Read wanga EZEKIELI 40 Bible Online

EZEKIELI 40 - wanga bible

EZEKIELI 40

¹Khunyanga yekhumi yomwesi kwambeli mumuyika kwamakhumi kabili na chiraano, nikhuli mubuhambe, okwali omuyika kwekhumi nakhane olunyuma lwokhusasibwa khwelitookho lia Yerusalemu, obunyali obwa OMWAMI Nyasaye bwanzitsamwo,

²mana nendi mwilolelo, OMWAMI Nyasaye yambukula niyambila Isiraeli khushikulu eshirambi muno. Ndalola imbeli wanje tsinzu etsialolekha shinga litookho.

³Olwa yambilayo, ndalola omundu owang'inang'ina shinga omukasa. Yali natiilile omukoye kweikitani kwokhuchela mumukhono, khandi yali nende likata liokhuchela, naye omwene yali nasinjiile hashilibwa.

⁴Mana omundu oyo niyamboolela ari, “Mwana womundu, rechelesia obulayi khandi ohulile obulayi mana orekhwo omwoyo okhukhola kenzia okhukhumanyia, okhuba niko akachilile norerwa hano. Okhuula okhurumbulile abandu ba Isiraeli koosi akolola.”

⁵Habwene yaho, ndalola Ihekalu niyabotokhanwa nelisisi elwanyi. Omundu oyo yabukula omukoyekwe kwokhuchela okwali kwoburambi buhela tsimita tsitaru, ne nachela lisiisi elo. Oburambi bwalio bwali tsimita tsitaru, ne obubambalifu bwalio bwali tsimita tsitaru.

⁶Mana natsia hashilibwa shielubeka lwebukwe, ne nanina khumaninilo kashio, niyoola khubutenje. Ne nachela oburambi bweshilibwa eshio okhutsia hasi, obwali tsimita tsitaru.

⁷Khwaliho khandi nebisika biabalindi mutsimbeka, buli shilala khubio shiali noburambi bwetsimita tsitaru nende obubambalifu tsimita tsitaru khandi. Obubambalifu bwelisiisi liebisika ebio bwali tsimita tsibili neinusu. Hambeli webisika biabalindi ebio bwaliho obwiyangu obuchoomile khushirookoola shiobwinjililo bweihekalu, obuhela tsimita tsitaru.

⁸Yachela lisiisi lieshirookoola eshio, ne oburambi bwalio bwali tsimita tsine.

⁹Khandi nachela obubambalifu bwalio, nabwo bwali obuhela imita ndala. Ne olubeka lwomukari lwobwinjililo obwo, lwali ahambi muno nende Ihekalu.

¹⁰Ne khu buli olubeka lweshilibwa shiebukwe, khwaliho nebisika biabalindi bitaru. Ebisika ebio biosi biali ebihelana. Oburambi nende obubambalifu bwamasiisi kabio bwali obuhelana.

¹¹Mana omundu tsana oyo nachela obuchikha bwobwiyangu bwomubwinjililo. Obuchikha obwo bwali tsimita tsisasaba neinusu. Obwiyangu bwosi obwali hakari webilibwa bwali tsimita tsirano.

¹²Imbeli webisika biabalindi ebio khwaliho nomushingachi, oburambi bwakwo bwali tsisentimita amakhumi karano ne obubambalifu bwakwo bwosi khandi bwali tsisentimita amakhumi karano. Ebisika ebio biali nibihelana oburambi nende obuchikha obwali tsimita tsitaru khu tsitaru.

¹³Mana omundu oyo nachela oburambi bwobwinjililo okhurula inyuma weshisika shilala okhuula inyuma weshisika shindi aha obwiyangu bwokhubirira bwali, bwali tsimita ekhumi na tsibili nende inusu.

¹⁴Eshisika eshiali eshiokhumalilikha nishio eshiali shiokhwinjila mulwanyi. Khandi nachela eshisika eshio, obubambalifu bwashio bwali tsimita ekhumi.

¹⁵Okhurula hambeli weshilibwa okhuula khushisika shiokhumalilikha khwali ne tsimita amakhumi kabili natsirano.

¹⁶Khwaliho nende amatirisha amatiiti khumasiisi kelwanyi webisika ebio biosi nende khandi mumasiisi komukari akali hakari webisika. Khwaliho namashindu kabotokhana amasiisi komukari akahenga habwinjililo.

¹⁷Mana omundu oyo, niyayila mulwanyi lwebulafu lwa Ihekalu. Khwaliyo nende ebisika amakhumi kataru ebiabotokhana lisiisi liebulafu, ne imbeli webisika ebio khwali nende obweelu bwamachina.

