Read wanga EZEKIELI 33 Bible Online

EZEKIELI 33 - wanga bible

EZEKIELI 33

¹OMWAMI Nyasaye yamboolela ari,

²“Mwana womundu, boolela abandubo mbu, nimba nindeera olukanga khwihanga mana abandu balio baahule mulala khubo okhuba omulindi,

³ne omulindi oyo naba nalola olukanga nilwitsanga khwihanga elo, mana akhupe olwika okhuchetsiyia abandu,

⁴ne omundu yesi yesi ouhulila olwika olwo naba nalachetsiha ta, mana amululwe nolukanga olwo, okhufwakhwe khulaba khuye omwene.

⁵Okhuba yahulila olwika nilukhupa ne nalechelesia, khulweshio amatsayike kalaba khuye omwene. Nebustwa, niyakhahuliile akobuchetsiyi ako, yakhahonokosiye obulamubwe.

⁶Habula omulindi oyo naba nalola olukanga nilwitsanga ne nalakhupa olwika okhuchetsiyia abandu ta, mana olukanga lwitse lumulule omundu yesi yesi mubumayanubwe, ndalabanza omulindi oyo okhufwa khwomundu oyo.

⁷“Khulweshio iwe mwana womundu, ekhukholile okhuba omulindi khuboluyia lwa Isiraeli. Olabachetsiyinjia buli lwosi olwa ekhulachilisia.

⁸Nimba nimboolela abandu abamayanu endi, ‘Inywe abamayanu, toto mwene mulafwa,’ ne nolabachetsiyia okhwikalukhasia okhurula khubumayanu obwo, balafwila mubumayanu bwabwe, nasi ndalakhubanza okhufwa khwabwe.

⁹Nebutswa noba nochetsiyia omundu omumayanu mbu yekalukhasie mana aleshe obumayanubwe, ne nalekalukhasia ta, alafwa khulwa obumayanubwe obwo, habula iwe olaba nohonokosiye obulamubwo.”

¹⁰Mana OMWAMI Nyasaye niyamboolela ari, “Mwana womundu, boolela aboluya lwa Isiraeli mbu, inywe muboolanga muri, ‘Ifwe khusitohelwe nobumayanu nende obwonooni bwefwe, ne bichilanga nikhwotoshelela. Kho nakhunyale khurie okhuba mwoyo?’

¹¹Obaboolele mbu, shinga olwa endiho mwoyo, shiesangalilanga okhufwa khwomundu omumayanu ta, habula ndikombanga mbu, omumayanu aleshe obumayanubwe, abe mwoyo. Inywe aboluyia lwa Isiraeli, mwikalukhasie muleshe obumayanu bwenywe. Eshichila nimwenya okhufwa nishi?

¹²Nawe, mwana womundu, boolela abandubo mbu, omundu omulunjishi olwa akhola kobumayanu, obulunjishibwe shibulamuhonokosiakhwo ta. Ne olwomundu omumayanu yekalukhasia nalekhana nobumayanubwe, shialahebwa eshinyasio ta. Naye omundu omulunjishi naba nachaaka okhukhola kobumayanu, obulunjishibwe shibulamuhonokosiakhwo ta.

¹³Kata nesuubisia omundu omulunjishi mbu alaba mwoyo, naye niyesika obulunjishibwe, ne nakhola kobumayanu, ebikholebie biobulunjishi ebio shibiletsulilwakhwo kata shilala tawe. Nebutswa alafwa khulwa obumayanubwe.

¹⁴Khandi, kata nemba nesuubisia omundu omumayanu mbu, alafwa, ne niyekalukhasia nalekha okhukhola obwonoonibwe, nakhola akobulunjishi khandi kahabwene,

¹⁵naba nakalusia eshia yehola nende eshia yeeba, ne nakhola akobulunjishi, toto mwene alaba mwoyo, shialafwa ta.

¹⁶Obwonooni bwayakhola shibuletsulilwakhwo khandi ta, okhuba akholile akakhoyele khandi akali kahabwene, khulweshio alaba mwoyo.

¹⁷“Nebutswa abandubo baboolanga bari, ‘Aka OMWAMI Nyasaye akholanga shikali kahabwene ta,’ habula obwatoto buli mbu, aka bo bakholanga niko akalali kahabwene ta.

¹⁸Olwa omundu omulunjishi akalukhana nalekha okhukhola kobulunjishi, nakhola kobumayanu, alafwa khulwa obumayanu obwo.

