Read wanga EZEKIELI 43 Bible Online

EZEKIELI 43 - wanga bible

EZEKIELI 43

¹Mana niyarera khushiliibwa, eshiliibwa eshiahenga ebukwe.

²Ne habwene yaho, oluyali lwa Nyasaye wa Isiraeli lwali nilwitsanga okhurula ebukwe; oluyoka lwalwo lwali shinga oluyoka lwa amaatsi amanji; nashio eshialo nishiakha khulwa oluyali olwo.

³Lilolelo eliandalola liafwana shinga lilolelo lilia elia ndali nendutsi olwa yetsa okhumulula litookho, nende khandi shinga lilolelo elia ndali nendutsi hamuchela kwa Kebari; mana nindikhupa hasi mafumama.

⁴Olwa oluyali olwa OMWAMI Nyasaye lwenjila muhekalu okhubirira mushiliibwa eshihenjile ebukwe,

⁵roho niyanjinga ikulu, niyanzinjisia mubwelu bwamukari, ne oluyali lwa OMWAMI Nyasaye lwetsula muhekalu.

⁶Olwa omundu oyo yali nashisinjiile ninasi, ndahulila omundu nalebe naboolanga ninasi okhurula muhekalu.

⁷Niyamboolela ari, “Mwana womundu, hano niho habundu aheshifumbi shianje shiobwami khandi ahokhuseena ebilenje bianje, aha ndalamenyanga mubandu banje ba Isiraeli inziayo. Inzu ya Isiraeli shiyilionoonia eliira lianje litakatifu khandi tawe, babe bo noho abaruchi babwe, okhubirira mubwilaasi bwabwe, nende khumilambo chiabaruchi babwe olwa bafwa.

⁸Olwa bakhola obwelu bwabwe okhuhengana nende obwelu bwanje nabio ebiyindi biabwe okhuhengana nebiyindi bianje, nikhwahukhasibwa nende lisisi lionyene, bali nibonooninjia eliira lianje litakatifu nebisinyo biabakholanga. Khulweshio ebamuluule mwiruma lianje.

⁹Bulano lekha bare abanyasaye babwe nende emilambo chiabaruchi babwe ehale ninasi, nasi ndalamenya hakari wabwe inziayo.

¹⁰“Nawe iwe, mwana womundu, wibaalile inzu ya Isiraeli aka Ihekalu yino, lekha bachele omufwano kwayo; mbu bafiimbwe omurwe khulwa obumayanu bwabwe.

¹¹Olwa bafiimbirwa omurwe kalia koosi aka bakholile, bamanyie omufwano kwa Ihekalu, obuloosie bwayo, oburulilo nende obwinjililo bwayo, nende obukondo bwayo bwosi akalachilisibwa khuyo koosi nobuloosie bwayo nende amalako kayo koosi; mana obihandiche hasi nibalola, mbu bahulile nibalonda omufwano okwo kwosi nende akalachilisibwa khuyo.

¹²Lino nilio lilako lia Ihekalu: obutenje bweshikulu nende mumbali mwashio mwosi omushibotokhaane mulaba omushira obutakatifu. Lino nilio lilako elia Ihekalu.”

¹³Bino nibio ebichelo bieshimalilo shiemisango, bilaba shinga ebichelo ebia Ihekalu: eshisina shiashio shilaba tsisentimita amakhumi karano muburambi khandi tsisentimita amakhumi karano mububambalifu, nolulika lwetsisentimita amakhumi kabili nende tsirano okhushibotokhana hamurwe. Buno nibwo obulaba oburambi bweshimalilo shiemisango:

¹⁴Okhurula hasi weshimalilo shiemisango okhuula khululika lwemwalo, imita ndala, obubambalifu bwashio tsisentimita amakhumi karano; okhurula khululika olwo okhuula khululika lwemukulu tsimita tsibili, nende obubambalifu bwetsisentimita amakhumi karano.

¹⁵Ne habundu aha okhusambila omusango bwene hali tsimita tsibili okhurula khushimalilo shiemisango shiokhutsia ikulu, tsinzika tsine, tsisentimita amakhumi karano buli lulala.

¹⁶Habundu aha okhusambila emisango halahelaana tsimbeka tsiosi, tsimita tsisasaba buli elubeka.

¹⁷Olulika lwosi lulahelaana tsimbeka tsialwo tsine, tsimita tsine oburambi khandi obubambalifu, nomushingaachi kwetsisentimita amakhumi kabili nende tsirano mububambalifu okhulubotokhana, ne eshitonye shia hasi eshilubotookhana tsisentimita amakhumi karano. Amaniinilo kashio kalachooma ebukwe.

¹⁸Mana niyamboolela ari, “Mwana womundu, kano niko aka OMWAMI Nyasaye aboola: Akalachilisibwa khushimalilo shiemisango ngakano: Khunyanga eyo eya shisinjisilibwakhwo khulwa okhusambilwakhwo emisango nokhumitswakhwo amalasile,

¹⁹olabahelesia abesaaliisi Abalawi bolwibulo lwa Zadoki, abasitanga ahambi ninasi okhukhalabanila, nolwa OMWAMI Nyasaye aboola, ihunwa khulwa omusango kwobwonooni.

²⁰Ne olabukulakhwo khumalasile kayo, niwoha khutsinzika tsine tsieshimalilo, nende khutsikona tsine tsieshichibi, nende khumushingachi okhukubotookhana; nindio olashisiiya noshitisa.

²¹Khandi olabukula ihunwa yomusango kwobwonooni, ne yilasambilwa habundu halobole aha muhekalu, ebulafu wa habundu hatakatifu.

²²Khunyanga yakhabili olamala omusango kwa ikhole eyibula obulema, kwobwonooni; nashio eshimalilo shiemisango shilasiiywa, shinga olwa shiasiiywa nende okwa ihunwa.

²³Olunyuma lwokhushisiiya, olakhola omusango kwa ihunwa eyibula obulema, nende okwa limiiku elibula obulema ebia mubiayo.

²⁴Olabireera imbeli wa OMWAMI Nyasaye, nabo abesaaliisi balabimiitsakhwo omunyu nibabikholela Omwami Nyasaye shinga omusango omusambe.

²⁵Olakhola omusango kwobwonooni, okwa imbusi buli nyanga khutsinyanga musaafu; okhumetakhwo, ihunwa nende limiiku ebirula mubiayo, ebibula obulema, bilahaanwa.

²⁶Khulwa tsinyanga musaafu, balatisa eshimalilo shiemisango nibashisiiya, kho bashiahule.

²⁷Olunyuma lwetsinyanga estio okhuwa, khunyanga yomunaane okhutsililila, abesaaliisi balakhola khushimalilo emisango chienywe emisambe, nemisango chienywe chiokhureera omulembe; nasi ndalabafuchilila, nolwa OMWAMI Nyasaye aboola.”