Read wanga EZEKIELI 46 Bible Online

EZEKIELI 46 - wanga bible

EZEKIELI 46

¹“Isie OMWAMI Nyasaye emboola mbu, eshiliibwa shiolwanyi lwomukari eshiahenga elubeka lwebukwe, shileekalungwa tsinyanga tsisasaba tsiokhukhola emilimo; nebutswa khunyanga yeisabato nende khunyanga yelisabo liomwesi omutoro, shileekulungwa.

²Omuruchi alabiriranga mulwanyi lwelwanyi niyenjilila mushiliibwa shiomushisika shiomukari. Ne yetsa okhusinjilanga ahambi nende isiilo yeshiliibwa. Abesaaliisi balamukholelanga omusangokwe kwokhusamba, nende okwokhukaasia omulembe. Ne nali hashiliibwa yaho alenamilangaho OMWAMI Nyasaye, mana arula natsia elwanyi, nebutswa eshiliibwa shilatong'anga nishikuushe okhuula khungoloobe.

³Buli khunyanga yeisabato nende yomwesi omutoro, abandu ba Isiraeli balenamilanga OMWAMI Nyasaye habwinjililo bweshiliibwa eshio.

⁴Buli khunyanga yeisabato omuruchi alakholelanga OMWAMI Nyasaye omusango omusambe, nakwo kulabetsanga ebimeeme biamakondi bisasaba nende limiiku, biosi shibilabakhwo nobulema bwosi bwosi ta.

⁵Ne khu buli limiiku arere halala nomusango kweimele okuhela indubi ndala, nebutswa omusango kweimele khulwa ebimeeme ebio kulabetsanga shinga olwa anyalilwa. Khu buli omusango kweimele alareranga halala nende ilita ndala yamafura.

⁶Khunyanga yelisabo liomwesi omutoro alakholanga omusango kwa ihunwa ndala, ebimeeme bisasaba nende limiiku, biosi bibe ebibulakhwo obulema bwosi bwosi.

⁷Khulwa omusango kweimele, okhuula omuruchi ahaane khu buli ihunwa nende buli limiiku, indubi yeimele, nebutswa khulwa ebimeeme biamakondi ebio ahaane butswa shinga olwa anyalilwa. Ne khu buli indubi yeimele okhuula ahaane ilita ndala yamafura.

⁸Olwa omuruchi yenjila, alenjililanga mushirookoola eshili mushiliibwa, mana khandi arulila khunjila ndala ya yenjililekhwo eyo.

⁹“Olwa abandu ba Isiraeli baletsanga okhwinamila OMWAMI Nyasaye khutsinyanga tsiamasabo amakhulundu, buli owinjilila mushiliibwa shiemasaba okhuula alarulile mushiliibwa shiemulambo. Naye owinjilila mushiliibwa shiemulambo, okhuula arulile mushiliibwa shiemasaba. Omundu shialakalushila mushiliibwa shia yenjililemwo tawe, buli omundu atsie shilunji narula elwanyi.

¹⁰Olwa abandu benjila, omuruchi yesi alenjilanga halala ninabo, ne olwa barula elwanyi, yesi alarulanga ninabo ario.

¹¹Khutsinyanga tsiamasabo nende tsiemilukha emikhulundu, mulahaananga khu buli ihunwa indubi yeimele, khu buli limiiku indubi yeimele, ne khulwa ebimeeme mulahaananga shinga olwa munyalilwa abeene. Ne khu buli indubi yeimele okhuula muhaane ilita yamafura.

¹²“Olwa omuruchi yeyinia okhuhaana omusango khulwa okhuchama, kube omusango omusambe noho kwokhukaasia omulembe shinga eshihaanwa khu OMWAMI Nyasaye, alekulilungwa eshiliibwa shiebukwe. Ne alakhola omusangokwe shinga butswa olwa akholanga khunyanga yeisabato. Mana alarula elwanyi, ne eshiliibwa eshio shikalwa.”

¹³“Isie OMWAMI Nyasaye emboola mbu, buli nyanga mumabwibwi mulahananga eshimeeme shielikondi eshiomuyika mulala eshibulakhwo obulema bwosi bwosi khulwa okhuukholela isie omusango omusambe. Okhuula mukholenje murio buli nyanga.

¹⁴Khandi buli nyanga mumabwibwi, okhuula mukholenje omusango kweimele, okulabetsanga eshitonye shiakhasasaba shieindubi yeimele, nende eshitonye shiakhataru shieilita yamafura kokhutsokasilia obusie, khulwa okhuukholela isie OMWAMI Nyasaye omusango kweimele. Okhuula mutiile lilako lino khulwa okhukhola omusango omusambe kwa buli lwosi.

¹⁵Eshimeeme shielikondi, obusie nende amafura okhuula bihaanwe buli nyanga mumabwibwi, khulwa omusango omusambe kwa buli lwosi.”

¹⁶“Isie OMWAMI Nyasaye emboola mbu, Omuruchi naba nahelesia mulala khubasianibe omukunda okhuba eshihaanwa okhurula khubulaamebwe, omukunda okwo kulaba omukabo kwomusiani oyo inziayo.

¹⁷Ne naba nahelesia mulala khubakhalabanibe omukunda okhurula khubulaamebwe, omukunda okwo kulaba kwomukhalabani oyo okhuula khumuyika kwobuleekhuulwi, ne kukalusilibwa omuruchi oyo. Omukunda okwo nokuukwe, ne ye nende abasianibe bonyene nibo abanyala okhutong'a ninakwo shinga obulaame bwabwe inziayo.

¹⁸Omuruchi shialanuulakhwo abandu obulaame bwabwe tawe. Omukunda okwakabulila abaanabe abasiani okhuula kurule khukwobulaamebwe omwene, kho mbu aleshe okhusandia abandu banje khulwa okhubukula omukunda kwabwe.”

¹⁹Mana omundu oyo niyambisilia mubwinjililo obwali elubeka lweshiliibwa, niyandeera khubisika ebitakatifu biabesaaliisi ebiali elubeka lwemasaba. Niyamanyia habundu khundulo wabio elubeka lwomumbo.

²⁰Mana niyamboolela ari, “Habundu hano, niho aha abesaaliisi balateshelangaho inyama yihaanwa khulwa omusango kwokhurusiaho eshikha nende okwokhurusiaho obwonooni, khandi niho aha balafumbukhangaho omusango kwobusie, kho mbu baleshe okhubirera ebulafu mulwanyi, kho abandu baleshe okhwikhola abomisilo khulwa okhutiila khushindu eshitakatifu.”

²¹Mana niyambila mulwanyi lwebulafu, ne niyanzimilila okhutsia mutsikoona tsine tsiolwanyi olwo, ne mu buli mukoona, olwanyi lundi olutiti lwaliyo,

²²mutsikoona tsine tsiolwanyi olwo, tsinyanyi tsindi tsindiiti tsialimwo, etsihela oburambi tsimita amakhumi kabili, nabwo obuchikha tsimita ekhumi natsirano, tsiosi tsine tsiahelaana.

²³Tsiosi tsiali nitsiabotokhanwa nelisiisi liamachina, ne hasi walio liali nilialonjelwakhwo amayika.

²⁴Omundu oyo niyamboolela ari, “Kano niko amayika kabakhalabani bomuhekalu balateshelangakhwo ebiabandu bareera khulwa okhukhola emisango.”