Read wanga EZEKIELI 48 Bible Online

EZEKIELI 48 - wanga bible

EZEKIELI 48

¹Kano niko ameera ketsimbia tsia Isiraeli nende omukabo kwabwe: Okhuchachila khulwakho lwemasaba, oluli khumuhanda kwa Hetsiloni okhuula khubwinjililo bweitookho lia Hamatsi okhuula khwitookho lia Hazarienoni (elili khulwakho lwa Damasiko nende Hamatsi, elubeka lwemasaba, nilutsiililila okhurula ebukwe okhuula mumbo), kulaba omukabo kwoluyia lwa Dani.

²Omukabo kulondokhana nende okwa Dani, okhurula elubeka lwebukwe okhuula mumbo, kulaba kwa Asheri.

³Oluyia lwa Nafutali nalwo lulanyoola omukabo kulondokhana nende okwa Asheri, okhurula elubeka lwebukwe okhuula Mumbo.

⁴Omukabo kuloonda khu kwa Nafutali, eluleka lwebukwe okhuula Mumbo, kulaba kwoluyia lwa Manase.

⁵Omukabo kuloonda khu kwa Manase, eluleka lwebukwe okhuula Mumbo, kulaba kwoluyia lwa Efuraimu.

⁶Omukabo kuloonda khu kwa Efuraimu, eluleka lwebukwe okhuula Mumbo, kulaba okwa kwoluyia lwa Rubeni.

⁷Omukabo kuloonda khu kwa Rubeni, elubeka lwebukwe okhuula Mumbo, kulaba kwoluyia lwa Yuda.

⁸Omukabo kuloonda khu kwa Yuda, muchele eshitonye eshihela oburambi tsimita ekhumi natsibili nabwo obuchikha bwosi bulaba obuhela burio okhurula elubeka lwebukwe okhuula Mumbo. Eshitonye eshio shilahelana nende omukabo kwa buli oluyia. Hakarikari weshitonye eshio niho aha Ihekalu yanje yakhombakhwe.

⁹Omukabo omwahule okwakhombakhwemwo Ihekalu yanje kulaba oburambi tsikilomita ekhumi natsibili neinusu nabwo obuchikha bulaba tsikilomita ekhumi.

¹⁰Abesaaliisi balanyoola omukabo kwabwe okhurula khumukabo omutakatifu okwo. Omukabo kwabwe okhurula elubeka lwebukwe okhuula Mumbo, kulaba tsikilomita ekhumi neinusu. Ne okhurula Emasaba okhuula Emulambo kulaba tsikilomita tsirano. Ihekalu yanje yakhabe hakarikari wakwo.

¹¹Omukabo kuno kulaba kwabesaaliisi bolwibulo lwa Zadoki, abakhalabani banje abesiikwa, ne shibaakholakhwo obwonooni olwa Abaisiraeli bonoona shinga olwa Abalawi bakhola tawe.

¹²Omukabo kuno kulaba omukabo kwabwe omwahule okhurula khumukabo omwahule muno, halaba habundu hatakatifu muno, ahalondokhana nende olwakho lwa Abalawi.

¹³Nabo Abalawi, omukabo kwabwe kulaba khulubeka lwemulambo womukabo kwabesaaliisi. Omukabo okwo okhurula khulubeka lwebukwe okhuula lwomumbo oburambi bwakwo kulaba tsikilomita ekhumi natsibili neinusu, ne obuchikha bwakwo okhurula khulubeka lwemasaba okhuula Emulambo kulaba tsikilomita tsirano.

¹⁴Eshitonye shiosi shiosi shiomukabo okwo shishilakusibwakhwo noho okhuhelesibwa omundu yesi yesi ta, shichila nomukabo omutakatifu okwa OMWAMI Nyasaye. Nakwo nomukabo omulayi muno okhushila echindi chiosi mushialo.

¹⁵Ne, eshitonye shitonyile khushiomukabo omwahule eshioburambi obuhela tsikilomita ekhumi natsibili neinusu, nabwo obuchikha obuhela tsikilomita tsibili neinusu, shilaba shiabandu okhumenyamwo nende okhulimamwo. Ne litookho liakhabe hakarikari washio.

¹⁶Litookho elo liakhabe noburambi nende obuchikha obuhelana, buli olubeka lwakhabe oluhela tsimita ebikhumila bibili, ebikhumi bibili namakhumi karano (2,250 m).

¹⁷Eshitonye shiobuchikha buhela tsimita eshikhumi shilala, amakhumi kabili natsirano (125 m), shiakhabe khu buli olubeka lwelitookho elo.

