Read wanga EZEKIELI 36 Bible Online

EZEKIELI 36 - wanga bible

EZEKIELI 36

¹OMWAMI Nyasaye yamboolela ari, “Mwana womundu, rumbulila tsingulu tsia Isiraeli akobulakusi nobaboolela ori, inywe tsingulu tsia Isiraeli, hulile aka isie OMWAMI Nyasaye emboola.

²Isie OMWAMI Nyasaye emboola mbu, okhuba abasuku benywe babatseshelela nibaboola bari, ‘Tsingulu tsiali tsiabakuuka befwe bulaano netsiefwe,’

³obarumbulile akobulakusi noboola mbu, Isie OMWAMI Nyasaye emboola mbu, khulwokhuba inywe mwakhola tsingulu tsia Isiraeli okhutong'a tsikhaya nimutsikwisilia elala likunda, nimubaseera nende okhubatubanjila okhurula tsimbeka tsiosi, okhuula nibekhola okhuba omwandu kwamahanga kandi koosi, khandi nibakwa abokhumoonywa nibasungwakhwo amakhuwa amabi mubandu bandi,

⁴bulaano, inywe tsingulu tsia Isiraeli, hulile aka isie OMWAMI Nyasaye emboola. Isie emuboolela inywe tsingulu nende ebikulu bia Isiraeli, tsisebele nende amabanda, inywe abatiilwa nimuyilwa mumbohe, eshialo shienywe nishikwisibwa likunda nende amatookho kenywe okhutong'a amakhaya, khandi nikakwa akokhumoonywa nikekhola inzekho khumahanga kandi koosi.

⁵Khulweshio, Isie OMWAMI Nyasaye emboola nesinyiishe muno, okhufukula amahanga kandi ako koosi, khandi nende abandu belihanga lia Edomu liosi, abakhola eshileka neinjinia, nibasaangaalila okhuyaaya eshialo shianje shia Isiraeli nibashikhola okhuba eshiabwe.

⁶Khulweshio, rumbulila eshialo shia Isiraeli akobulakusi, khandi oboolele tsingulu nende ebikulu, tsisebele nende amabanda kashio mbu, isie OMWAMI Nyasaye emboolanga kano koosi mumbalikha yeliruma lianje okhuba amahanga kandi kamufwola inywe.

⁷Khulweshio, isie omwene nditsuba mbu, okhuula abandu bamahanga kandi akamubotokhana inywe ako koosi balafwolwa.

⁸“Nebutswa inywe, tsingulu tsia Isiraeli, emisaala chilaraakwa nichimela mwinywe. Chilaama ebiamo mumasaka kachio khulwenywe, inywe abandu banje ba Isiraeli. Okhuba mubwangu buno, mulakalukha mushialo shienywe.

⁹Okhuba, lola, bulano, endi khulubeka lwenywe, khandi ndalakalukha okhuba ninenywe. Ndalakhola emikunda chienywe chilimwe nichiraakwamwo ebiokhulia khandi.

¹⁰Ne ndalenjiyia aboluyia lwa Isiraeli lwosi. Amatookho kenywe kalabamwo abandu abakamenyamwo, ne ndalombakha khandi buli shindu eshiali nishiasasibwa.

¹¹Ndalakhola abandu benywe nemiruko chienywe okhwibulana nibaba abanji. Ne, ndalamukhola inywe mwibulane mube abanji okhushilakhwo shinga olwa mwalinji khale. Ndalamukhola okhumenya mushialo shienywe shinga olwa mwalinji khale, nende okhubakholela amalayi amanji okhushilakhwo shinga olwa mwalinji khale. Nolwa mulamanya mbu isie nisie OMWAMI Nyasaye.

¹²Ndalamukalusia inywe abandu banje ba Isiraeli, okhumenya mushialo shienywe khandi. Shilaba eshialo shienywe abeene, ne shishiakhabekhwo shieinzala yokhwira abaana benywe khandi tawe.

¹³“Isie OMWAMI Nyasaye emboola mbu, nakatoto mbu abandu baboolanga mbu, inywe muliitsanga abandu, khandi mbu, mwiranga abaana benywe.

¹⁴Nebutswa okhurula leelo luno okhuula inziayo, shimwakhaliekhwo abandu kata okhwira abaana benywe khandi tawe. Nolwa isie OMWAMI Nyasaye emboola.

¹⁵Shimwakhahulilekhwo amahanga kandi nikamufwola khandi ta. Shikakhamufwolekhwo noho okhwisichirasiakhwo lihanga lienywe khandi tawe. Nolwa isie OMWAMI Nyasaye emboola.”

¹⁶OMWAMI Nyasaye niyamboolela ari,

¹⁷“Mwana womundu, olwa abandu boluyia lwa Isiraeli bamenyanga mushialo shiabwe abeene, bashifwabia khulwa injenda yabwe nende ebikhole biabwe. Ebiima biabwe biali ebibi khwisie shinga eshifwabi shiomukhasi nali mumwesi.

¹⁸Niko akachila isie nebasundulila liruma lianje khulwa eshitsaayi shiabali nibaraatsia mushialo, nende khulwa ebifwanani biachila nibashifwabia.

