Read wanga EZEKIELI 47 Bible Online

EZEKIELI 47 - wanga bible

EZEKIELI 47

¹Mana omundu oyo niyangalusia habwinjililo bwa Ihekalu. Ne habwene yaho omuchela kwaliho okwafuutuukha okhurula mulwalo lwa Ihekalu nikukholomokha elubeka lwebukwe (okhuba Ihekalu yali niyahenga elubeka lwebukwe). Amaatsi ako kakholomokha okhurula hasi weshilibwa shiemulambo eshia Ihekalu nikatsia emulambo weshimalilo shiemisango.

²Mana niyarusia elwanyi okhubirira khunjila yeshilibwa shiemasaba. Niyambotokhasia khunjila yelwanyi okhuula khushilibwa shielwanyi eshiahenga elubeka lwebukwe, nako amaatsi kali nikakholomokhanga okhurula elubeka lwemulambo.

³Omundu oyo nali nomukoyo kwokhuchela mumukhonokwe, nachela oburambi tsimita ebikhumi birano (500 m) elubeka lwebukwe, ne niyanyambusia mumaatsi ako. Amaatsi ako nikoola mukhong'oosi yanje.

⁴Mana khandi nachela oburambi tsimita ebikhumi birano (500 m) elubeka lwebukwe niyanyambusia mumaatsi ako, amaatsi nikoola mumasikamo kanje. Khandi nachela oburambi tsimita ebikhumi birano (500 m), niyanyambusia mumaatsi ako. Amaatsi ako nikoola mushishienje shianje.

⁵Khandi nachela tsimita ebikhumi birano (500) ne yaho nikuba omwalo omukhongo okwa ndalanyala okhwambukha ta, okhuba amaatsi kali niketsuule muno. Amaatsi kali amanji komundu alanyala okhwambukha ta, habula khulwa okhwelema.

⁶Mana niyamboolela ari, “Omwana womundu, orecheresie nohulila obulayi amakhuwa kano.” Mana omundu oyo niyangalusia khulukuku lwomwalo okwo.

⁷Ne olwa ndolakhwo, ndalola emisaala eminji khu buli olukuku lwomwalo okwo.

⁸Mana niyamboolela ari, “Amaatsi kano kakholomokhanga nikatsia ebukwe, kalakholomokha okhuula mumuhololokho kwa Yorodani, mana katsie okhuula munyanza yomunyu. Olwa katsia munyanza yomunyu, kalakalukhasia amaatsi kayo nikekhola amalayi akokhunywa.

⁹Ne buli aha omwalo okwo kulabirira tsisolo nende tsinyeni tsietsimbia tsiosi tsilabaho. Omwalo okwo kulakalukhasia amaatsi ka inyanza yomunyu okhuba amaatsi amalayi kokhunywa. Ne buli aha kulabirira obulamu bulabaho.

¹⁰Abanaabi abetsinyeni balasinjila khutsinguku tsiako nibanaaba tsinyeni, ne okhurula Engedi okhuula Enegilaimu halaba habundu hokhwaala tsikhanda. Tsinyeni tsiako tsilaba etsia tsimbia tsinyinji lukano lukano shinga olwa tsili munyanza eya Mediterenia.

¹¹Nebutswa halutoyi nende halutende lwako shihalakholwa okhuba halayi ta, habula halatong'a namaatsi akomunyu.

¹²Ne khulukuku lwomwalo okwo emisaala echia tsimbia tsiosi khandi chia okhuhaana ebiokhulia chilakhulakhwo. Amasafu kachio shikalanialakhwo kata ebiamo biachio okhuchweyakhwo okhwama ta. Emisaala echio chilaama ebiamo biachio ebiungu buli khumwesi, shichila amaatsi kakwo karulanga muhekalu. Ebiamo biachio bilaba eshiokhulia nako amasafu kachio kalaba indesi.”

¹³OMWAMI Nyasaye aboola ari, “Tsino nitsio tsinzakho etsia muliloonda olwa mulikaba eshialo khutsimbia ekhumi natsibili tsia Isiraeli. Nebutswa oluyia lwa Yosufu lulinyoola emikabo chibili.

¹⁴Okhuula mulikabula ebitonye ebileng'anile. Shino nishio eshialo eshia ndetsuba okhuhelesia abakuuka benywe, ne nishio eshiliba obulame bwenywe.

¹⁵Olwakho lweshialo lulaba luri nanwa: Elubeka lwa Emasaba lularula khunyanza ya Mediterenia okhubirila mwitookho lia Hetsiloni, okhuula khubwinjililo bwa Hamatsi mana lutsiililile okhuula Zededa.

¹⁶Okhurula yaho lulatsiililila okhuula Berotsa nende Sibraimu (elili hakari wa Damasiko nende Hamatsi), ne lutsiililila okhuula khwitookho elia Hezeri-hatikoni elili khu lwakho lwa Haurani.

¹⁷Kho nolwa olwakho lwelubeka lwemasaba lulaba lurio, okhurula khunyanza ya Mediterenia okhuula khwitookho lia Hazarienoni elili emasaba welitookho elia Damasiko nende emasaba ewa litookho lia Hamatsi. Hano halaba elubeka lwemasaba.

¹⁸Elubeka lwebukwe olwakho lulaba omwalo okwa Yorodani, nilutsiililila okhubirira hakari wa Haurani nende Damasiko, okhutsia okhuula Giliadi nende khushialo shia Isiraeli. Lulatsiililila lurio okhubirira elubeka lwebukwe lwa Inyanza yomumnyu okhuula Tamari.

¹⁹Olwakho elubeka lwemulambo lularula khwitookho lia Tamari nilutsiililila okhuula khumaatsi ka Meriba-kadeshi. Okhurula yaho lulatsia okhuula khu Inyanza ya Mediterenia, nilubirira ebukwe weshialo shia Misiri.

²⁰Elubeka olwa mumbo, olwakho lulaba Inyanza ya Mediterenia, ne lulatsiililila okhuula habundu ahahengane nende habwinjililo helitookho lia Hamatsi.

²¹“Kho nolwa mulakabana eshialo shino khutsimbia tsienywe tsia Isiraeli shinga olwa muli.

²²Mulashikabana khulwa okhukhupa ikha, mbu shibe obulame bwenywe nende bwabarende abamenya mwinywe khandi abebula abaana mwinywe. Abarende abo okhuula babe khwinywe shinga abebule abomubaana ba Isiraeli. Kho boosi okhuula bakhupe ikha khulwa okhunyoola obulame bwabwe mubetsimbia tsia Isiraeli.

²³Ne mu buli oluyia lwomurende amenyamwo, nimwo omwa mulamukabila obulaamebwe. Nolwa isie OMWAMI Nyasaye emboola.”