Read wanga EZEKIELI 9 Bible Online

EZEKIELI 9 - wanga bible

EZEKIELI 9

¹Mana nembulila OMWAMI Nyasaye nalanjilisia nomwoyo omukhongo naboola ari, “Site ahambi hano inywe abetsa okhuhelesia litookho lino eshinyasio. Buli mundu yetse niyemanuule eshimanulwa mumukhonokwe.”

²Ne lola, abandu basasaba beetsa nibarulila khulubeka lweshilibwa shiemukulu, eshiahenga elubeka lwemasaba we Ihekalu. Buli omundu yali niyemanuule eshimanulwa shiokhumulula mumukhonokwe. Ne bali nende omusaatsa nafwalile ebifwalo bieikitani, nachinjile eshindu shiokhuhandichila mumukhonokwe. Mana boosi nibenjila muhekalu, nibasinjila hambi neshimalilo shiemisango shiomukasa.

³Mana oluyali lwa Nyasaye wa Isiraeli nilurula khushilonje shietsimbaha, niluchinguukha nilutsia khubwinjlilo bwe Ihekalu. OMWAMI Nyasaye nalanga omundu owali nafwalile ebifwalo bieikitani, ne nali neshindu shiokhuhandichila mumukhonokwe oyo.

⁴Mana OMWAMI Nyasaye namuboolela ari, “Tsia obirire mwitookho lia Yerusalemu liosi, nora eshibalikho khubweni bwabasaatsa babindanga nibalila khulwa akebisinyo kabakholamwo.”

⁵Khandi nembulila naboolela abandi ari, “Mumulondekhwo, mubure mwitookho liosi mwire abandu. Mulaleshekhwomwo omundu yesi yesi okhuhonokokha tawe, kata mulabalolelakhwo tsimbabasi tawe.

⁶Mwiire abasaatsa abakofu habwene nahabwene, abakhaana nabasiani ababukha, abaana abatiiti nende abakhasi. Nebutswa mulatiilekhwo khumundu yesi ouli neshibalikho khubwenibwe tawe. Ne muchachile muhekalu yanje.” Kho nibachachila khubemilisi abali imbeli wa Ihekalu ya OMWAMI Nyasaye.

⁷Mana nababoolela ari, “Mufwabie Ihekalu yanje nimwitsusia emilambo chiabandu bafwile mutsinyanyi tsiayo. Chache okhukhola emilimo!” Kho nibachaaka okhwira abandu mwitookho.

⁸Ne olwa bali nibeeranga abandu bario, nasi nendeshilwe sienyene, ndakwa hasi mafumama, nehaaba nemboola endi, “OMWAMI Nyasaye, nokhamulule abandu ba Isiraeli boosi abasikaale khulwa lirumalio lilulu khwitookho lia Yerusalemu?”

⁹Naye niyamboolela ari, “Obumayanu bwabandu ba Isiraeli nende ba Yuda nobunji muno. Eshialo shietsulamwo eshitsayi. Nalio litookho lietsulamwo obukhalachi bulali bwa habwene ta. Okhuba baboolanga mbu, isie OMWAMI Nyasaye ndayebalile eshialo shia Isiraeli, khandi mbu shiendolanga akekholekhanga tawe.

¹⁰Nebutswa isie shindalabalolelakhwo tsimbabasi, noho okhubabeela tawe. Habula ndalabahelesia eshinyasio okhulondana nebikhole biabwe abeene.”

¹¹“Ne nendola omundu owali nafwalile ebifwalo bieikitani, ne mumukhonokwe yalimwo neshikaye shiobwino bwokhuhandika, yachelela naboola ari, ‘Ekholile shinga olwa undachile okhukhola.’ ”