¹⁸Obweelu obwo bwali nibwaalwa okhububotokhana obwinjililo okhulondokhana nende oburambi bwo bwinjililo, obwo bwali obweelu bwa haasi.

¹⁹Mana omundu oyo khandi nachela oburambi bweinjila yokhurula mulwanyi lwomukari niyitsia elwanyi wolwanyi lwebulafu. Injila eyo yali tsimita amakhumi karano.

²⁰Khandi khwaliho neshilibwa eshiahenga elubeka lwemasaba wolwanyi lwebulafu, eshiokhwinjila mulwanyi lwebulafu, ne nachela oburambi nende obubambalifu bwashio.

²¹Khwaliho nende ebisika bitaru biabalindi buli khulubeka lwobwinjililo. Lisiisi liali hakari wabio. Eshirookoora shiabio shiali eshihelana oburambi nende obubambalifu nende ebirookoola bieshilibwa shielubeka lwebukwe. Oburambi bweinjila eyo yoosi bwali tsimita amakhumi kabili natsirano, ne obubambalifu bwali tsimita ekhumi natsibili neinusu.

²²Eshirokoola eshio, amatirisha nende emichooro chiemisaala chiamashindu biosi biali butswa shinga ebiali khushilibwa shiolubeka lwebukwe. Khandi khwaliho tsingasi musafu tsiokhuniina khushilibwa eshio. Nashio eshirokoola shiashio shiali nishiahenga mulwanyi.

²³Ne okhurula habwinjililo bweshilibwa shiemasaba nende olwanyi olwo, khwaliho nende injila yokhwinjila mulwanyi lwomukari, shinga butswa eyali elubeka lwebukwe. Omundu oyo yachela oburambi bwokhurula khushiliibwa okhutsia khushindi bwali tsimita amakhumi karano (50 m).

²⁴Omundu oyo yanzimilila okhutsia elubeka lwemulambo, weshilibwa shiemulambo shiali. Yachela tsisiilo tsiashio nende olwanyi lwashio, biali butswa ebihelaana nende ebiebiliibwa bia ndali nenduutsi.

²⁵Eshiliibwa eshio shiali namatirisha khutsimbeka tsiosi, nende khumasiisi kolwanyi lwashio, shinga olwa akebiliibwa bindi kali. Oburambi bwashio bwali tsimita amakhumi kabili natsirano, nabwo obuchikha bwashio bwali tsimita ekhumi natsibili neinusu.

²⁶Kaliho amaninilo musafu akabaninilangakhwo nibatsia khushio. Eshirookola shiobwinjililo shiali mukari mwashio. Shiali nishiang'oolwakhwo emishindu khumasiisi komukari washio. Omushindu mulala buli khulubeka weinjila yokhwinjilamwo.

²⁷Shialiho eshiliibwa khulubeka lwemulambo wolwanyi lwomukari. Naye nachela okhurula khushiliibwa okhuula khushindi oburambi buhela tsimita amakhumi karano olubeka lwene olwo.

²⁸Mana niyanzinjisia mulwanyi lwomukari okhubirira mushiliibwa shiemulambo. Nachela eshiliibwa shiemulambo tsana, shiosi shiali eshihelaana nebiliibwa bindi ebio.

²⁹Ebisika biabalindi biashio, tsisiilo tsiashio nende amasiisi kashio biosi biali ebihelaana nebiliibwa bindi ebio, khandi khumasiisi kashio, amatirisha kalikhwo. Oburambi bwashio bwali obuhela ahambi tsimita amakhumi kabili natsirano, nabwo obuchikha bwashio tsimita ekhumi natsibili neinusu.

³⁰Ebirookoola biali khutsimbeka tsiosi tsiobwinjililo, ebioburambi buhela hambi tsimita ekhumi natsibili neinusu, nende obuchikha tsimita tsibili neinusu buli shilala.

³¹Eshisika shiashio shiachooma mulwanyi lwebulafu, ne shiali nishiang'oolwakhwo emishindu khutsisiilo tsiashio, khandi shiali namaninilo munane kokhutikulushilakhwo okhuula khushiliibwa eshio.

³²Mana omundu oyo niyanzimilila okhuula mulwanyi lwomukari khulubeka lwebukwe, ne nachela eshiliibwa. Shiali butswa nishihelana nende ebia yali naranjiliile okhuchela.

³³Ebisika biashio, tsisiilo nende eshirookoola shiashio biali nibihelana nende ebindi bia yali naranjilile okhuchela. Shiali namatirisha khutsimbeka tsiosi tsiamasiisi kashio nende khubirookoola biashio. Oburambi bwashio bwali tsimita amakhumi kabili natsirano, nabwo obuchikha tsimita ekhumi natsibili neinusu.

