Read wanga EZEKIELI 37 Bible Online

EZEKIELI 37 - wanga bible

EZEKIELI 37

¹Obunyali obwa OMWAMI Nyasaye bwanzitsamwo, mana niyambila ebulafu nendi murohowe, niyasinjisia hakari welibanda, eliali nilitsuulemwo amakumba.

²Niyanjeesia mumakumba ako. Ne, lola, amakumba ako kali amanji mwibanda omwo ne khandi kali amoomu ka.

³Niyareeba ari, “Mwana womundu, amakumba kano kanyala okhuba mwoyo?” Nemukalusia endi, “OMWAMI Nyasaye, niwe omwene oumanyile.”

⁴Mana niyamboolela ari, “Rumbulila amakumba kano obulakusi, nokaboolela ori, ‘Inywe amakumba amoomu, hulile aka OMWAMI Nyasaye aboola.’

⁵Isie OMWAMI Nyasaye emboolela amakumba kano mbu, ndalafuura omuuya mwinywe, nenywe mulaba mwoyo.

⁶Ndalabarakhwo emisi, neinyama yokhumubili nende okhubafuunikhakhwo likhoba. Ndalabaramwo omuuya, nenywe mulaba mwoyo. Nolwa mulamanya mbu Isie nisie OMWAMI Nyasaye.”

⁷Kho nerumbula akobulakusi shinga olwa ndali nendachilisiibwe okhukhola. Ne olwa ndali neshirumbulanga, ndahulila obuyoka nibukhola shinga bwokhukhwakura khweshindu. Mana amakumba ako nikachaka okhwiyunga halala, buli likumba khulindi.

⁸Ne, olwa ndahenga, ndalola emisi nende inyama yomubili nibilikhwo, nashio eshikhoba shiali nishilikhwo. Nebutswa omuuya shikwalimwo ta.

⁹Mana niyamboolela ari, “Rumbulila omuya obulakusi, mwana womundu, kurumbulile noboola mbu, OMWAMI Nyasaye aboola ari, ‘Iwe omuuya, yitsa okhurula mutsimbeka tsiosi tsine, oyeele khumilambo chino, mbu chibe mwoyo.’ ”

¹⁰Kho, nerumbula akobulakusi shinga olwa yali niyandachilisiye okhukhola. Omuuya nikukeetsamwo, ne nikekhola abandu bali mwoyo, nibasinjila khubilenje biabwe, shinga omukanda kwabelihe omukhongo muno.

¹¹Mana OMWAMI Nyasaye niyamboolela ari, “Mwana womundu, amakumba kano nibo oluyia lwabandu ba Isiraeli lwosi. Lola, baboolanga bari, ‘Amakumba kefwe koomile ka, khandi khubula obunaayi ta. Khuulile khushihesi.’

¹²Khulweshio rumbula akobulakusi, nobaboolela mbu, Isie OMWAMI Nyasaye emboola endi, ‘Lola, ndalamuyabulula inywe abandu banje, okhurula mubilindwa bienywe. Khandi ndalamukalusia ewenywe, mushialo shienywe shia Isiraeli.

¹³Olwa ndalamuyabulula inywe abandu banje, nemurusia mubilindwa bienywe, nolwa mulamanya mbu, isie nisie OMWAMI Nyasaye.

¹⁴Ndalara roho wanje mwinywe, nenywe mulaba mwoyo. Khandi ndalamukhola inywe okhumenya mushialo shienywe abeene. Nolwa mulamanya mbu nisie OMWAMI Nyasaye, owalaka okhukhola kano, ne, emalile okhukakhola. Nolwa isie OMWAMI Nyasaye emboola.’ ”

¹⁵OMWAMI Nyasaye yamboolela ari,

¹⁶“Mwana womundu, bukula akhabao mana ohandichekhwo ori, ‘Lihanga lia Yuda.’ Khandi obukule akhabao khandi ohandichekhwo ori, ‘Lihanga lia Isiraeli.’

¹⁷Mana otiile orubao rubili orwo ebuleka nebuleka mumukhonokwo, kho mbu ruloleshe shinga akhabao khalala.

¹⁸Ne, abandubo nibakhureeba obaboolele eshifune shiamakhuwa kano,

¹⁹obaboolele mbu, endi ahambi okhubukula akhabao khasinjiliile Isiraeli mana enimaasie halala nende akhasinjiliile Yuda. Okhurula khurubao rubili orwo, ndalakhomamwo akhabao khalala mana ekhatiile mumukhono kwanje.

²⁰Otiile orubao rubili orwo mumukhonokwo mana oleshe abandu boosi barulole.

²¹Mana obaboolele mbu, isie OMWAMI Nyasaye emboola mbu, ndakhachelesie abandu ba Isiraeli okhurula mumahanga kandi aka bali nibayilwamwo. Ndakhabakhung'asie halala okhurula hosi hosi aha bali, nebachelesia mushialo shiabwe.

²²Mana ndakhabakhole okhuba lihanga elala mushialo shiabwe, khubikulu bia Isiraeli. Bakhabe nomuruchi mulala wokhubaruka boosi. Shibakhakabukhanekhwo okhuba amahanga kabili noho okhuba noburuchi bwahukhaane khandi tawe.

²³Shibakhefwabiekhwo khandi nebifwanani biabwe nende ebindu bindi bieshisinyo, noho obumayanu bwabwe ta. Nebutswa ndakhabahonokosie okhurula mubwonooni bwabwe, nebakhola okhuba abatakatifu. Nolwa bakhabe abandu banje, nasi ndakhabe Nyasaye wabwe.

²⁴“Bakhabe nomuruchi shinga omukhalabani wanje Daudi, mana boosi bakhabe nomuruchi mulala. Bakhahulile ameebalo kanje nokhulinda amalako kanje.

²⁵Bakhamenye mushialo shiabakuuka babwe bamenyangamwo, eshia ndahelesia omukhalabani wanje Yakobo. Bo, nende abaana babwe halala nende abetsukhulu babwe bakhamenyemwo inziayo. Ne bakhabe nomuruchi shinga omukhalabani wanje Daudi okhuula inziayo.

²⁶Ndakhakhole indakano yokhuba nomulembe ninabo. Nayo yakhabe yeinziayo. Ndakhabahelesie tsikhabi nende okhubenjiyia. Ndakharalisie Ihekalu yanje mushialo shiabwe inziayo.

²⁷Ndakhamenye mubo; ndakhabe Nyasaye wabwe, nabo bakhabe abandu banje.

²⁸Olwa Ihekalu yanje yakhabe mushialo shiabwe inziayo, nolwa amahanga kandi kakhamanye mbu isie OMWAMI Nyasaye, nisie owaahula abandu ba Isiraeli okhuba abandu banje.”