Read wanga EZEKIELI 5 Bible Online

EZEKIELI 5 - wanga bible

EZEKIELI 5

¹OMWAMI Nyasaye niyamboolela ari, “Mwana womundu, bukula olukanga olumemu, olwikhoonyele shinga olumwo okhwibeka omurwe netsindefutsio. Mana obukule iratili ochelekhwo liswilio mana olikabulemwo ebitonye bitaru.

²Eshitonye shilala shieliswilio elio, wakhashisambile hakari welitookho, olwa tsinyanga tsiokhubotokhanwa nabasuku tsiakhabe nitsihwele. Nashio eshitonye shindi wakhashitonyetonyemwo nolukanga nobotokhana litookho, nashio eshitonye shindi, wakhashisalaasie mumuyeka. Nasi ndalashitaafia nolukanga lwanje.

³Okhurula khwiswi elio, obukulekhwo litutu olikanyile mukanzuyo.

⁴Khandi obukulekhwo litutu khulio olifuube mumulilo liyie. Ne okhurula mwiswi elio omulilo kularulamwo okulamulula abandu boluyia lwa Isiraeli boosi pe.

⁵“Isie OMWAMI Nyasaye emboola mbu, nolwa kakhabe butswa kario khwitookho lia Yerusalemu. Ndalira hakari wamahanga kandi khandi liabotokhanwa namahanga kandi tsimbeka tsiosi.

⁶Nebutswa abandu balio bakhaya okhuhulila amebaalo kanje nibekhola abamayanu okhushila amahanga kandi, khandi bakhaya okhuhulila amalako kanje okhushila amahanga kababotokana. Abandu ba Yerusalemu bakhaya okhuhulila amalachilisio kanje nende okhulinda amalako kanje.

⁷Khulweshio isie OMWAMI Nyasaye emboola mbu, khulwa okhuba inywe muli abakhayi kata okhushila abamahanga kababotokhana, khandi mwakhaya okhuhulila nende okhulinda amalako kanje, mwakhola nende okhulonda amakhuwa kabandu bamubotokhana,

⁸ndakhamukhalachile eshiina imbeli wabamahanga abo.

⁹Khandi khulwa okhubeela ebikhole bienywe bieshisinyo ebio, ndakhamuhelesie eshinyaasio shieshili okhumuhelesikhwo, khandi eshia ndalalikalushilakhwo okhumuhelesia tawe.

¹⁰Khulweshio abebusi bakhalie abaana babwe nimurerekhwo tsimoni, nabo abaana bakhalie abebusi babwe. Ndakhamuhelesie eshinyaasio, ne abo boosi abakhehonokoshe okhufwa ndakhabasalaasie mu tsimbeka tsiosi tsieshialo.

¹¹Khulweshio, isie OMWAMI Nyasaye ouliho mwoyo, embetsubila nemboola mbu, ndakhabamulule mwesi pe, okhuba mwafwabia Ihekalu yanje khulwa ebikhole bienywe bieshisinyo nende obumayanu bwenywe. Shindakhamubeelekhwo tsimbabasi ta. Ndakhabamulule mwesi pe.

¹²Eshitonye shikhola khataru khwinywe shiakhafwe khulwa olumbe nende inzala mwitookho. Eshitonye shindi shiakhataru khwinywe shiakhafwile mwihe, nashio eshindi shiakhataru khwinywe ndakhashisalaasie nende okhushitaafia nolukanga.

¹³“Nolwa liruma lianje liakhamuhwelekhwo lirio, nasi nehutsulukha mumwoyo. Mana mwakhamanye mbu, nisie OMWAMI Nyasaye oubaheelesiye eshinyaasio khulwa okhubula obwisiikwa khwisie.

¹⁴Khandi ndakhamukwisie likunda nende okhumukhola okhutseshelelwa mumahanga kandi akamubotokhana, nende imbeli wa abandu ababira njila.

¹⁵Mwakhatseshelelwe nimufwimbibwa emirwe. Khandi mwakhabe eshilolelo shieimbuko mumahanga kamubotokhana olwa ndakhamuhelesie eshinyasio mwiruma lianje. Nolwa isie OMWAMI Nyasaye emboola.

¹⁶Olwa ndakhamulase nobuyingo bwanje obululu bweinzala, ndakhamulase khulwa okhubamulula. Ndakhamureerere inzala inyinji nende okhusasia ebiachi bienywe biosi.

¹⁷Ndakhamurumile inzala nende tsisolo nabulimo tsindulu okhumunuula abaana benywe boosi. Khandi ndakhamurumile olumbe, okhwiirwa nende okhubamulula nolukanga. Nolwa isie OMWAMI Nyasaye emboola.”