¹⁹Ne lwomundu omumayanu akalukhana nalekha okhukhola kobumayanubwe nakhola kobulunjishi, alaba mwoyo khulwa obulunjishibwe obwo.

²⁰Nebutswa inywe abandu ba Isiraeli muboolanga muri, ‘OMWAMI Nyasaye shiakholanga akahabwene ta.’ Ndalamukhalachila eshiina buli mulala khwinywe okhulondana nebikholebie.”

²¹Khunyanga yakharano yomwesi kwekhumi, mumuyika kwekhumi nakhabili nikhuli mumbohe, omundu mulala owahonokokha okhurula Yerusalemu yetsa niyamboolela ari, “Litookho lia Yerusalemu lisasiibwe.”

²²Ne, khungoloobe, kho bushie omundu oyo yetse, obunyali obwa OMWAMI Nyasaye bwali bungwisiye obusilu, nindalanyala okhuboola ta. Olwa omundu oyo yamboolela amakhuwa ako, ndanyoola obunyali bwokhuboola, nindalaba omusilu khandi tawe.

²³OMWAMI Nyasaye yamboolela ari,

²⁴“Mwana womundu, abandu bamenyanga mumatookho keshialo shia Isiraeli, akasasibwa nikakwa amakunda baboolanga bari, ‘Kata Aburahamu niyali butswa omundu mulala yenyene, yahebwa eshialo shia Isiraeli shiosi okhuba eshishie. Nebutswa ifwe khuli abanji, kho obwatoto buli mbu, khwahebwa eshialo shino mbu shibe eshiefwe.’

²⁵“Khulweshio obaboolele mbu, isie OMWAMI Nyasaye emboola mbu, inywe muliitsanga inyama eyishilimwo amalasile, nimwinamila ebifwanani bienywe, nende okhuraatsia eshitsayi. Kho mupaaranga mbu munyala okhuhebwa eshialo shino mbu shibe eshienywe?

²⁶Mwileetanga khutsinganga tsienywe, nimukhola akeshifwabi, ne buli mulala khwinywe yelaasinjia nomukhasi womumenyaniwe. Kho mupaaranga mbu munyala okhuhebwa eshialo shino mbu shibe eshienywe?

²⁷“Obaboolele mbu, isie OMWAMI Nyasaye emboola mbu, olwa emba nendiho mwoyo, abandu bamenyanga mumatookho kasasibwa ako baleerwa nolukanga. Nabo abali elwanyi ebulafu, ndalalekhuula tsisolo nabulimo tsibalie. Ne abali mutsingoba nende mu tsimbinga, baleerwa nolumbe.

²⁸Ndalakhola eshialo okhutoong'a eshikhaya nishikwa likunda. Ne obunyali bwabwe obuchilanga nibeechinjimisia bulaakama. Ebikulu bia Isiraeli bilakwisibwa eshitsiimi eshikhongo muno, eshiomundu yesi yesi alanyala okhubiramwo ta.

²⁹Olwa ndalaba nekholile eshialo okhutong'a eshikhaya, nishikwiile likunda khulwa akeshifwabi kabwe kabakhola koosi, nolwa balamanya mbu isie nisie OMWAMI Nyasaye.”

³⁰OMWAMI Nyasaye yamboolela ari, “Mwana womundu, olwa abandubo bakhung'ananga hambi namasiisi kelitookho nende mubwinjililo bwetsinzu tsiabwe bakhumoonyanga nibaboolelana abeene khu beene bari, ‘Chende khutsie khuhulilekhwo mbu nimakhuwa shiina aka OMWAMI Nyasaye aboolile.’

³¹Kho bakhwitsilanga iwe shinga olwa abandu banje bandi bakhwitsilanga nibekhala imbeliwo mbu bahulile amakhuwa koboola, nebutswa shibakholanga akobaboolela okhukhola ta. Okhuba obuheeli bwabwe nobwakhuminwa butswa, nebutswa amapaaro kabwe kali butswa khukhwinyoolela inganga yabwe abeene.

³²Ne, lola, oli butswa shinga oubembelanga tsinyimbo tsiobuselelani, namayosi amalayi khandi shinga oubakhupilanga obukhana. Okhuba bahulilanga akobaboolelanga koosi, nebutswa shibakakholangakhwo kata elala ta.

³³Nebutswa olwa amakhuwa kobaboolelanga ako kakhekholeshe, okhuba endi nende obwatoto mbu kakhoosibwe, nolwa bakhamanye mbu omulakusi yabelenje mubo.”