Read wanga EZEKIELI 45 Bible Online

EZEKIELI 45 - wanga bible

EZEKIELI 45

¹“Olwa mukabula omukabo kweshialo shia Isiraeli, okhuula mwahule eshitonye shilala eshitsa okhuba eshiahule khulwa OMWAMI Nyasaye. Eshitonye eshio oburambi bwashio okhuula bube tsikilomita ekhumi natsibili neinusu, nabwo obubambalifu bwashio bube tsikilomita ekhumi. Habundu yaho hoosi halaba hatakatifu.

²Okhurula khumukabo okwo, mubukule eshitonye eshihela oburambi tsimita ebikhumi bibili namakhumi karano nende obuchikha tsimita ebikhumi bibili namakhumi karano, shibe shiahabundu hatakatifu. Olwanyi olushibotokhana lube tsimita ebikhumi bibili namakhumi karano.

³Ne mushitonye shiahabundu hatakatifu eshio mukari, muchele eshitonye eshihela oburambi tsikilomita ekhumi natsibili neinusu nende obuchikha obuhela tsikilomita tsirano, eshio shilaba habundu wanje hatakatifu muno.

⁴Eshio nishio eshiakhabe omukabo omutakatifu kweshialo eshio; shiakhabe eshitonye eshiabesaaliisi, abakhalabanilanga OMWAMI Nyasaye muhekalu. Nimwo omwabakhombashe tsinzu tsiabwe nende Ihekalu.

⁵Eshitonye shindi eshio eshioburambi buhela tsikilomita ekhumi natsibili neinusu nende obuchikha buhela tsikilomita tsirano shilaba eshiabalawi abakhalabananga muhekalu. Bakhombashemwo amatookho kabwe akokhumenyamwo.

⁶Khandi muchele eshitonye shindi eshiahule eshihela oburambi tsikilomita ekhumi natsibili neinusu nabwo obuchiikha bwashio bube tsikilomita tsibili neinusu, eshio shilaba eshiomundu yesi yesi owoluyia lwa Isiraeli okhumenyamwo.”

⁷“Ne omuruchi alahebwa eshitonye shili elubeka lwebukwe nende lwomumbo weshitonye eshitakatifu. Eshitonye eshio elubeka lwomumbo shilatsililila okhuula khunyanza ya Hakari. Ne elubeka lwebukwe shilatsililila okhuula khulwakho lwebukwe. Eshitonye eshio shilahelana oburambi nende obuchikha bwashio nende eshitonye shiemikabo chiaboluyia lwa Isiraeli.

⁸Okwo nikwo okulaba omukabo kwomuruchi mu Isiraeli. Ne omuruchi shialasandiakhwo khandi abandu banje tawe; nebutswa aleshe aboluyia lwa Isiraeli bakabane eshialo eshio okhulondokhana nende tsimbia tsiabwe shinga olwa tsili.”

⁹“Isie OMWAMI Nyasaye emboola mbu, inywe abaruchi ba Isiraeli, mwakhakhola obwonooni khulwa oluhoono muno. Muleshe amahababa nende okhusandia abashienywe. Mukhole akahabwene khandi akobulunjishi. Muleshe okhulonda abandu banje okhurula mushialo shiabwe, nolwa isie OMWAMI Nyasaye emboola.

¹⁰“Buli omundu okhuula yekhonyele tsiratili nende ebindu bienywe ebiamwikhoonyelanga okhuchela imele nende amafura habwene.

¹¹Indubi yokhuchela imele okhuula yihelaane nende omukopo kwokhuchelamwo amafura. Omukopo mulala nende indubi ndala ebihelaana bilaba eshitonye shielikhumi eshia eshimwelo.

¹²Khulwa okhuchela obusiro, amachina amakhumi kabili ketsisio kalahelaana nende ishekeli ndala, natsio tsishekeli amakhumi karano tsilaba imina ndala.

¹³“Ebichelo biomusango kwa mulakholanga bilaba biri nanwa; eshitonye shiakhasasaba shieindubi yeingano nende eshimwelo shilala shieishayiri.

¹⁴Nashio eshichelo shiamafura shilaba shiri nanwa, ilita okhurula khu buli ikori ndala, (ikori ndala yihelaana nende eshimwelo shilala ebihelaana nende tsindubi ekhumi).

¹⁵Khandi mu buli lituuli liamakondi ebikhumi bibili, balahana likondi elala okhurula khu buli oluyia olwa Isiraeli. Balahana bario khulwa emisango chieimele, echiokhusambwa nende echiokhukaasia omulembe, kho mbu baleshelwe obwonooni bwabwe. Nolwa isie OMWAMI Nyasaye emboola.

¹⁶Abandu ba Isiraeli boosi okhuula bahelesie omuruchi wa Isiraeli ebindu bino khulwa okhukhola omusango.

¹⁷Kulabetsanga omulimo kwomuruchi okhureera ebiokhukhola emisango emisambe, echieimele nende echiokhutsushiilila khu tsinyanga tsikhulundu tsiamasabo akomwesi omutoro tsie Isabato nende tsiamasabo koosi amaahule kaboluyia lwa Isiraeli. Omuruchi alareeranga ebiokhukhola omusango kwokhurusiaho obwonooni, omusango kweimele, kwokhusamba nende kwokhukaasia omulembe, khulwa okhurusiaho obwonooni bwa boluyia lwa Isiraeli.”

¹⁸“Isie OMWAMI Nyasaye emboola mbu, khunyanga yambeli yomwesi kwambeli, mulabukulanga ing'ombe ihunwa eyibulakhwo obulema bwosi bwosi, mana musiiya Ihekalu yanje.

¹⁹Omwisaaliisi alabukulangakhwo amalasile matutu khukomusango kwokhurusiaho obwonooni mana abakha khubiyindi bieihekalu, nende khutsimbeka tsiosi tsine tsiokhundulo weshimalilo shiemisango, nende khubitiisi biokhushiliibwa shiolwanyi lwomukari lweihekalu.

²⁰Khandi mulakholanga murio khunyanga yomusaafu ya buli mwesi, khulwa omundu yesi yesi owitsukhana niyonoonile noho niyonoonile obulamanya ta. Mulakholanga murio khulwa okhusiiya Ihekalu.

²¹Khunyanga yekhumi nakhane yomwesi kwambeli mulakholanga lisabo lia Pasaka. Mana khulwa tsinyanga musaafu mulalitsanga emikaate chibulamwo limela.

²²Khunyanga eyo, omuruchi alareeranga ing'ombe ihunwa, khulwa omusango kwokhurusiaho obwonooni bubwe omwene nende bwabandu ba Isiraeli boosi.

²³Mana buli khunyanga khutsinyanga musaafu tsielisabo etsio, alandeereranga isie OMWAMI Nyasaye tsihunwa musaafu, nende amamiiku musaafu, ebibulakhwo obulema bwosi bwosi khulwa okhuukholela omusango omusambe. Khandi alandeereranga imbusi ikhole khulwa okhuukholela omusango kwokhurusiaho obwonooni.

²⁴Khandi alareeranga imele indubi ndala khulwa buli ihunwa, nende imele indubi ndala khulwa buli limiiku, nende amafura ilita khulwa buli indubi ndala yeimele.

²⁵Ne khulwa lisabo liamatili, elichakanga khunyanga yekhumi nakharano, yomwesi kwomusaafu, nende khulwa tsinyanga musaafu tsielisabo elo, omuruchi alareeranga ebihaanwa bilala ebio khulwa okhukhola omusango kwokhurusiaho obwonooni, omusambe, kweimele nende kwamafura.”