³⁴Eshirookola shiashio shiachooma mulwanyi lwebulafu, ne shiali nishiang'oolwakhwo emishindu khutsisiilo tsiashio, omushindu mulala buli khulubeka. Khandi shiali namaninilo munane.

³⁵Mana niyambila khushiliibwa shiemasaba, ne nashichela. Shiali nishihelaana nende ebindi bia yali naranjiliile okhuchela.

³⁶Ebisika biashio biomundulo, tsisiilo nende eshirookoola shiashio, biali ebihelaana nende ebia yali naranjiliile okhuchela. Ne shiali nende amatirisha khumbeka tsiashio tsiosi. Oburambi bwashio bwali obuhela hambi tsimita amakhumi kabili natsirano, nabwo obuchikha hambi tsimita ekhumi natsibili neinusu.

³⁷Eshirookoola shiashio shiachooma mulwanyi lwebulafu, ne shiali nishiang'oolwakhwo emishindu khutsisiilo tsiashio. Omushindu mulala buli khulubeka weinjila yokhwinjilamwo. Shiali namaninilo munane kokhutikulushilakhwo.

³⁸Shialiho eshisika shindi eshiali nomuliango hashirookoola shiokhwinjilila mushiliibwa, aha emiruko chiomusango omusambe chiosilibungwa.

³⁹Ne hashirookoola shiobwinjililo bweshiliibwa, tsialiho tsimeesa tsibili elubeka nelubeka, khutsimeesa okhwo, emiruko chiomusango omusambe, omusango kwokhurusiakhwo obwonooni nende omusango kweshikha chiasinzilungwakhwo.

⁴⁰Ne, elwanyi weshirookoola, habwinjililo weshiliibwa shiemasaba, tsialiho tsimeesa tsibili, khandi tsimeesa tsindi tsibili tsiali khulubeka lundi lweshirookoola shiobwinjililo obwo.

⁴¹Tsimeesa tsine tsiali mukari weshiliibwa, ne tsimeesa tsindi tsine tsiali ebulafu washio, halala tsiali tsimeesa munane, khutsimeesa okhwo, emiruko chiokhumala emisango chiasinzilungwakhwo.

⁴²Khandi tsialiho tsimeesa tsine tsiamachina amabaatse, etsiokhukholelakhwo emisango emisambe, etsiali nobubambalifu nende obuchikha obuhela tsisentimita amakhumi musafu natsirano, ne oburambi tsimita amakhumi karano okhurula hasi okhuula hekulu. Ebiokhusinzila emiruko chiebihanwa nende chiemisango biabikhungwa khutsimeesa etsio.

⁴³Tsialiho tsisako tsiokhwachikhakhwo ebindu, buli ndala eyihela oburambi imita ndala, khutsimbeka tsiosi tsiamasiisi. Inyama yemisango yabikhungwa khutsimeesa.

⁴⁴Mana niyambila mulwanyi lwomukari. Ebweneyo bialiyo ebisika bibili, shilala khulubeka lwemasaba nishichoomile khulubeka lwemulambo, neshindi khulubeka lweshiliibwa shiemulambo nishichoomile khulubeka lwemasaba.

⁴⁵Mana niyamboolela ari, “Eshisika shichoomile emulambo shino, neshia abesaaliisi abakhalabananga muhekalu,

⁴⁶nashio eshichoomile emasaba eshio, neshia abesaaliisi abakhalabananga hashimalilo shiemisango. Abesaaliisi abo nibo abolwibulo olwa Zadoki, bo bonyene muluyia lwa Lawi, nibo abafuchililwa okhusita ahambi nende OMWAMI Nyasaye nibamukhalabanila.”

⁴⁷Mana omundu oyo nachela olwanyi lwomukari, nalwo lwali oluhela oburambi tsimita amakhumi karano, nabwo obuchikha tsimita amakhumi karano, lwali niluhelaana tsimbeka tsialwo tsiosi. Ne eshimalilo shiemisango shiali imbeli weihekalu.

⁴⁸Mana niyanzimilila okhuula mushirookoola shia Ihekalu, nachera tsisiilo tsiashio, nishirula tsimita tsibili neinusu elubeka nelubeka. Ne obubambalifu bweshiliibwa bwali obuhela hambi tsimita musafu. Nako amasiisi khutsimbeka tsieshiliibwa kali akahela hambi imita ndala neinusu, akasinjila elubeka nelubeka.

⁴⁹Oburambi bweshirookoola bwali obuhela tsimita ekhumi, obuchikha bwashio tsimita tsisasaba. Khandi kaliho amaninilo ekhumi okhutikulukha notsia khushirookoola tsana. Tsialiho tsisiilo tsibili, ndala khu buli olubeka lweshilibwa.