Read wanga EZEKIELI 7 Bible Online

EZEKIELI 7 - wanga bible

EZEKIELI 7

¹OMWAMI Nyasaye yamboolela ari,

²“Mwana womundu, boolela abandu ba Isiraeli mbu, eshihesi shiabwe shimalile okhuula. Shimalile okhuulila tsimbeka tsieshialo shiabwe tsiosi.

³Eshihesi bulaano shiulile, khandi nditsa okhubarakhwo liruma lianje nende okhubakhalachila eshiina okhulondana nende injenda yabwe. Ndalabahelesia eshinyaasio khulwa ebikhole biabwe biosi bieshisinyo.

⁴Shindalabaleshelakhwo noho okhubabeela tsimbabasi tawe. Ndalabahelesia eshinyasio khulwa injenda yabwe, olwa ebisinyo biabwe bishiliho hakari wabwe. Nolwa bakhamanye mbu, isie nisie OMWAMI Nyasaye.

⁵“OMWAMI Nyasaye aboola mbu, amanyakhano kalamwitsila nikalondokhana! Lole, ketsanga.

⁶Eshihesi shitsile, shimalile okhuula, shimuuliile inywe, lole shiulile.

⁷Eshihesi shienywe shiulile, inywe abandu bamenyanga mushialo shia Isiraeli, ebise biulile, inyanga yili ahambi, inyanga yeindiri. Shiyilabakhwo eyokhuupa tsingalakala khubikulu tawe.

⁸Bulano endi hambi okhubamalilakhwo liruma lianje nende okhubakhalachila eshiina okhulondana nende ebikhole bienywe ebieshisinyo. Khandi ndalabahelesia eshinyaasio khulwa ebikhole biabwe bieshisinyo.

⁹Kata shindalabaleshelakhwo noho okhubabela tsimbabasi tawe. Ndalabahelesia eshinyaasio okhulondana nende ebikhole bienywe bieshisinyo kho mbu mumanye mbu, nisie OMWAMI Nyasaye oubahelesiye eshinyasio.

¹⁰“Lole, inyanga eyo yitsanga! Okhumululwa khwenywe khuulile, obukhalachi bwobubatsa nobunji mwinywe, isunga niyinyinji mwinywe.

¹¹Induli yimeeteeshe mwinywe niyikwa obumayanu. Abulaho khubo oulatong'aho, kata emiandu chiabwe chiosi, kata omundu yesi woluyali mubo shialatong'akhwoho tawe.

¹²Ebise bimalile okhuula, inyanga nayo yisutile hambi. Omukuli webindu shialekhoyakhwo ta, kata ouwasia alekhuulakhwo ta, okhuba oburuma obwa OMWAMI Nyasaye buli khubo boosi.

¹³Okhuba oukusia emianduchie shialayindila mbu khandi akalushe anyoole ebia yakusia ta, okhuba oburuma obwa OMWAMI Nyasaye buli khu buli mundu, ne shibularulakhwoho ta. Abandu abamayanu shibanyala okhuyindila tawe.

¹⁴“Olwika lumalile okhuupwa mbu berecheshe okhutsia mwihe, nebutswa abulaho kata mulala outsitsanga mwihe tsana ta. Okhuba OMWAMI Nyasaye yetsa okhubamalilakhwo boosi lirumalie.

¹⁵“Lihe lili ebulafu khumihanda, ne mumatookho kabwe olumbe neinzala nibio ebilimwo. Yesi yesi ourula ebulafu aleerwa nolukanga, naye ouli mwitookho aleerwa nolumbe nende inzala.

¹⁶Ne yesi yesi owihonokokha okhufwa, alaba mubikulu shinga amahusi komumabanda. Boosi balekhuula khulwa obwonooni bwabwe abeene.

¹⁷Emikhono chia buli mundu chilayiengukha nako amasikamo kabwe kalafwokoya.

¹⁸Balefwala ebifwalo biamakunia. Indenga nende tsisoni bilabatiila khandi balabeka emirwe chiabwe tsinyanda nibafwimbwa emirwe.

¹⁹Balafuuba ifetsa yabwe khumihanda nayo itsahabu yabwe yilaba shinga eshindu shiomusilo. Ifetsa yabwe nende itsahabu yabwe shibilabahonokosiakhwo khunyanga yoburuma obwa OMWAMI Nyasaye tawe. Shibilamalakhwo inzala yabwe kata okhubakhola okhwikura tawe. Okhuba nibio ebiachila nibakwa mubwonooni bwabwe.

²⁰Beehelesia oluyali lwa butswa khulwa ebisiayo biabwe, nibekaasilia ebifwanani nende ebindu biabwe bieshisinyo. Khulweshio ndalabikhola okhuba ebieshisinyo khubo.

²¹Ndalahelesia abandu bamahanga kandi obuyinda bwabwe. Khandi ndalalekha abandu abamayanu okhubayaaya obuyinda obwo nende okhubwonoonia.

²²Ndalashiukhana nebarulakhwo, kho mbu bonoonie Ihekalu yanje yolukoosi. Abanuuli balenjilamwo nibakholamwo keshifwabwi nende okhuchikwisia likunda.

²³Khulwa okhuba eshialo shiabwe shitsuulemwo obumayanu bwokhuraatsia eshitsayi, nalio litookho litsuulemwo akeinduli,

²⁴ndalabareerera amahanga amabi akalabenjilila nikabanuula tsinzu tsiabwe. Ndalakamia obunyali bwabwe bwabeyitsialilanga khandi ndalafwabia habundu habwe hatakatifu.

²⁵Olwa indenga yakhabatiile, bakhakhaabe omulembe, nebutswa shibakhakunyoole tawe.

²⁶Amasila kakhabakwile nikalondokhana. Amakhuwa amabi kakhabetsele nikalondokhana. Bakhakhaabe amalolelo okhurula khubalakusi nebutswa shibakhakanyoole tawe, kata amechesio shikakhanyooleshe okhurula khu besaaliisi noho obuchetsiyi okhurula khubakofu tawe.

²⁷Omuruchi yakhekhuule, omwana womuruchi yakhafwe omwoyo nabo abandu bakhatechele khulwa indenga. Ndakhabakholele okhulondokhana nende injenda yabwe, khandi ndakhabakhalachile eshiina okhulondakhana nende obukhalachi bwabwe. Nabo bakhamanye mbu isie nisie OMWAMI Nyasaye.”