Read wanga EZEKIELI 6 Bible Online

EZEKIELI 6 - wanga bible

EZEKIELI 6

¹OMWAMI Nyasaye niyamboolela ari,

²“Mwana womundu, shiukhana ohenje elubeka lwebikulu bia Isiraeli mana orumbule akobulakusi nobafukula.

³Obaboolele mbu, isie OMWAMI Nyasaye emboola endi, ‘Inywe ebikulu bia Isiraeli, hulile akemboola.’ ” OMWAMI Nyasaye aboolela tsingulu, ebikulu, amahololokho nende amabanda ari, “Isie omwene ndakhareere olukanga nesasia habundu henywe hokhwinamila ebifwanani.

⁴Ebimalilo bienywe biemisango biakhasasibwe khandi habundu henywe hokhusambila obubane hakhasasibwe. Ndakhareere abandu benywe imbeli webifwanani bienywe.

⁵Ndakhasalaasie emilambo chiabandu ba Isiraeli imbeli webifwanani biabwe, khandi ndakhasalaasie amakumba kabwe khu tsimbeka tsiosi tsiebimalilo biemisango.

⁶Buli habundu aha mwakhamenye, amatookho kenywe kakhakwisibwe amakunda, khandi habundu henywe hokhwinamila ebifwanani hakhasasibwe, kho mbu ebimalilo bienywe biemisango biakhakwisibwe nibisaasakwa, nabio ebimalilo beiemisango chiobubane bienywe biakhasasibwe, ne biosi ebiamwakaasia biakhayinibweho.

⁷Abandu benywe bakhamululwe nabo abakhatonyeho bakhamanye mbu, isie nisie OMWAMI Nyasaye.

⁸“Nebutswa shindakhabamulule boosi pe tawe, ndakhaleshekhwo abandi khubo. Abandi bakhahonokoshe okhumululwa nibasalaana mumahanga kandi.

⁹Abakhahonokoshe bakhanzitsulile hakari wabandu bamahanga aka bakhayilwemwo shinga abahambe. Bakhanzitsulile shinga olwa ndabakhupa khulwa emioyo chiabwe echibula obwisiikwa khandi echiangalukhanakhwo. Khandi khulwa okhukhola akokhwenya khwabanyasaye babwe, okhulali okhwenya khwanje tawe. Khandi bakhahuchisibwe khulwa obwonooni nende ebikhole biabwe ebimayanu.

¹⁰Nolwa bakhamanye mbu, isie nisie OMWAMI Nyasaye, khandi mbu shindabariisijiakhwo butswa mbu enzia okhubareerera obusasishi tawe.”

¹¹OMWAMI Nyasaye yamboolela ari, “Khupa tsikhofi notuya eshilenje hasi noboola mbu, muli mushilaamo shiobubi inywe Abaisiraeli, khulwa obumayanu bwenywe, okhuba mwakhamululwe nolukanga, neinzala nende olumbe.

¹²Oyo ouli ehale yakhamululwe nolumbe, naye ouli ahambi yakhamululwe nolukanga. Naye owakhehonokoshe okhwiirwa yakhafwe khulwa inzala. Nolwa ndakhabamalilekhwo liruma lianje endio.

¹³Emilambo chiabwe chiakhandakalale hakari webifwanani biabwe biabotokhana ebimalilo biemisango biabwe, nende khubuli eshikulu eshirambi, khubutenje bwebikulu biosi, hasi wabuli omusaala omutendemu, nende hasi wa buli omusaala omuruba, nende hosi aha bakholelanga emisango echiokhuchamisia ebifwanani biabwe. Nolwa bakhamanye mbu isie nisie OMWAMI Nyasaye.

¹⁴Ndakhanyiile omukono kwanje nende okhusasia eshialo shiabwe shiosi pe. Okhurula khushitsiimi eshili emulambo okhuula khwitookho lia Ribula elili emasaba. Ndakhakwisie eshialo eshio shiosi likunda. Nolwa bakhamanye mbu isie nisie OMWAMI Nyasaye.”