Read wanga EZEKIELI 41 Bible Online

EZEKIELI 41 - wanga bible

EZEKIELI 41

¹Mana niyanzinjisia mushisika shiomukari, habundu hatakatifu, nachela obwinjililo bwokhutsia mukari, nabwo bwali obuhela tsimita tsitaru obuchikha.

²Obuchikha bwobwinjililo bwali tsimita ekhumi, nako amasiisi ketsimbeka tsiabwo kali tsimita tsibili neinusu elubeka nelubeka. Nachela oburambi bwobwelu obwo, bwali tsimita amakhumi kabili, nabwo obuchikha bwabwo bwali obuhela tsimita ekhumi.

³Mana niyenjila mushisika shiomukari, nachela obwinjililo bwokhutsia mukari, nabwo bwali obuhela imita ndala, nabwo obuchikha bwabwo bwali tsimita tsitaru. Amasiisi ketsimbeka tsiobwinjililo kali akahela tsimita tsitaru neinusu.

⁴Nachela obuchikha bweshisika eshio, bwali obuhela hambi tsimita ekhumi. Eshisika eshio shiali imbeli wobwelu bwa hakari. Mana niyamboolela ari, “Hano niho habundu hatakatifu muno.”

⁵Mana omundu oyo nachela obubambalifu bwelisiisi lia Ihekalu, nabwo bwali obuhela hambi tsimita tsitaru. Khwisiisi tsana khwalikhwo nebisika khu tsimbeka tsiosi tsia Ihekalu ebiali nobubambalifu obuhela tsimita tsibili.

⁶Ebisika ebio biali khukorofa yetsinzu tsitaru, ne buli inzu khukorofa eyo yali nebisika amakhumi kataru. Lisiisi lielwanyi lia Ihekalu buli khunzu yokhukorofa eyo, liali linyelele okhushila elia inzu ya hasi wayo, kho mbu ebisika ebio biralile nibilekha okhwileeta khwisiisi elia Ihekalu.

⁷Lisiisi elia Ihekalu elo, nolihenga okhurulila mumbafu walio, lialolekha okhuba nobubambalifu buhelana okhurula hasi okhuula ikulu. Mumbafu wa Ihekalu, elubeka welwanyi wetsinzu etsio khwaliho netsingaasi tsibili tsiokhuninilakhwo okhuula khunzu yeikulu khukorofa eyo.

⁸Mana nendola Ihekalu tsana, nayo yali niyibotokhaanwe nomukuru okuchinguushile khu tsimbeka tsiayo tsiosi. Omuse kwebisika ebiachibotokhana kwali nobubambalifu obuhela tsimita tsitaru.

⁹Nabwo obubambalifu bwelisiisi lielwanyi liebisika bwali obuhela hambi tsimita tsibili neinusu. Obwiyangu obwali nibwalekhwa obukhaya hakari webisika ebia Ihekalu,

¹⁰nende ebisika biabalindi bwali bwobuchikha buhela tsimita ekhumi khu tsimbeka tsiosi tsielisiisi.

¹¹Khwaliho nemiliango chibili khubisika biokhundulo. Mulala kwahenga khulubeka lwemasaba nakwo okundi khulubeka lwemulambo. Ne hakari womuse nende ebisika biabesaaliisi, khwaliho nobwiyangu obwobubambalifu obuhela tsimita tsibili neinusu khu tsimbeka tsia Ihekalu tsiosi.

¹²Omumbakho okwahengana nende Ihekalu khulubeka lwomumbo kwali nende obuchikha obuhela tsimita amakhumi kataru natsirano, nende oburambi obuhela tsimita amakhumi kane natsirano. Nalio lisiisi liakwo liali elihela tsimita tsibili neinusu mububambalifu okhukubotokhana kwosi.

¹³Mana omundu oyo nachera oburambi bwa Ihekalu khulubeka lwelwanyi wayo, bwali obuhela tsimita amakhumi karano. Okhurulila namukuru wa Ihekalu, nobirira khubwiyangu bwokhutsiilakhwo okhuula khundulo wayo khulubeka lwamumbo, oburambi bwayo bwosi bwali obuhela tsimita amakhumi karano.

¹⁴Obuchikha bweimbeli wa Ihekalu, halala nende obwiyangu obwali khu buli olubeka lwayo, bwali obuhela hambi tsimita amakhumi karano.

¹⁵Mana omundu oyo nachera oburambi bwomumbakho okwo okhuula khulubeka lwa Mumbo, halala nende obwinjililo elubeka nelubeka, tsimita amakhumi karano. Eshisika shiokhwinjilila muhekalu, eshisika shiomukari, halala nende habundu hatakatifu muno.

¹⁶Biali nibiakasibwa okhurula khu tsimbao okhuchaachila khubwelu okhuula khumatirisha. Ne amatirisha ako kekalungwa.

¹⁷Ne khubwiyangu bwomukari wa Ihekalu, hekulu wamasiisi, okhuula hekulu wemiliango, bali nibatswaniakhwo ebibaatse

¹⁸ebifwanana nende emishindu nende ebilonje bietsimbaha. Ebibaatse biemishindu nende ebilonje ebio bialondananga buli shilala khu shindi

¹⁹obweni bwashio bwomundu bwahenga omushindu okwali elubeka ndala, nabwo obweni bwashio obweitalanyi imbuukha bwahenga omushindu okwali elubeka undi. Ebilonje ebio biali birio okhubotokhana Ihekalu yosi.

²⁰Okhurula hasi khubwelu okhuula hekulu womuliango, emifwano chiebilonje bietsimbaha nende echiemishindu chiali nichiasiirwa khwisisi.

²¹Emishingachi chiemiliango chiobweru bwa Ihekalu chiali echihelaana. Imberi wa habundu hatakatifu shialiho eshindu eshialolekha shinga

²²eshimalilo shiemisango eshiakasilibwa emisaala, eshiali imita ndala neinusu okhurula hasi, imita ndala muburambi, khandi imita ndala obuchikha bwashio; tsimbeka tsiashio tsiosi halala nende eshisina shiashio biosi biakasibwa okhurula khumusaala. Niyamboolera ari, “Yino niyo imesa eyisinjilanga imberi wa OMWAMI Nyasaye.”

²³Obweru halala nende habundu hatakatifu biosi biali nemiliango chibiri.

²⁴Buli omuliango kwali nende ebitonye bibiri, ebiakwikushilangakhwo.

²⁵Khumiliango chia habweru bialikhwo ebilonje bia tsimbaha nende ebia emishindu, shinga ebiali nibiasarwa khumasisi; ne shialiho eshiinikha eshiakasilibwa tsimbao halwanyi ebulafu.

²⁶Khandi kaliho amatirisha akanyala okhwikalwa nende emisaala chiemishindu tsimbeka tsiosi habwinjililo bwolwanyi olwo.