¹⁸Ne eshitonye shitong'a olunyuma lwokhumbakhwa khwa Ihekalu, khulubeka lwemulambo weshitonye shiomukabo omutakatifu eshihela tsikilomita tsirano khutsikilomita tsibili neinusu khulubeka lwebukwe, nende tsikilomita tsirano khutsikilomita tsibili neinusu khulubeka lwomumbo, shiakhabe eshiobulimi. Abakhalabani bomwitookho bakharachenjemwo ebiokhulia biabwe.

¹⁹Omundu yesi yesi owoluyia lwosi lwosi owamenya mwitookho elo, anyala okhuraka ebiokhulia mushitonye eshio.

²⁰Khulweshio, omukabo kwolakaba, okweshitonye eshitakatifu nende okwelitookho, kwosi halala kulaba okuhela tsikilomita ekhumi natsibili neinusu khu tsimbeka tsiosi.

²¹Eshitonye shitong'a khutsimbeka tsiosi tsiomukabo omutakatifu nende khumukabo kwelitookho shilaba shiomuruchi. Oburambi bwashio bulaba obuhela tsikilomita ekhumi natsibili neinusu okhurula ebukwe okhuula mumbo. Ne eshitonye shiomukabo omutakatifu eshia Ihekalu yakhabe hakarikari washio,

²²halala nende eshitonye shiomukabo kwa Abalawi nende eshitonye shielitookho, bilaba hakarikari womukabo kwomuruchi. Eshitonye shiomukabo kwomuruchi shilaba hakari womukabo kwa Yuda nende okwa Benjamini.

²³Ne tsimbia tsindi tsitonyile tsilakabilwa omukabo kwatsio tsiri nanwa: Okhurula khulubeka lwebukwe okhuula Mumbo, kulaba kwoluyia lwa Benjamini.

²⁴Okuloonda khu kwa Benjamini, okhurula khulubeka lwebukwe okhuula Mumbo kulaba kwoluyia lwa Simoni.

²⁵Okuloonda khu kwa Simoni, okhurula khulubeka lwebukwe okhuula Mumbo kulaba kwoluyia lwa Isakari.

²⁶Okuloonda khu kwa Isakari, okhurula khulubeka lwebukwe okhuula Mumbo kulaba kwoluyia lwa Zebuluni.

²⁷Okuloonda khu kwa Zebuluni, okhurula khulubeka lwebukwe okhuula Mumbo kulaba kwoluyia lwa Gadi.

²⁸Eshitonye eshiloondakhana nende eshia Gadi, khulubeka lwemulambo olwakho lulatsia okhurula khwitookho lia Tamari okhuula khumaatsi ka Meriba-kadeshi, mana lulonde elubeka lwebukwe weshialo shia Misiri, okhuula khunyanza ya Mediterenia.

²⁹Okwo nikwo omukabo kwetsimbia tsia Isiraeli. Nolwa balakabwa emikabo chiabwe bario, buli oluyia nomukabo kwalwo. Nolwa isie OMWAMI Nyasaye emboola.

³⁰“Litookho lia Yerusalemu liakhabe nelisiisi eliakhabe nebiliibwa ekhumi nabibili ebiokhwinjila nende okhurulamwo. Elubeka wemasaba, lisiisi liakhabe lioburambi obuhela tsimita ebikhumila bibili, ebikhumi bibili namakhumi karano (2,250 m). Elubeka tsana eyo,

³¹biakhabeyo ebiliibwa bitaru, eshia Rubeni, eshia Yuda nende eshia Lawi.

³²Elubeka webukwe, lisiisi liakhabe lioburambi obuhela tsimita ebikhumila bibili, ebikhumi bibili namakhumi karano (2,250 m). Elubeka tsana eyo, biakhabeyo ebiliibwa bitaru, eshia Yosefu, eshia Benjamini nende eshia Dani.

³³Elubeka wemulambo, lisiisi liakhabe lioburambi obuhela tsimita ebikhumila bibili, ebikhumi bibili namakhumi karano (2,250 m). Elubeka tsana eyo, biakhabeyo ebiliibwa bitaru, eshia Simoni, eshia Isakari nende eshia Zebuluni.

³⁴Elubeka womumbo, lisiisi liakhabe lioburambi obuhela tsimita ebikhumila bibili, ebikhumi bibili namakhumi karano (2,250 m). Elubeka tsana eyo, biakhabeyo ebiliibwa bitaru, eshia Gadi, eshia Asheri nende eshia Nafutali.

³⁵Oburambi bwelisiisi elo tsimbeka tsiosi tsine bwakhabe obuhela tsimita ebikhumila shienda (9,000 m). Okhurula olwa leelo okhuula inziayo litookho elo, lilalangungwa mbu, ‘OMWAMI Nyasaye Ali Hano!’ ”