Read wanga EZEKIELI 8 Bible Online

EZEKIELI 8 - wanga bible

EZEKIELI 8

¹Khunyanga yakharano yomumwesi kwa khasasaba, mumuyika kwa khasasaba nikhuli mubuhambe, olwa ndali nindikhaale munzu yanje, nabo abemilisi ba Yuda nibekhaale imbeli wanje, obunyali obwa OMWAMI Nyasaye bwanzitsamwo.

²Mana nihenga ne nindola eshilonje eshiafwana shinga omundu. Okhurula mushishienjeshie okhuula hasiwe yalolekha shinga omulilo. Ne okhurula mushishienjeshie okhuula khumurwekwe, yalolekha shinga omukasa okung'inang'ina.

³Mana nanyiila eshindu shinga omukhono natiila liswi liokhumurwe kwanje. Mana Roho wa Nyasaye niyanjinga hekulu hakari weshialo nende likulu, niyambila Yerusalemu neshili mwilolelo elo. Niyanzusia mushiliibwa shiolwanyi lwomukari eshiahenga emasaba, ewa eshifwanani shiokhusinyisia Nyasaye shiali.

⁴Ne oluyali lwa Nyasaye wa Isiraeli lwaliho, ne lwali butswa shinga olwa ndali nendutsi mwilolelo mwibanda khumwalo kwa Kebari.

⁵Mana Nyasaye niyamboolela ari, “Mwana womundu, chinguula tsimonitsio ohenje elubeka lwemasaba.” Kho ninjinguula tsimoni tsianje nihenga olubeka lwemasaba, ne lola emasaba weshimalilo shiemisango shiali mubwinjililo, ndalolayo eshifwanani shiokhusinyisia Nyasaye.

⁶Mana Nyasaye niyareeba ari, “Mwana womundu, ololanga kebisinyo ebikhongo bia aboluyia lwa Isiraeli bakholanga habundu hano, nibambila ehale nende Ihekalu yanje? Ne kata kario witsa okhulola kebisinyo kandi amakhongo okhushila kano.”

⁷Mana niyandeera mubwinjililo bwolwanyi, ne olwa ndahenga ndalola omuluhu mwisiisi.

⁸Kho niyamboolela ari, “Mwana womundu, yaba mwisiisi,” Ne olwa ndayaba mwisiisi, ndalola omuliango.

⁹Naye niyamboolela ari, “Yinjilamwo, ololekhwo kebisinyo kamakana ka bakholangamwo.”

¹⁰Kho nindinjilamwo, ne nindola ebifwanani biebikukule biosi ebimoolanga hasi, nende ebietsisolo tsiomusilo tsietsimbia tsiosi, nende ebifwanani biosi ebia aboluyia lwa Isiraeli bali nibakhola, nibiang'oolwa khwisiisi.

¹¹Imbeli webifwanani ebio, abemilisi amakhumi musafu boluyia lwa Isiraeli bali nibasinjiileyo, ne Ja-azania, omusiani wa Shafani yesi yali nasinjiile mubo. Buli mulala yali natiilile eshikaye shiokhusambilakhwo obubani, nakwo omwosi kwobubani nikutuumuukhanga okhurula khububani tsana.

¹²Mana OMWAMI Nyasaye niyareeba ari, “Mwana womundu, oluutsi kabemilisi boluyia lwa Isiraeli bakholanga mabiswi? Buli omundu ali butswa mushisikashie shiebifwanani. Okhuba baboolanga bari, ‘OMWAMI Nyasaye shialolanga aka khukholanga ta. OMWAMI Nyasaye wayebala eshialo.’ ”

¹³Khandi niyamboolela ari, “Oshili witsa okhulola akebisinyo amakhongo kabakholanga.”

¹⁴Mana OMWAMI Nyasaye niyambila khushiliibwa shiolubeka lwemasaba we Ihekalu. Ne lola, abakhasi bali nibeekhale, nibeekhuulanga okhufwa khwomunyasaye Tamuzi.

¹⁵Mana niyareeba ari, “Mwana womundu, oluutsi amakhuwa ako? Oshili witsa okhulola akebisinyo kandi amakhongo okhushila akoluutsi ako.”

¹⁶Kho namala niyambila mulwanyi lwomukari lweihekalu. Ne lola, abandu basaatsa abahela amakhumi kabili nabarano, abali nibasinjiile hamuliango weihekalu, hakari weshirookoola nende eshimalilo shiemisango, nibafutariire Ihekalu nibenamilanga eliuba khu lubeka lwebukwe.

¹⁷Mana niyareeba ari, “Mwana womundu, oluutsi amakhuwa ako? Kata kario abandu ba Yuda bashilolanga butswa mbu akebisinyo kabakholanga shineshindu khubo ta. Betsusiye mushialo akeinduli nibameeta okhuusinyisia. Lolakhwo shinga olwa bekhaale yaho, baasinyile muno.

¹⁸Khulweshio ndalabahelesia eshinyasio eshikhongo. Shindalalekhakhwo omundu kata mulala ahonokoshe ta, khandi shindalabalolelakhwo tsimbabasi tawe. Kata nibaba nibahabila nomwoyo omukhongo, shindarecheresia okhuhaaba khwabwe tawe.”