Read wanga EZEKIELI 42 Bible Online

EZEKIELI 42 - wanga bible

EZEKIELI 42

¹Mana omundu oyo niyanzinjisia mulwanyi lwebulafu, niyambila okhuula khumumbakho elubeka lwemasaba wa Ihekalu, ne niyanzinjisia mubisika khubisika ebiali nibiahengana nolukaka lwa Ihekalu nende omumbakho okwali elubeka lwemasaba.

²Oburambi bwomumbakho kwemasaba wali tsimita amakhumi karano, nabwo obuchikha bwakwo tsimita amakhumi kabili nende tsirano.

³Okhurula khushianyi shia tsimita ekhumi eshiahengana nende olwanyi lwa mukari, ne nibihengaane nende injira yalwo, ebisika ebio biacherekhana shilala khushindi okhuula tsigorofa tsitaru.

⁴Imberi webikoro ebio yaliho injira elubeka lwa mukari, tsimita tsirano mububambalifu nende tsimita amakhumi karano muburambi, ne emiliango chiayo chiali elubeka lwemasaba.

⁵Ebikoro bia khugorofa ikulu biali ebitiyikhu, okhuba bialikhwo ehale inyuma okhuyomba ebia igorofa yahasi nende eyakhabili.

⁶Okhuba biosi biali khutsigorofa tsitaru, ne shibiali nende ebiyindi shinga ebiali khulwanyi olwa ebulafu ta. Khulweshio ebisika ebia igorofa yeikulu bialikhwo inyuma okhurula hasi okhuyomba ebia igorofa ya hasi nende ya hakari.

⁷Lialiho lisisi ebulafu eliabotokhana ebisika tsana, nilichomile khulwanyi lwebulafu, nilifutariire ebisika ebio, elia oburambi bwali tsimita amakhumi kabili nende tsirano.

⁸Okhuba ebisika ebiali khulwanyi lwebulafu biali tsimita amakhumi kabili nende tsirano muburambi, nabio ebiali nibifutariire Ihekalu biali tsimita amakhumi karano muburambi.

⁹Hasi webikoro bino bwaliho obwinjililo obwarulirira olubeka lwebukwe, noruliire mulwanyi lwebulafu.

¹⁰Obubambalifu bwobwinjililo obwo bwaliimana halala nende lisisi liolwanyi lwebulafu. Elubeka lwemulambo, ahahengaane nolwanyi olukhaya nende omumbakho okwo, bialiho ebisika

¹¹nende obwinjililo imberi wabio; biali shinga ebisika bielubeka lwemasaba, ebia biahelaana ninabio muburambi nende obuchikha, nemiliango chiokhurulilamwo, obuloosie nende obwinjililo obwafwanana.

¹²Kho obwinjililo bwelubeka lwemulambo bwarulirira khubulia obwali nibwahengana ninabwo, elubeka lwebukwe, okhulondoola khwisisi eliachachilaho.

¹³Mana niyamboolera ari, “Ebikoro biemasaba nende biemulambo ebihengaane nende olwanyi olukhaya nibio ebisika ebitakatifu, omwa abesaaliisi abasita ahambi khu OMWAMI Nyasaye balaliilanga emisango emitakatifu muno, mubwene omwo balabiikhangamwo emisango echishira obutakatifu omusango okwimele, omusango kwobwonooni nende omusango kweshiuku, okhubeera ni habundu hatakatifu.

¹⁴Olwa abesaaliisi beenjira mushisika eshitakatifu, shibalarulamwo okhutsia mulwanyi lwebulafu nibarashiayinia ebifwalo ebia befwalanga nibakhalabana tawe, okhuba bio ni ebitakatifu; balefwala ebiifwalo bindi nibashiiri okhutsia ebulafu wabandu bali.”

¹⁵Olunyuma lwokhuchela mukari mweshianyi eshia Ihekalu, yanyimilila okhurula erwanyi okhubirira mushiliibwa eshihenjile ebukwe, ne nachela olwanyi olwa Ihekalu okhubotokhana.

¹⁶Nachela olubeka lwebukwe nende likata liokhuchela, tsimita ebikhumi bibili nende amakhumi karano okhulondokhana nende likata tsana.

¹⁷Mana nashiukhana nachela olubeka lwemasaba, tsimita ebikhumi bibili nende amakhumi karano khwikata liokhuchera.

¹⁸Mana nashiukhana nachela olubeka olwa emulambo, tsimita ebikhumi bibili nende amakhumi karano, okhulondokhana nende likata liokhuchela.

¹⁹Mana nashiukhana olubeka lwa mumbo, ne nachela, tsimita ebikhumi bibili nende amakhumi karano, khwikata eliokhuchela elio.

²⁰Yachichera tsimbeka etsio tsine. Yali nende lisiisi eliachibotokhana, tsimita tsimia tsibili nende amakhumi karano muburambi khandi ebikhumi bibili nende amakhumi karano obuchikha, okhwahukhasia habundu hatakatifu nende halia ahalali hatakatifu.