¹⁹Ndabasalaasia mumahanga kandi, nende mubialo biosi. Ndabakhalachila eshiina okhulondana nebiima nende ebikhole biabwe.

²⁰Nebutswa mumahanga kosi kosi akabatsitsangamwo, nende hosi hosi aha batsitsanga, bafwabinjia eliira lianje litakatifu, okhuba abandu baboolanga khubo bari, ‘Bano nabandu ba OMWAMI Nyasaye, nebutswa barula mushialoshie.’

²¹Habula isie ndahendela eliira lianje litakatifu, liabandu boluyia lwa Isiraeli bafwabia mumahanga kandi aka batsitsangamwo.

²²“Khulweshio, isie OMWAMI Nyasaye emboola mbu, boolela aboluyia lwa Isiraeli mbu, akenzitsanga okhukhola kano, shikali khulwabo ta, habula ni khulweliira lianje litakatifu, elia mwafwola buli hosi hosi mumahanga kandi kamwatsitsangamwo.

²³Olwa ndakhalolesie obutakatifu bweliira lianje lioluyali, eliamwafwola mumahanga kandi kosi kosi akamwatsitsangamwo, nolwa amahanga ako kakhamanye mbu isie nisie OMWAMI Nyasaye. Nolwa isie OMWAMI Nyasaye emboola. Ndalalolesia obutakatifu bwanje khumahanga kandi okhubirira khwinywe.

²⁴Okhuba ndalamurusia inywe mumahanga kandi, nemukhung'asia halala okhurula mubialo bindi biosi, nende okhumukalusia mushialo shienywe.

²⁵Ndalamunyululusiakhwo amaatsi amatsienukhu, nemukhola okhuba abatsienukhu okhurula mubumayanu bwenywe, nende mubifwanani bienywe.

²⁶“Ndalara mwinywe omwoyo omuyia nende amapaaro amayia. Ne, ndalarusia mwinywe omwoyo omuumilanu kwobukhayi, nende okhuramwo omutorotoro kwobuhulili.

²⁷Ndalara roho wanje mwinywe, nende okhubakhola okhulinda amalako kanje, nokhulonda ameebalo kanje.

²⁸Mulamenya mushialo shia ndahelesia abakuuka benywe. Mulaba abandu banje, nasi ndalaba Nyasaye wenywe.

²⁹Ndalabahonokosia okhurula khu buli shindu shiosi shiosi eshinyala okhubafwabia nende okhwinjiyia imele yenywe, ne shindalalekha inzala ibalumekhwo khandi tawe.

³⁰Ndalenjiyia ebiamo biemisaala chienywe nende ebiraache biomumikunda chienywe, kho mbu muleshe okhulumwakhwo neinzala mumahanga kandi khandi tawe.

³¹Nolwa muletsulila injenda yenywe yobumayanu nende ebikhole bienywe biobumayanu ebia mwakhola, ne mulesinyishila abeene khulwa obumayanu bwenywe nende ebikhole bienywe bieshisinyo.

³²Ne, isie OMWAMI Nyasaye embola mbu, ndenyile mumanye mbu, shindalakhola kano koosi khulwenywe ta, ndenyile mbu inywe abandu boluyia lwa Isiraeli, mufwimbwe omurwe nimuhuka khulwebikhole bienywe.”

³³Isie OMWAMI Nyasaye emboola endi, “Khunyanga yokhumwosia inywe okhurula mubumayanu bwenywe bwosi, ndakhamukhole okhumbakha amatookho kenywe akali nikalikululwa, nimukamenyamwo khandi.

³⁴Ne, emikunda chialinji nichiakwa eshitsiimi chilalimwa, kata ababiri shibalachilolakhwo nichili eshitsiimi khandi tawe.

³⁵Ne balaboolanga bari, ‘Omukunda kuno, okwalinji nikwakwa eshitsiimi bulano kufwana shinga okwa Edeni. Nako amatookho kalinji nikalikululwa nikabulamwo abandu, nikakwa amakunda, bulano kalimwo abandu, khandi kabotokhaanwe netsingoba.’

³⁶Mana amahanga akalatoong'a nikakhubotokhaane kalamanya mbu Isie, OMWAMI Nyasaye, nisie oumbaashe amatookho kali nikalikululwa nende okhuraaka emisaala khandi mumikunda chiali nichiakwa eshitsiimi. I sie OMWAMI Nyasaye, nisie ouboolile, ne ndalakhola endio.

³⁷“I sie OMWAMI Nyasaye emboola mbu, ndalakhola abandu boluyia lwa Isiraeli baasabe mbu ebafuchilile okhwibulana nibaba abanji, mana olwibulo lwabwe lube olunji shinga olwa emiruko.

³⁸Amatookho kabwe akali nikatong'a amakhaya, kaleetsulamwo abandu shinga emiruko chia Yerusalemu, echiokhumala emisango khunyanga tsikhulundu tsiamasabo. Nolwa balamanya mbu, isie nisie OMWAMI Nyasaye.”