Read wanga DANIELI 11 Bible Online

DANIELI 11 - wanga bible

DANIELI 11

¹Nebutswa khulwanje, mumuyika kwambeli okwomuburuchi bwa Dario oweshialo shia Medi, isie omwene nderusia okhumukhoonya nende okhumumeeta amaani.

²Ne bulaano ndalakhwinoosia obwatoto bwamakhuwa ako. Abaruchi bandi bataru balibuukha okhuruka shialo shia Perisia. Owakhane aliba nemiandu eminji muno okhushilakhwo abandi boosi, ne olwa aliba nanyoolile emiandu eminji khandi nali namaani muno, alichaaka okhuseera lihanga lia Giriki.

³Mana alibuukha omuruchi undi ouliba namaani amanji muno, khandi ouliruka lihanga likhongo, ne alikhola liosi elia yenya.

⁴Nebutswa olwa aliba namalile okhuralila muburuchibwe, lihangalie lilifunakwa nilikabulwamwo ebitonye bine, okhulondana netsimbeka tsine tsiemiyeka echihutsunga mwikulu. Abetsukhulube shibaliruka ta, khandi oburuchi obwo shibuliba nobunyali shinga obwa yali ninabwo ta, shichila lihangalie lilifunakwa ne nilibukulwa nabandu bandi.

⁵Omuruchi wa Misiri aliba owamaani muno, nebutswa mulala khubakhongobe aliba namaani okhumushila, naye aliruka lihanga likhongo okhushila elilie.

⁶Olunyuma lwemiyika echihela, omuruchi wa Misiri alikhola indakano yobwitsa nende omuruchi wa Siria, ne alimubashila omukhaanawe okhuba omukhasiwe. Khulwa okhuralisia indakano eyo. Nebutswa indakano eyo shiyilaralila ta. Omukhaana womuruchi oyo, nomusaatsawe, nomwanawe omusiani halala nende abakholibe abeshikhasi ba yatsia ninabo boosi halala bakherwe.

⁷Olunyumakhwo mulala khubolwibulo lwomukhaana oyo aliemekhwa okhuba omuruchi. Aliseera abelihe lia Siria, niyenjila mutsingoba tsiabwe nende okhubahula.

⁸Alibukula ebifwanani biabanyasaye babwe, ebifwanani ebieitsahabu nende ebieifeetsa nabiyila Misiri. Khulwa oluhoono lwemiyika echihela omuruchi wa Siria shialiseera omuruchi wa Misiri tawe.

⁹Mana olunyumakhwo omuruchi owa Siria oyo aliseera omuruchi owa Misiri, nebutswa alilunyibwa okhukalukha mushialoshie.

¹⁰“Abaana bomuruchi owa Siria baliirechekha khulwa lihe nibakhung'asia omukanda omukhongo kwa abelihe. Abelihe abo baliitsa bwitsa shinga omukhula nibaseera olukoba lwomusuku wabwe.

¹¹Ne muburuma omuruchi wa Misiri aliseera omuruchi wa Siria ne natiila omukanda omukhongo okwa abelihebe.

¹²Olunyuma lwokhubahula ario, omuruchi oyo aliyitsiala khulwa obuhulibwe nende khulwa abandu abanji aba aliba niyeerire, nebutswa shialitsiililila okhuhula ta.”

¹³“Omuruchi wa Siria aliitsia khandi okhukhung'asia omukanda kundi kwabelihe, omukhongo okhushila okwambeli. Ne olunyumakhwo aliitsa okhuseera Misiri nali nomukanda omukhongo kwabelihe nende ebimanulwa ebinji ebiokhwikhoonyela nibalwana.

¹⁴Mutsinyanga etsio, abandu abanji balibuukha okhuyinga omuruchi wa Misiri. Ne balala khubandu bamahababa okhurula khubelihangalio, balikhola induli khulwa okhuusia lilolelo lino, nebutswa balihulwa.

¹⁵Nilwo lwomuruchi wa Siria alibotokhana litookho liolukoba nende okhulitiila. Abelihe elia Misiri shibalitsiililila okhulwana ta, kata abalwani babwe abalulu shibaliba namaani kokhulwana tawe.

