Read wanga EZEKIELI 35 Bible Online

EZEKIELI 35 - wanga bible

EZEKIELI 35

¹OMWAMI Nyasaye yamboolela ari,

²“Mwana womundu, shiukhana ohenje eshikulu shia Seiri, oshirumbulile obulakusi noshifukula.

³Oshiboolele mbu, isie OMWAMI Nyasaye emboola mbu, iwe eshikulu shia Seiri, isie endi omusukuwo. Ndalanyiila omukhono kwanje, ekhuhelesie eshinyasio, ekhukwisie likunda notong'a eshikhaya.

⁴Ndalakhola amatookhoko okhutong'a amakhaya nekhukwisia likunda. Nolwa olamanya mbu isie nisie OMWAMI Nyasaye.

⁵Okhuba wekhola omusuku weinziayo khu Isiraeli, nolekha abandu ba Isiraeli okhusinzwa khubise biamatinyu kabwe, khubise bieshihesi shieshinyasio shiabwe khulwa obwonooni bwabwe.

⁶Khulweshio, isie OMWAMI Nyasaye emboola mbu, shinga olwa endi mwoyo, ndalamurechekha inywe khulwa okhufwa, ne shimulahonokokha okhufwa ta. Okhuba muli neshikha shiokhuraatsia eshitsayi, okhuula mwesi muleerwa.

⁷Ndalakhola eshikulu shia Seiri okhutong'a eshikhaya khandi ndalashikwisia likunda. Khandi ndalareera abandu boosi ababiranga khushikulu eshio.

⁸Ndalakhola ebikulubio okhwitsulakhwo emilambo chiabandu beerirwe nolukanga. Khandi emilambo chiabandu bafwiliile mwihe chilaandakalala khubikulubio nende mumabandako nende mumialochio chiosi.

⁹Ndalakhukwisia likunda inziayo, khandi abandu shibakhamenyekhwo mumatookhoko tawe. Nolwa olamanya mbu Isie nisie OMWAMI Nyasaye.

¹⁰Iwe waboola mbu, amahanga kabili kano, elia Isiraeli nende elia Yuda, kakhabe akanje, khandi khwakhakabule kaba akefwe, kata kario, ebweneyo niyo ewa isie OMWAMI Nyasaye ndamenya.

¹¹Khulweshio, isie OMWAMI Nyasaye emboola mbu, shinga olwa endi mwoyo, ndalakhurunga obubi okhulondana neliruma nende imbalikha, ebia walolosia khulwa isila ya wali ninayo khubo. Nabo balamanya mbu ndakhuhelesia eshinyasio okhubeela akawabakholela.

¹²Nawe olamanya mbu, isie OMWAMI Nyasaye, ndahulila olwa wachaaya abandu banje noboola mbu, tsingulu tsia Isiraeli tsikwisiibwe likunda, tsiahanwa khwifwe mbu khutsimulule.

¹³Ndahulila nimwichinjimisia nende okhwiyitsiala nimuboola amakhuwa kokhuufukula isie.

¹⁴Khulweshio, isie OMWAMI Nyasaye emboola mbu, olwa ndalakhukwisia likunda, eshialo shiosi shileekhoya nishisaangalila okhukwisibwakhwo.

¹⁵Shinga olwa wekhoyela okhukwisibwa khwelihanga lia Isiraeli, eliali obulaame bwa aboluyia lwa Isiraeli, okhuba liali nilikwisiibwe likunda, nolwa siesi ndalakhukwisia likunda endio, iwe eshikulu shia Seiri, nende eshia Edomu shiosi. Nolwa balamanya mbu isie nisie OMWAMI Nyasaye.”