babotokhaanwe nabelihe babwe abafwila mwihe. Abo boosi abalamumanyile Nyasaye ta, beekha emakombe mushialo shiabafu. Olwa bali nibashili mwoyo, bali nibeetsusia amariisia kabwe mushialo shiabali mwoyo. Nebutswa bulaano, bafwimbwa omurwe halala nende abeekha emakombe mubafu.

²⁵Baalisiibwe halala nende abelihe babwe, abafwila mwihe. Babotokhaanwe nebilindwa biabelihe babwe boosi abafwila mwihe nende boosi abalamumanyile Nyasaye tawe. Olwa bali nibashili mwoyo, bali nibeetsusia amariisia mushialo shiabali mwoyo. Ne bulaano bali ebweneyo, bafwimbiibwe omurwe halala nende balia abafwila mwihe.

²⁶Abandu ba Mesheki nende ba Tabali bosi baliyo, babotokhaanwe nebilindwa biabelihe babwe. Abandu abo boosi, abalamumanya Nyasaye ta bafwila mwihe, abandu abali nibeetsusia amariisia mushialo shiabali mwoyo, olwa abali nibashili mwoyo.

²⁷Ne, abo abalamumanyile Nyasaye ta, shibayabilwakhwo noluyali shinga abemilisi babwe bakhale bamaani, abayabilwa nibeekha emakombe mubafu nibali nebimanulwa biabwe, nibayichiikhwe tsinganga tsiabwe namurwe nende ebikhumba biabwe nibireerwe khumibili chiabwe ta. Abemilisi bamaani abo olwa bali nibashili mwoyo, bali nibeetsusia amariisia kabwe mushialo shiabali mwoyo.

²⁸Khulweshio, inywe abandu ba Misiri, mulamululwa mana muyabilwe halala nende abandu bafwila mwihe, abalamumanyilekhwo Nyasaye tawe.

²⁹Abandu ba Edomu bosi baliyo, halala nabaruchi babwe nende abemilisi babwe boosi. Olwa bali nibashili mwoyo, bali nobunyali obunji, nebutswa bulaano bayabilwa halala nende abandu abafwila mwihe, abalamumanyile Nyasaye ta.

³⁰Abemilisi bemasaba boosi pe baliyo, nende abandu ba Sidoni boosi, abayabilwa halala nabafu bandi mushifwimbwa murwe. Olwa bali nibashili mwoyo, bachila abandu baaria khulwa amaani kabwe, nebutswa bulaano, bayabilwa mushifwimbwa murwe halala nende abafwila mwihe, abalamumanyile Nyasaye tawe.

³¹Olwa omuruchi wa Misiri alabalolakhwo, alalemibwa omwoyo khulwa obunji bwabelihebe boosi. Nolwa isie OMWAMI Nyasaye emboola.

³²Okhuba isie ndakhola omuruchi wa Misiri okhuriisia abali mwoyo, nebutswa ye nende abelihebe boosi baleerwa nibayabilwa halala nende abafwila mwihe, abalamumanyile Nyasaye ta. Nolwa isie OMWAMI Nyasaye emboola.”