Read wanga EZEKIELI 34 Bible Online

EZEKIELI 34 - wanga bible

EZEKIELI 34

¹OMWAMI Nyasaye yamboolela ari,

²“Mwana womundu, rumbulila abemilisi ba Isiraeli akobulakusi nobafukula. Obaboolele mbu, isie OMWAMI Nyasaye emboola endi, muli mushilaamo shiobubi, inywe abemilisi ba Isiraeli, mwihendelanga abeene obulateeba amakondi kanje ta.

³Munywetsanga amabeele, nimwifwala ebiifwalo biakasibwa okhurula khubwoya bwamakondi, nende okhusinza akanera nimulia inyama yako, nebutswa shimwayanga amakondi keene ta.

⁴Shimutinyisinjia akali amateshele, noho okhusilikha akalwala, kata okhuboha akasaaliile ta. Akatiimatiimanga nikarula khunjila shimukakalusinjia, noho okhukhaaba akakorire ta. Habula mukarukanga mubululu nimukamiina.

⁵Khulweshio kasalaana, okhuba shikaali nende omwayi ta, kakwile eshioluyitsi khutsisolo nabulimo.

⁶Amakondi kanje kasalaana, nikatiimatiima khutsingulu tsiosi nende khubuli ebikulu ebiraambi. Kasalaasibwa khushialo shiosi, nikabula oukahenjelesia kata okhukakhaaba tawe.

⁷“Inywe abaayi, recheresie aka isie OMWAMI Nyasaye emboola,

⁸shinga olwa isie endi mwoyo, okhuba amakondi kanje kakwile eshioluyitsi khulwa okhubula omwayi. Khandi shichila inywe abaayi bako shimukakhaabanga ta, habula mwihendelanga butswa abeene, nimulaaya amakondi kanje ta,

⁹khulweshio, inywe abaayi murecheresie aka isie emboola.

¹⁰Isie OMWAMI Nyasaye emboola mbu, inywe muli abasuku banje. Ndalabanuula amakondi kanje, ne shimulakaayakhwo khandi ta. Shimulehendelakhwo khandi abeene ta. Ndalahonokosia amakondi kanje okhurula khwinywe, ne shikalabakhwo eshiokhulia shienywe khandi ta.”

¹¹Khulweshio OMWAMI Nyasaye aboola ari, “Isie omwene ndalahenjelesia amakondi kanje nekakhaaba nende okhukalinda.

¹²Ndalakhaaba amakondi kanje nekanunula koosi okhurula mutsimbeka tsiosi etsia kasalaanilamwo khunyanga yamaleesi nende eshiilima eshikhongo, shinga lwomwayi akhaabanga malala khu makondike akasalaanile nikarula mukandi.

¹³Khandi ndalakachelesia okhurula mumbia tsiabandu nekabunjelesia okhurula mumahanga kandi akahukhaane, nekareera mushialo shiako akeene. Ne ndalakaaya khu tsingulu tsia Isiraeli, khumialo, nende hosi hosi mushialo omwo, aha abandu bamenyanga.

¹⁴Ndalakaaya mubwayilo obulayi, khandi obutenje bwetsingulu tsia Isiraeli bulaba obwayiro bwako. Kalaaya ebweneyo nikahuluushila mushialo eshilayi, ne kalaaya mubwayilo bwomuboka omulayi kwokhutsingulu tsia Isiraeli.

¹⁵Isie mwene ndalaba omwayi wamakondi kanje, ne ndalakakhola okhukona hasi nikahuluukha. Nolwa isie OMWAMI Nyasaye emboola.

¹⁶Ndalakhaaba akakorire, nende okhuchelesia akashiamile nikarula khunjila nikasalaana. Ndalaboha akasaalisiibwe, nende okhutinyisia akatofuule. Habula ndalamulula amanefu nende akamaani. Ndalakaaya munjila ya habwene.”

¹⁷OMWAMI Nyasaye aboola ari, “Ne, inywe, abali belituuli liamakondi kanje, ndalakhalachila buli elala eshiina, nengabula amakondi amalayi okhurula mumabi, nende amamiiku okhurula mu tsimbusi tsikhole.

¹⁸Akandi khumakondi kashienywe, shikali mbu kayaangakhwo butswa obunyasi obulayi bwomuboka nikekura ta, habula kasenachilanga obundi nebilenje biako. Khandfi shikali mbu kanywetsanga butswa amaatsi amalenjeelu ta, habula katuubuulanga akandi khumaatsi tsana nebilenje biako.

¹⁹Kho, mupaaranga mbu amakondi kanje kakhoyile okhwaya obunyasi bwamusenachiliile hasi, nende okhunywa amaatsi kamutuubuulile nebilenje bienywe?

²⁰“Khulweshio, isie OMWAMI Nyasaye emboola mbu, lola, isie omwene ndalakhalaka eshiina hakari wamakondi amanefu nende amang'ahu.

²¹Okhuba muluumanga akalwala nimutuya amatofu netsinzika okhuula olwa kasalaana nikatsia ehale okhurula mwituuli lia amakondi kanje.

²²Nebutswa ndalahonokosia amakondi kanje, shikalabaakhwo shioluyitsi khandi ta. Khandi ndalakhalachila likondi nende elindi eshiina.

²³Ndalaraaho omwayi mulala khuko, omuruchi shinga omukhalabani wanje Daudi, naye alakaya. Alaba omwayi wako khandi omuliindi wako.

²⁴Nasi, isie OMWAMI Nyasaye, ndalaba Nyasaye wako, ne omukhalabani wanje Daudi alaba omuruchi muko. Nolwa isie OMWAMI Nyasaye emboola.”

²⁵“Ndalakhola ninako indakano yomulembe nende okhulonda tsisolo nabulimo tsindulu okhurula mushialo, mbu kamenye ebulafu nikahuluukha mumutsuru mu mulembe.

²⁶Ndalakahelesia ikhabi, nende okhukakhola kamenye khushikulu shianje eshitakatifu. Khandi ndalakahelesia ikhabi yeifula buli lwosi olwa kaba nikachienya.

²⁷Ne emisaala chiomubulimo chilaama ebiamo biachio, nachio emikunda chilabaamwo ebiraache, mana kalamenya nomulembe mushialo shiako. Olwa ndalafunaka lichooki liabwe, nebahonokosia okhurula mubunyali bwabandu babasandinjia, nolwa balamanya mbu isie nisie OMWAMI Nyasaye.

²⁸Shibalabakhwo eshioluyitsi khumahanga kandi, kata okhumululwa netsisolo nabulimo khandi ta. Balamenya nomulembe, ne abulaho kata mulala oulabariisia.

²⁹Khandi ndabahelesia emikunda chieliloba linulu, kho mbu baleshe okhubakhwo neinzala mushialo, kata okhunyekwakhwo nende amahanga kandi khandi ta.

³⁰Nolwa balamanya mbu isie, OMWAMI Nyasaye wabwe, endi halala ninabo, khandi mbu, bo, aboluyia lwa Isiraeli, nabandu banje. Nolwa isie OMWAMI Nysaye emboola.

³¹Isie OMWAMI Nyasaye emboola mbu, inywe, amakondi ka isie omwene ndaayanga, muli abandu banje, nasi endi Nyasaye wenywe.”