Read wanga DANIELI 10 Bible Online

DANIELI 10 - wanga bible

DANIELI 10

¹Mumuyika kwa khataru kwomuburuchi bwa Koreshi, omuruchi wa Perisia, Danieli owalangwa khandi mbu, Beliteshaza, yafimbulilwa lilolelo lindi. Lilolelo elo liali lia toto, nebutswa liali litinyu muno okhulimanyilisia eshisina. Ne kata kario yamanyilisia eshisina shialo, shichila yali nahelwe obuchesi bwokhumanyilisia amalolelo.

²Mubise ebio, isie Danieli ndali nindakhekhuulanga khulwa amahonga kataru.

³Shindalikhwo nindiilekhwo ebiokhulia ebilayi ta, kata inyama, kata okhunywakhwo idivai tawe. Shindayebakhakhwo amafura mumoni khulwa amahonga kataru ako tawe.

⁴Ne khunyanga yamakhumi kabili nakhane yomumwesi kwambeli, olwa ndali nisinjiile khulukuku lwomwalo omukhongo kwa Tigiri,

⁵ndahenga ikulu mana nendola omundu nafwalile ebifwalo bieikitani, khandi niyeboyile omukoye kweitsahabu inyushe okhurula Ufazi mushishienjeshie.

⁶Omubilikwe kwang'inang'ina shinga lichina liobukusi elia itarashishi, nabwo obwenibwe bwakha shinga oluhenu. Tsimonitsie tsiakha shinga ebitseso biomulilo. Amakhonoke nende ebilenjebie bialolekha shinga omukasa okurutilwe. Ne omwoyokwe kwahulilikha shinga omwoyo okwomukanda omukhongo kwabandu.

⁷“Isie Danieli sienyene nisie owalola lilolelo elo, okhuba abandu ba ndali ninabo shibalola lilolelo elo ta, nebutswa batiilwa noburi obukhongo mana nibelukha nibatsia okhwibisa.

⁸Kho ndalekhwaho sienyene okhulola lilolelo likhongo elo. Shindalikhwo namaani koosi ta, khandi likoondo lianje liakalukhana obubi muno, nindong'a nimbula amaani koosi.

⁹Ne olwa ndahulila amayoosi komwoyokwe, ndakwa hasi mafumama, mana tsindoolo tsisiro nitsimbila.

¹⁰Mana omukhono nikundiilakhwo, nikumbusiaho, nikuralisia amakhono kanje nende amasikamo kanje.”

¹¹Mana omumalaika niyamboolela ari, “Iwe Danieli, owaheelwa muno nende Nyasaye, sinjila shilunji. Rechelesia obulayi amakhuwa kekhukhuboolela, okhuba Nyasaye yarumile khwiwe.” Olwa yali nashiimboolelanga amakhuwa ako, ndasinjila neshitechelanga.

¹²Mana niyamboolela ari, “Danieli, olaria ta. Okhuba okhurula khunyanga ya imbeli olwa wachaaka okhukhaaba obumanyilisi nende okhwituutuyia imbeli wa Nyasayewo, yahulila amasaayoko, nasi enzitsile khulwa amasaayo ako.

¹³Nebutswa omukhulundu omukhongo woburuchi bwa Perisia yangaya khulwa tsinyanga amakhumi kabili nende ndala. Mana Mikaeli, mulala khubamalaika abakhongo yetsa niyakhoonya, kho nimulekhayo nali nende omukhongo woburuchi bwa Perisia.

¹⁴Kho enzitsile okhukhukhoonya omanyilisie aketsa okhwikholekha khubandubo mutsinyanga tsitsanga, okhuba lilolelo lino liliho okhulondana netsinyanga tsitsanga.”

¹⁵Olwa yali niyamboolelanga amakhuwa ako, ndahenga hasi nekhaywa okhuboola likhuwa liosi.

¹⁶Mana omumalaika owafwana shinga omundu oyo niyandila khumunwa nomukhonokwe, mana nindasama omunwa kwanje, nimboolela omumalaika oyo endi, “Omwami wanje, amalolelo kano kaakholile okhutsunwa muno, khandi endong'ile nimbula amaani koosi.

¹⁷Isie endi butswa shinga omukholi imbeli womwamiwe, kho ndakhaboola endie ninawe? Embulakhwo amaani kata omuya kwosi mwisie tawe.”

¹⁸Mana khandi omumalaika owafwana shinga omundu oyo niyandiilakhwo ne niyameeta amaani.

¹⁹Ne niyamboolela mbu, “Olaria ta, iwe owaheelwa muno, obe nomulembe; witinyie khandi obe neitswoni!” Olwa yamboolela amakhuwa ako, ndanyoola amaani, mana nemuboolela endi, “Omwami, mboolela elia wenyile okhumboolela shichila omalile okhuumeeta amaani.”

²⁰Mana niyareeba ari, “Omanyile eshichilile ninzitsa khwiwe? Bulano okhuula engalusheyo enzie emulwane omukhulundu omukhongo weshialo shia Perisia, ne olwa enzia okhuba nemuhulile, omukhulundu omukhongo weshialo shia Ebugiriki aleetsa.

²¹Nebutswa enzitsile okhukhuboolela amakhuwa akahandikwa mushitabu shiobwatoto. Abulaho oundi oukhoonyanga okhuseera abakhulundu abo, nalali Mikaeli, omukhongo wenywe ta.”