Read wanga EZEKIELI 44 Bible Online

EZEKIELI 44 - wanga bible

EZEKIELI 44

¹Mana niyangalusia khushiliibwa shiebulafu weihekalu, eshihenjile ebukwe; ne shiali nishiikaale.

²OMWAMI Nyasaye niyamboolela ari, “Eshiliibwa shino shilatsililila okhwikalwa, shishilekulwakhwo tawe. Ne abulaho oulenjililamwo, okhuba isie OMWAMI Nyasaye, Nyasaye wa Isiraeli ndinjililemwo; khulweshio shilatsililila okhwikalwa.

³Omuruchi weshialo yenyene niye ounyala okhwikhalaho okhulia eshiokhulia eshitakatifu imbeli wanje, shichila ye nomuruchi. Akhoyile okhwinjila nende okhurulila mushirokoola shili hashiliibwa yaho.”

⁴Mana omundu oyo niyambisilia mushilibwa shiemasaba niyambila imbeli weihekalu. Ndahenga, ne nendola Ihekalu eya OMWAMI Nyasaye niyitsuule oluyali lwa OMWAMI Nyasaye. Mana nengwa hasi mafumama.

⁵OMWAMI Nyasaye niyamboolela ari: “Mwana womundu, otiile obulayi amakhuwa kano, ohenje, orecheresie nohulila obulayi koosi aka nditsa okhukhuboolela okhulondokhana nende akalachilisibwa khuhekalu eyo. Omanyilisie obulayi nibabo wina abafuchililwa okhwinjila muhekalu ne nibabo wina abalafuchililwa ta.

⁶Boolela oluyia lwa abandu abakhayi, olwa Isiraeli mbu, kano niko aka isie OMWAMI Nyasaye emboola, inywe aboluyia lwa Isiraeli, leshe akebisinyo bienywe.

⁷Mwafwabiye Ihekalu yanje khulwa okhufuchilila abarende, abasinde, nende abandu abalanzinamilanga ta okhwinjila muhekalu yanje olwa muba nimuhanilanga emisango chiamasinya nende amalasile. Khulweshio inywe mwafunache indakano yanje khulwa akebisinyo kenywe ako koosi.

⁸Mushilenje shia inywe okhukhalabanila habundu wanje hatakatifu mwaleshela abandu bamahanga kandi okhukhalabana habundu hatakatifu.

⁹Khulweshio isie OMWAMI Nyasaye emboola mbu, abulaho omundu omurende noho omusinde oulanzinamilanga ta oulafuchililwa okhwinjila habundu wanje hatakatifu.”

¹⁰OMWAMI Nyasaye yamboolela ari, “Ndalahelesia Abalawi eshinyasio, abashiama nibandekha nibalimaana halala nabandu ba Isiraeli okhwinamila ebifwanani.

¹¹Balakhalabana butswa khulwa okhulinda khubilibwa bieihekalu yanje indakatifu nende okhukhalabana muhekalu. Balasinza emiruko chiabandu bahanila khulwa omusango omusambe, halala nende okhukhalabanila abandu.

¹²Nebutswa khulwa okhuba bemilila abandu ba Isiraeli okhwinamila ebifwanani, nibabakhola okhukwa mubwonooni, isie OMWAMI Nyasaye nditsuba mbu, okhuula ndalabahelesia eshinyasio.

¹³Shibalaakhalabanilakhwo shinga abesaaliisi, noho okhutiilakhwo khubindu bianje ebitakatifu, kata okhwinjilakhwo habundu wanje hatakatifu muno ta. Nebutswa balafwimbwa omurwe khulwa akebisinyo akabakhola.

¹⁴Kata kario balaba khubulindi bweihekalu nende okhukhalabana emilimo chindi chiosi chiomuhekalu.”

¹⁵OMWAMI Nyasaye yamboolela ari, “Abesaaliisi aboluyia lwa Lawi, abolwibulo lwa Zadoki, abatsiililila okhuukhalabanila mubwisikwa muhekalu yanje olwa Abaisiraeli bashiama nibandekha, nibo abalatsiililila okhuukhalabanila nende okhuuhanila emisango chiamasinya nende amalasile.