¹⁶Omuruchi oulibaseera alibakhola akomwene alichama okhukhola, ne abulaho oulimuyinga. Aliralila mushialo eshiahule ne shiosi shiliba hasi wobunyalibwe.”

¹⁷“Omuruchi wa Siria oyo alirakhwo omwoyo okhwitsa nende amaani koburuchibwe bwosi. Ne khulwa okhumulula lihanga liomusukuwe elo, alimubashila omukhaanawe, nebutswa shialinyalilwa ta, khandi shikalimukasila tawe.

¹⁸Olunyuma lwa ako, alishiukhana ne naseera amahanga akali khulubeka lweinyanza, ne alihula amanji khuko. Nebutswa omukhongo undi welihe alimuhula ne niyakamia obwichinjimisibwe obwo. Toto mwene alashiukhasia amanyeko komuruchi wa Siria ako okhukalukha khuye omwene.

¹⁹Omuruchi oyo alishiukhana nachoma khu tsingoba tsiamatookho keshialoshie shiene nebutswa alihulwa, ne obwo nibwo obuliba obumalilishibwe.

²⁰Mana oundi alikalukha mushilenjeshie ouliruma omukhongowe okhutsia okhusandia abandu khulwa okhubakhola okhurunga obushuru kho mbu yenjiyie obuyinda bwelihangalie. Ne omuruchi oyo aliirwa olunyuma lwatsinyanga tsindutu, nebutswa shialiirwa mwiruma noho mwihe tawe.”

²¹“Omumalaika oyo natsiililila okhwinoosia mbu, omuruchi wa Siria oulilondakhwo aliba owokhufwolwa, oulakwanile okhuhebwa oluyali lwoburuchi ta. Nebutswa aliitsa metsukhana ne niyebukulila oburuchi okhubirira mutsinjila etsilakhoyile ta.

²²Alimulula abamahe halala nende omwisaaliisi omukhongo wa Ihekalu, nende okhubafunaka boosi.

²³Alikaatia amahanga kandi khulwa okhukhola indakano ninabo, ne natsiililila okhuba owamaani muno, kata olwa aliba narukanga abandu batiti butswa.

²⁴Aliseera olukongo olwobuyinda obunji, abolukongo olwo nibalamwirecheshele tawe mana alikhola amakhuwa kabakuukabe balakholakhwo ta. Alikabila abaloondibe emiandu nende abindu ebia aliba nayayile mwihe. Aliloosia shinga olwa atsia okhuseera tsingoba, nebutswa kaliba butswa khulwa eshise shituutu.

²⁵Nali neitswoni inyinji, alikhung'asia omukanda omukhongo kwabelihe khulwa okhuseera omuruchi wa Misiri, naye omuruchi wa Misiri alimuseera nomukanda omukhongo kwabelihe khandi okwamaani amanji. Nebutswa omuruchi wa Misiri oyo shialinyalilwa okhuhula ta, shichila balikaasia tsinjila tsiokhumuyinga.

²⁶Abetsabe abalitsanga ninaye ebiokhulia nibo abalimukhoba. Balimusasia nabo abelihebe abanji baliirwa.

²⁷Abaruchi babili abo balikhala hasi nibalia ebiokhulia halala, nebutswa buli mulala aliba napaariranga owashie amakhuwa amabi, khandi balikaatania abeene khu beene. Nebutswa shibalinyalilwa ta, shichila ebise biamakhuwa ako biliba nibishili okhuula.

²⁸Omuruchi wa Siria alikalukha mushialoshie nali nende emiandu eminji echia aliba nayayile. Nebutswa lichomolie likhongo liliba okhusasia indakano indakatifu. Alikhola akachama okhukhola, ne nakalukha mushialoshie.

²⁹Olunyumakhwo alikalukha okhuseera eshialo shia Misiri khandi, nebutswa shikaliba shinga olwa kali olwambeli tawe.

³⁰Abaroma balitsa netsimeeli okhumuyinga mana alitiilwa noburi, ne nakalukha inyuma nali noburuma obunji khandi alisasia indakano indakatifu. Aliloonda obuchetsiyi bwa abo abaloba indakano eyo.

