Read wanga EZEKIELI 4 Bible Online

EZEKIELI 4 - wanga bible

EZEKIELI 4

¹Nyasaye naboola ari, “Mwana womundu, bukula litofwari olirecheshe imbeliwo. Ong'olekhwo eshilolelo shielitookho lia Yerusalemu shinga olwa lili.

²Mana ong'olekhwo olukoba lwelisiisi nilulibotokhaane. Ong'olekhwo tsikambi tsiabelihe nende emiyini chiokhulikulula nichilibotokhaane liosi.

³Mana obukule olukaraya lweshibia olubambalifu olurechesheho okhuba lisiisi hakariwo nende litookho. Oshiukhane ohenje litookho elilolekhanga shinga eliseerirwe elo, otsie olibotokhane. Shino shilaba eshilolelo khuboluyia lwa Isiraeli.

⁴“Mana khandi otsie wiyalisilie omukhonokwo omukhasi. Tsinyanga tsiosi tsiolaba nokonile orio, olaba niwituushile obwonooni bwosi bwabandu ba Isiraeli shinga omusiko omusiro.

⁵Okhuba oletuukha obwonooni bwabwe khulwa tsinyanga ebikhumi bitaru namakhumi shienda, etsihelaana nende emiyika chieshinyasio shiabwe. Ne buli khunyanga oletuukha eshinyasio shiomuyika mulala.

⁶Olwa olaba nomalile okhuusia tsinyanga etsio, bulaano khandi oleyalisilia khumukhono musaatsa niwituushile obwonooni bwabandu boluyia lwa Yuda. Olaba orio khulwa tsinyanga amakhumi kane, ne buli khunyanga ndala oletuukha eshinyasio shiomuyika mulala.

⁷“Olunyuma, olashiukhana nohenga mwitookho lia Yerusalemu elibotokhaanwe khulwa okhuseerwa. Olanyiila omukhonokwo khulio nolirumbulila aketsa okhuliikholekhwo.

⁸Ndalakhuboha khumikoye oleshe okhushiukhanakhwo okhurula khulubeka lulala nohenga khulubeka lundi, okhuula olwa tsinyanga tsiobuseerwi tsilaba nitsihwele.

⁹“Obukule ingano, ishayiri, amakanda, tsing'ooli, obule nende amabele, obire biosi mushindu shilala, mana okaasie shiokhulia okhurula khubio. Eshio nishio eshilaba eshiokhuliashio lwolaba niwiyalisiye khulwa tsinyanga ebikhumi bitaru namakhumi shienda etsio.

¹⁰Eshiokhuliashio okhuula shilachelungwa eshihela tsifuusi tsibili buli inyanga. Nawe olaliitsanga lulala lwonyene khunyanga.

¹¹Amaatsi kolanywetsanga koosi okhuula kalachelungwa khushichelo. Olanywetsanga amaatsi eshisanda shilala khunyanga.

¹²Olateekhanga eshiokhulia eshio abandu nibalola, niwikhoonyela omulilo kubwanilwe okhurula khumafwi kabandu, ne olashilitsanga shinga oulia eliandaasi.”

¹³OMWAMI Nyasaye niyamboolela ari, “Nolwa abandu ba Isiraeli bakhaliitsenje ebiokhulia biabwe biomusilo nibali mumahanga kandi ka ndakhabayilemwo.”

¹⁴Nasi nemboola endi, “OMWAMI Nyasaye, isie okhurula obwana bwanje eshili okhwifwabiakhwo tawe. Eshili okhuliakhwo inyama yeisolo yifwile eyene, eyirirwe netsisolo nabulimo tawe. Khandi eshili okhuliakhwo inyama yomusilo tawe.”

¹⁵Mana niyamboolela ari, “Bulano olekhoonyela amasingo keing'ombe mushilenje shiamafwi kabandu khulwa okhuteekha eshiokhuliashio.”

¹⁶Khandi nameeta okhumboolela ari, “Mwana womundu, ndalasasia ebiachi biosi bieshiokhulia mwitookho lia Yerusalemu. Abandu bamwo balaliitsanga muburi ebiokhulia bichelilwe. Khandi balanywetsanga muburi amaatsi kachelilwe.

¹⁷Ndalakhola endio kho mbu, baleshe okhuba nende eshiokhulia nende amaatsi. Kho balahenganangakhwo abeene khu beene nibahenda emioyo nende okhung'aha emibili, khulwa obwonooni bwabwe.”