¹⁶Bo bonyene nibo abalenjila muhekalu yanje indakatifu nibaakhalabanila khushimalilo shiemisango shianje.

¹⁷Olwa benjila mubiliibwa biolwanyi lwomukari, balefwala ebiifwalo bieikitani. Shibalefwalakhwo eshifwalo shiobwoya shiosi shiosi olwa bakhalabana mulwanyi lwomukari, noho kata muhekalu bwene tawe.

¹⁸Balefwala ebilemba beikitani khumwirwe chiabwe, nende ebifwalo beikitani mubishienje biabwe. Nebutswa shibalebohakhwo mubishienje biabwe eshindu shiosi shiosi eshibareerera oluuya ta.

¹⁹Ne olwa barula elwanyi nibatsia ewa abandu bali, okhuula befwalule ebifwalo biobukhalabani ebio mana babibiishe mubisika ebitakatifu. Mana befwale ebifwalo bindi, kho mbu abandu baleshe okhwireerera amasila khulwa okhutiila khubifwalo ebio.

²⁰Abesaaliisi shibalebekakhwo liiswi khumirwe chiabwe, kata okhulilekha lirambiye tawe. Habula balalitumakhwo butswa.

²¹Omwisaaliisi yesi yesi shialanywakhwo idivai olwa yenjila mulwanyi lwomukari tawe.

²²Omwisaaliisi yesi yesi shialateshiakhwo omukhasi omulekhwa, kata owalekhana nomusaatsawe tawe. Habula ateshie butswa omukhaana omushisila womuluyia lwa Isiraeli, noho omukhasi omulekhwa womusaatsawe yali omwisaaliisi.

²³Abesaaliisi okhuula bechesie abandu banje obwahukhani buliho hakari webindu ebitakatifu nende ebilali ebitakatifu ta, khandi okhuula babamanyie okhwahukhasia hakari webindu biomusilo nende ebisiikhu.

²⁴Aha obuyingani buli, abesaaliisi balabakhalachilanga eshiina okhulondokhana namalako kanje. Balalindanga amalako nende amebaalo kanje mutsinyanga tsiamasabo kanje amahule. Khandi balalindanga tsinyanga tsianje tsieisabato indakatifu.

²⁵Omwisaaliisi shiakhoyile okhwifwabiakhwo omwene khulwokhutiila khu mulambo ta, okhuyiniakhwo nikuli okwa samwana, okwa nyina, kwomukhaana wabwe, kwomusiani wabwe noho kwomukhaana oushili okhutsia olukhasi.

²⁶Ne olunyuma lwokhwifwabia, alamala tsinyanga musafu, kho abe omusiiyikhu khandi.

²⁷Ne khunyanga yaba natsia mulwanyi lwomukari lweihekalu indakatifu, khulwokhukhalabana habundu hatakatifu, akhoyile okhukhola omusango kwobwonoonibwe kho mbu abe omusiiyikhu. Nolwa isie OMWAMI Nyasaye emboola.

²⁸Abesaaliisi shibalabakhwo nobulaame bwosi bwosi tawe, shichila isie nisie obulaame bwabwe. Khandi mulabahelesiekhwo omukabo kwosi kwosi ta, okhuba isie nisie omukabo kwabwe.

²⁹Balaliitsanga khubiomusango kweimele, okwobwonooni nende khubiomusango kwokhuyiiniakhwo eshikha. Ne buli shindu eshiahule mushialo shia Isiraeli shilabetsanga eshiabwe.

³⁰Ebichese ebilayi khu bichese biambeli bietsimbia tsiosi nende ebihanwa ebilayi khubihanwa bietsimbia tsiosi bilabetsanga ebia abesaaliisi. Buli olwa muteekha omukaate, okhuula mubahelesie omukaate kwambeli, kho mube netsikhabi munzu tsienywe.

³¹Abesaaliisi shibalaliakhwo linyonyi noho isolo eyifwile butswa eyene noho eyirirwe neisolo yashie tawe.”