³¹Abelihebe balionoonia Ihekalu halala nende olukoba lwayo. Balirusiaho omusango kwa buli nyanga, ne nibasinjisia muhekalu eshifwanani shieshisinyo.

³²Omuruchi oyo alikatilisia abo abanala okhuloba indakano indakatifu kho mbu bamukhonye, nebutswa abo abafuchilila okhulonda Nyasaye shibalifuchilila nahatuutu tawe.

³³Abemilisi bobuchesi mubandu balikhonya abashiabwe abanji okhumanyilisia, nebutswa khulwa tsinyanga tsindutu balala khubo baliirwa nolukanga, noho okhusambwa nomulilo, nabo abandi nibayaywa emiandu chiabwe.

³⁴Olwa baliba nibeerungwa, abo abafuchilila okhulonda Nyasaye balihabinwa hatiiti, mana abanji bakheyunje khubo, nebutswa balikhola bario khulwa okhwikaatia butswa.

³⁵Balala khubemilisi babwe abobuchesi baleerwa. Kano kalekholekha khulwa okhusiiya nende okhulafia abandu. Ne kalatsiililila kario okhuula khubise biobumalilishi, okhuba induukho yene yishili okhuula.

³⁶Omuruchi wa Siria alikhola kachama okhukhola. Yakhechinjimisie, niyekhulumamia mbu ye nomukhongo okhushilakhwo abanyasaye boosi; nende kata okhunyeka Nyasaye oushila abanyasaye boosi. Alatsiililila okhwikhulumamia ario okhuula lwoburuma bwa Nyasaye buula khushiakamo shiabwo. Okhuba aka Nyasaye yamala okhulaka okhuula kekholeshe.

³⁷Omuruchi oyo shialiteebakhwo likhuwa liosi khumunyasaye wabakuukabe bakhalabanila ta, noho owa abakhasi baheela. Okhuba alalechelesia abanyasaye bandi boosi, alekhulumamia okhushila boosi.

³⁸Mushilenje eshiokhwinamila abanyasaye abo, ye aliinamila omunyasaye oulindanga olukoba, owa abakuukabe balayenamilakhwo ta. Alimuhaanila itsahabu, ifetsa, ebindu biobukusi obukhongo nende ebihaanwa bindi ebiobukusi obweikulu.

³⁹Aliseera tsingoba tsiamaani niyekhoonyelanga obuhabini okhurula khumunyasaye omucheni. Abo abalimufuchilila okhuba omuruchi wabwe, alibahelesia oluyali olukhongo, alibemekha okhuruka abandu abanji, khandi alibakabila omukunda okhuba eshihaanwa shiabwe.”

⁴⁰“Khushise shiobumalilishi, omuruchi wa Misiri aliseera omuruchi wa Siria. Nebutswa omuruchi owa Siria yesi khandi alimuseera namaani shinga eshimbalukusi. Alimuseera namakaarike, netsifarasi nende tsimeeli tsinyinji. Aliseera amahanga amanji nabiramwo shinga omukhula kweifula.

⁴¹Aliseera kata nende eshialo eshiahule shia Isiraeli, nende okhwira abandu abanji. Nebutswa amahanga ka Moabu, Edomu nende obunji obwebitonye bia Amoni balihonokokha okhurula mumakhonoke.

⁴²Ne olwa aliseera amahanga ako kata lihanga lia Misiri shililihonokokha tawe.

⁴³Alibukula amabishilo keshialo shia Misiri, aka ifetsa, itsahabu nende ebindu biosi biobukusi obweikulu. Abandu ba Libia nende aba Etsiopia balimulondakhwo nibali abasumbabe.

⁴⁴Nebutswa amakhuwa karula Ebukwe nende Emasaba kalamurisia. Naye alarula nobululu obunji okhumulula nende okhwira abandu abanji.

⁴⁵Alisimikha amaheemake amakhongo hakari weinyanza nende eshikulu eshitakatifu nebutswa aliula khushiakamoshie, ne shialibaho oulimuhabina ta.”