Read wanga EZEKIELI 38 Bible Online

EZEKIELI 38 - wanga bible

EZEKIELI 38

¹OMWAMI Nyasaye yamboolela ari,

²“Mwana womundu, shiukhana ohenje Gogu, omuruchi weshialo shia Magogu, omuruchi omukhongo welihanga lia Mesheki nende elia Tubali, mana omufukule.

³Omuboolele mbu isie OMWAMI Nyasaye emboola endi, lola, ekhufukuule iwe Gogu, omuruchi welihanga lia Mesheki nende elia Tubali.

⁴Ndalakhushiukhasia mana ekhure tsisako museyatsio, khandi ndalakhukhwesa iwe nende abelihebo boosi, tsifarasitsio nende abatsiilushilangakhwo, boosi nibefwalile ebimanulwa biabwe biosi. Balaba omukanda omukhongo kwa bandu, boosi nibeemanuule ebikhumba nende tsinganga.

⁵Abelihe ba Perisia, aba Etsiopia halala nende aba Libia boosi nibefwalile ebikhumba nende tsikutwa,

⁶nende abelihe okhurula Gomeri boosi, aba Betsi-togama okhurula mubialo biosi biemasaba nende abamahe babwe boosi bali halala ninawe.

⁷Wirecheshe mana obetsenje meeso buli lwosi, iwe nende belihebo boosi, obe omulindi wabwe.

⁸Olunyuma lwetsinyanga tsinyinji, ndakhakhulachilisie okhutsia okhuseera abandu abahonokosibwa okhurula mwihe, eshialo shiabandu bali nibakhuung'aanilamwo okhurula mumahanga amanji nibamenya khubikulu bia Isiraeli, ebiali nibiakwa amakunda khulwoluhoono olurambi. Abandu bako bakhuung'aasibwa okhurula mumahanga kaukhane, ne bulano bamenyanga nomulembe boosi pe.

⁹Mwakhabeetsele nimubaseera shinga ifula yeimbumbuyeka. Inywe nabamahe benywe boosi, nende abandu bamahanga kandi abanji halala ninawe, mwakhatswane eshialo shinga lileesi.”

¹⁰OMWAMI Nyasaye yaboolela Gogu ari, “Khunyanga eyo, amapaaro kakhetse mumwoyokwo, nawe wakherecheshe okhukhola amabi.”

¹¹Wakhaboole ori, “Ndalatsia okhuseera eshialo eshiamatookho kashio kalaasirwa namasiisi tawe. Ndalatsia okhuseera abandu abamenya mubwihotselesi nende mumulembe. Boosi abamenya mumatookho akalaasirwa namasiisi, kata okhuba nemiliango noho ebiliibwa tawe.”

¹²Ndalatsia okhuyaaya nenjinga emiandu chiabandu bamenyanga mushialo eshiali nishiakwa likunda, abandu abakhung'aasibwa okhurula mubialo biaukhaane, abali nende emiruko nemiandu ebinji, abamenyanga hakari weshialo.

¹³Abandu ba Sheba nende aba Dadani, nende abakholi bobukhala belitookho lia Tarishishi nende abamenyanga mungongo tsialio balakhureeba bari, “Witsile okhuyaaya emiandu? Okhung'aasiye abelihebo okhuchiinga ebiyaayo nibayila, okhuchiinga ifetsa neitsahabu, okhubukula tsing'ombe nemiandu chindi eminji, okhunuula ebiyaayo ebinji?”

¹⁴Khulweshio, mwana womundu, rumbula obulakusi, oboolele Gogu mbu isie OMWAMI Nyasaye emboola mbu khunyanga eyo, olwa abandu banje ba Isiraeli bakhabe nibamenyile mumulembe,

¹⁵wakharule ewuuwo, mubitsiimi biemasaba, niwimiliile omukanda kwabelihe bamaani abanji, boosi nibaniinile khutsifarasi.

¹⁶Wakhaseere abandu banje ba Isiraeli shinga lileesi elitswanile eshialo. Mutsinyanga tsiolunyuma, ndakhakhurume okhuseera eshialo shianje, kho mbu okhubirira khwiwe Gogu, abandu bamanye mbu isie nisie wina, embalolesilie obutakatifu bwanje.

¹⁷“Isie OMWAMI Nyasaye ereeba mbu, shinewe owa ndaboolakhwo khale okhubirira khubarumishi banje, abarumbusi bobulakusi ba Isiraeli, abarumbula akobulakusi olwenolwo khulwa oluhoono olurambi mbu ndakhakhureere wabaseera?”

¹⁸Nebutswa isie OMWAMI Nyasaye emboola mbu, khunyanga eyo, olwa Gogu yakhaseere eshialo shia Isiraeli, ndakhabe noburuma obunji.

¹⁹Okhuba mumbalikha yanje nende muburima bwanje obunji endachilisia mbu khunyanga eyo, okhureenga khweshialo okhukhongo khwakhabeho mushialo shia Isiraeli.

²⁰Tsinyeeni, amanyonyi, tsisolo nabulimo tsiosi, tsikhongo netsindutu, nende biosi ebimoolanga hasi khwiloba, nende abandu bosi abali khushialo, biakhatechele olwa biakhandole Isie. Ebikulu nabio biakhalikululwe, tsingulu tsiakhakwe, ne amasiisi koosi kakhalibulushe nikakwa hasi.

²¹Isie OMWAMI Nyasaye emboola mbu, ndakhariisie Gogu nende amatinyu koosi akahukhaane. Abelihebe bakhaseerane abeene khu beene nibaremana netsinganga tsiabwe.

²²Ndakhamuhelesie eshinyasio shiolumbe nende okhumuraatsia eshitsayi. Ifula inyinji khandi eya amachina nende omulilo neshiribiti biakhamuyembekhwo, ye nende abamahebe, nende abamahanga amanji boosi abali khulubekalwe.

²³Ndakhalolosie endio obukhongo bwanje nende obutakatifu bwanje, nende okhwimanyisia mumahanga amanji. Nolwa bakhamanye mbu Isie nisie OMWAMI Nyasaye.