Read wanga EZEKIELI 39 Bible Online

EZEKIELI 39 - wanga bible

EZEKIELI 39

¹OMWAMI Nyasaye yamboolela ari, “Mwana womundu, rumbula akobulakusi nofukula Gogu, omuruchi omukhongo weshialo shia Mesheki nende eshia Tubali. Omuboolele mbu, Isie endi omusukuwe.

²Ndalamushiukhasia nemuchoomia khunjila yindi, nemukalusia okhurula ehale mubialo biolubeka lwemasaba, nemwimilila okhuseera ebikulu bia Isiraeli.

³Ndalakwisia hasi obuyingo obuli mumukhonokwe mukhasi nende ebisele ebili mumukhonokwe musaatsa.

⁴Alafwila khubikulu bia Isiraeli, ye nende abelihebe boosi, halala nende abandu ba ali ninabo. Ndalalekha emilambo chiabwe chiliibwe netsingosia nende tsisolo nabulimo.

⁵Okhuba isie OMWAMI Nyasaye emboola mbu, balafwila ebulafu mubulimo.

⁶Ndalarubula omulilo mushialo shia Magogu, nende khubamenyanga nibehulila obulayi khubikhalachinga bieinyanza. Nolwa balamanya mbu, isie nisie OMWAMI Nyasaye.

⁷“Ndalakhola eliira lianje litakatifu limanyishe mubandu banje ba Isiraeli. Shindalalekhakhwo abandu okhufwola eliira lianje litakatifu khandi ta. Ne abandu bamahanga kandi balamanya mbu isie nisie OMWAMI Nyasaye, Omutakatifu wa Isiraeli.

⁸Lola, inyanga yandarumbulakhwo yitsanga, ne okhuula yileetsa, nolwa isie OMWAMI Nyasaye emboola.

⁹“Mana abandu bamenyanga mumatookho ka Isiraeli bakharubule omulilo nibasamba ebimanulwa biatong'a. Bakhasambe ebikhumba nende tsingabo, obuyingo nende ebisele, tsindabushi nende amafumo, ne bakhabisambe oluhoono lwemiyika musafu.

¹⁰Shibakhareenyekhwo tsikhwi okhurula mumikunda, noho okhurikanda emisaala okhurula mumitsuru ta, okhuba bakhekhoonyelenje ebimanulwa ebio okhwashia omulilo. Bakhayaaye abandu ababayaaya, nokhunuula abandu ababanuula. Nolwa isie OMWAMI Nyasaye emboola.”

¹¹OMWAAMI Nyasaye yamboolela ari, “Olwa amakhuwa ako kakhekholeshe, ndakhahelesie omuruchi Gogu habundu wokhuyabilwa mushialo shia Isiraeli, Mwibanda Liabachendi, ebukwe weinyanza inzakhanyu. Omuruchi Gogu nende abelihebe boosi bakhayabilwe ebweneyo, nalio libanda elo liakhalangwe mbu, ‘Libanda Liabelihe ba Gogu.’

¹²Aboluyia lwa Isiraeli bakhamale emiesi musafu nibayabilanga emilambo echio chiosi, kho mbu basiiye eshialo shiabwe khandi.

¹³Abandu boosi beshialo eshio bakhakhoonyane okhubayabila. Ne likhuwa elo liakhabareerire oluyali khunyanga yandakhalolesiliekhwo obukhongo bwanje. Nolwa isie OMWAMI Nyasaye emboola.

¹⁴Olunyuma lwemiesi musaafu echio, bakhalobole abandu, abakhalumilile okhuchenda mushialo shiosi nibakhabilisia emilambo chiabandu, echiba nichishilaambiile hasi, nichishili okhuyabilwa, nibachiyabila khulwa okhusiiya eshialo.

¹⁵Olwa bakhabe nibachendanga buli habundu mushialo omwo, mana omundu yesi yesi alole likumba liomundu, yakhasimishe eshibalikho habundu tsana, okhuula olwa abayabisi baba nibamalile okhuliyabila Mwibanda lia abelihe ba Gogu.

¹⁶(Litookho liakhabe hambi bwene yaho eliakhakulikhwe eliira lia lihe tsana.) Nolwa bakhasiye eshialo eshio bario khandi.

¹⁷“Nawe mwana womundu, isie OMWAMI Nyasaye eboola mbu, boolela amanyonyi ketsimbia tsiosi nende tsisolo nabulimo tsiahukhane ori, ‘Mwikhuung'aasie mwitse, khung'aane okhurula tsimbeka tsiosi mwitse mwisabo liokhukhola omusango eliemurecheshelanga. Liakhabe lisabo likhongo khubikulu bia Isiraeli, ne mwakhalieyo inyama nimunywa amalasire.

¹⁸Mwakhalie inyama yemilambo chiabelihe, nimunywa amalasire kabaruchi beshialo. Abo boosi bakhasinzwe shinga abasinza amamiiku, nende ebimeeme, nende tsimbusi, nende tsing'ombe tsisurusi etsianera etsia Bashani.

¹⁹Ne mwisabo liokhukhola omusango liemurecheshelanga inywe elo, mwakhalie amasinya nimwikura, khandi mwakhanywe amalasire nimumeela.

²⁰Mwisabo omwo, mwakhalie inyama yetsifarasi nende eya abatsiilushilangakhwo, eya abelihe bamaani nende eya abakhupani betsimbia tsiosi.’ Nolwa isie OMWAMI Nyasaye emboola.”

²¹OMWAMI Nyasaye yamboolela ari, “Ndakhalolesie oluyali lwanje habulafu hakari wamahanga, nende okhubamanyia shinga olwa ndikhoonyelanga obunyali bwanje okhukhola obukhalachi bwanje bwahabwene.

²²Aboluyia lwa Isiraeli bakhamanye mbu isie nisie OMWAMI Nyasaye wabwe, okhurula khunyanga eyo nende tsinyanga tsilondakhwo.

²³Ne amahanga kandi kakhamanye mbu aboluyia lwa Isiraeli bayilwa mubuhambe khulwobumayanu bwabwe abeene, okhuba baakhaya, khulweshio ndabeebala nebahaana mubunyali bwabasuku babwe, nabo nibeerwa boosi mwihe.

²⁴Ndabakholera akakhoyele obumayanu nende eshifwabwi shiabwe, mana nebeebala.

²⁵“Khulweshio isie OMWAMI Nyasaye emboola mbu, ndakhakalusilie aboluyia lwa Yakobo tsikhabi, nende okhubalolela tsimbabasi aboluyia lwa Isiraeli boosi. Ne ndakhakhole imbalikha khulwa eliira lianje litakatifu.

²⁶Olwa bakhamenye mushialo shiabwe nomulembe nabulaho yesi yesi oubariisia, bakhebilile eshifimbwa murwe nende obukhayi bwabwe bwabaakholela.

²⁷Olwa ndakhabe nebakalusiiye okhurula mumahanga kandi mwabasuku babwe bamenyanga, nolwa abamahanga amanji ako bakhamanye mbu endi omutakatifu.

²⁸Nolwa abandu banje bakhamanye mbu isie nisie OMWAMI Nyasaye wabwe, okhuba nisie owabayila mumbohe, khandi nebakhung'aasia nende okhubakalusia mushialo shiabwe abeene. Shindaakhaleshekhwo omundu kata mulala mumahanga ako tawe.

²⁹Ndakhasundulile abandu ba Isiraeli roho wanje, ne shindakhabeebalekhwo khandi tawe. Nolwa isie OMWAMI Nyasaye emboola.”