Read wanga DANIELI 12 Bible Online

DANIELI 12 - wanga bible

DANIELI 12

¹“Mana omumalaika owali nafwalile ebifwalo bieikitani oyo naboola ari, Mutsinyanga etsio, Mikaeli, omumalaika omukhongo, oulindanga abandubo alilolekha. Mana shilabaho eshise shiamasila, amasila amatinyu akashili okhubakhwoho okhurula amahanga nikachaaka okhubaho khushialo. Nebutswa munyanga etsio, abandubo boosi, aba ameera kabwe kalinyoolekha nikahandikwa mushitabu shia Nyasaye balihonibwa.

²Abanji khubo abamala okhufwa balilamukha. Balala balisangalila obulamu bweinziayo, nabandi balitilwa tsisoni nende okhunyoola eshifimbwa murwe eshilahwaho ta.

³Abemilisi abobuchesi baliakha shinga okhwakha okhweliuba, nabo abemilila abashiabwe okhukhola akobulunjishi baliakha shinga okhwakha khwetsing'ining'ini obushia nobushia.

⁴“Nebutswa iwe Danieli obiishe obutinyu amakhuwa kano, ofunishe eshitabu eshio neshibalikho okhuula khushihesi shieshialo. Abandu abanji balelukhana nibatsia eyi nende eyi nibateema okhwimeeta obuchesi.”

⁵“Mana isie Danieli, nehenga ne nindola abamalaika bandi babili nibasinjiile khulukuku olwomwalo, mulala khulukuku lweinjelekha yino, noundi khulukuku lweinjelekha yilia.

⁶Mana mulala khubo nareeba owali nafwalile ingubo yeikitani nasinjiile injelekha undi yilia ari, ‘amakhuwa akokhuchenyia kano kalatsiililila okhuula liina kho kahwe?’

⁷Mana omumalaika wali nafwalile tsingubo tsieikitani, nasinjiile injelekha undi yilia nachinguula emikhonochie chiosi chibili ikulu. Mana niyetsuba muliira lia oyo oubetsangaho mwoyo obushia nobushia ari, ‘Kalabaho khulwa eshise shilala nebise bibili nende inusu eya eshise, lwokhusandibwa khwabandu ba Nyasaye khuula khushiakamo, amakhuwa kano koosi kalaba nikoosibwe.’

⁸Ndahulila aka yaboola nebutswa shindamanyilisia eshisina shiako tawe. Kho nemureeba mbu, Omwami wanje, obumalilishi bwamakhuwa kano buliba burie?”

⁹Naye niyangalusia ari, “Danieli iwe tsia butswa shichila amakhuwa kano nakokhubiswa, khandi akokhubikhwa nikareerwekhwo eshibalikho okhuula khushise shiobumalilishi.

¹⁰Abandu abanji balasiiywa khandi balakholwa okhuba abalafu; nebutswa abamayanu balatsiililila okhukhola obumayanu, abulaho kata mulala khubo oulamanyilisia eshisina. Nebutswa abo abachesi balamanyilisia eshisina.

¹¹Okhurula khushise shiomusango omusambe kwa buli lwosi kurusibwaho, okhuula khushise shieshifwanani shiokhurisia shisinjisibwa tsilabira tsinyanga eshikhumila ebikhumi bibili namakhumi shienda (1,290).

¹²Nabeikhabi abo abalefwila okhuula olwa tsinyanga etsio eshikhumila, ebikhumi bitaru namakhumi kataru natsirano (1,335) tsiliba nitsihwele.

¹³“Nebutswa iwe Danieli tsia butsia, ohuluushe Emakombe. Ne olwa ebise ebio biliula olilamukha nonyoola omukabo kukwo.”