Read wanga DANIELI 2 Bible Online

DANIELI 2 - wanga bible

DANIELI 2

¹Nebukadineza yaloora lilooro mumuyika kwakhabili kwoburuchibwe. Lilooro elo liamuhendia omwoyo muno kata nafuba tsindoolo.

²Yarumasia abafumu, abaroobi abebitsohelo nende abachesi betsing'ining'ini beetse okhumwinoosia eshisina shieliloorolie. Boosi beetsa mana nibasinjila imbeliwe.

³Nababoolela ari, “Endoorire lilooro, nalio lihendinjia omwoyo muno. Ndeenya okhumanya eshisina shialio.”

⁴Abachesi khuketsing'ining'ini abo, nibakalusia omuruchi mu Oluaramu bari, “Iwe Omwami, omenyeho inziayo! Khuboolele liloorolio tsana, nefu khulakhwinoosia eshisina shialio.”

⁵Omuruchi nabakalusia naboola ari, “Emalile okhukhalaka mumwoyo mbu, nimuba nimulamboolela lilooro lianje halala nende eshisina shialio ta, mulatonywamwo ebitonye nebitonye, natsio tsiinzu tsienywe tsilalikululwa tsiosi pe.

⁶Nebutswa nimuba nimumboolela biombi lilooro nende eshisina shialio, ndalamuhelesia ebihanwa, nomurungo nende oluyali olukhongo. Khulweshio mumbuulile lilooro tsana nende eshisina shialio.”

⁷Nabo nibakalusia olwakhabili nibaboola mbu, “Iwe omuruchi, khuboolele lilooro lioloorire, nefu khulakhuboolela eshisina shialio.”

⁸Omuruchi nabakalusia ari, “Emanyile obulayi mbu, muteemanga okhusitia ebise, shichila mumanyile mbu, emalile okhukhalaka mumwoyo kwanje mbu,

⁹ndalamuhelesia eshinyasio shilala nimuba nimulaamboolela lilooro lianje tawe. Kho mumalile okhufuchilisania mwesi mbu muboole obubeeyi ebise nabio nibibiriirira. Kho mboolele lilooro tsana, nasi ndalamanya mbu munyala okhumboolela eshisina shialio.”

¹⁰Abachetsiyi abo nibakalusia omuruchi bari, “Abulaho omundu yesi khushialo ounyala okhukhola aka wenyanga okhumanya. Abulaho omuruchi kata omukhongo yesi kata owamaani okhushila owareebakhwo abafumu, abaroobi kata abachesi betsing'ining'ini likhuwa shinga elo.

¹¹Omuruchi, likhuwa elia oreebanga nelitinyu. Abulaho omundu yesi ounyala okhukhukalusia, habula abanyasaye bonyene nibo abanyala, nabo shibamenyanga mubandu tawe.”

¹²Olwa omuruchi Nebukadineza yahulila ario, yatiilwa neliruma likhongo mana nalaka mbu abachetsiyi bomuruchi boosi mu Babuloni beerwe.

¹³Kho lilako nilirula mbu, abachetsiyi boosi berwe, Danieli nabashie boosi nibakhabwa mbu beerwe.

¹⁴Mana Danieli natsia khu Arioku, omwimilisi wabalindi bomuruchi, owali nahelwe lilako okhwira abachetsiyi abomuruchi. Yekhoonyela amakhuwa kobuchesi nende oburechelefu,

¹⁵ne nareeba Arioku eshifune eshichila omuruchi nahana lilako lilulu elo. Arioku namuboolela akali nikekholeshe.

¹⁶Danieli natsia bwangu khumuruchi, namureeba amuhelesiekhwo ebise ebihela kho abe ounyala okhumuboolela eshisina shieliloorolie elo.

¹⁷Mana Danieli nakalukha ingo naboolela Hanania, Mishaeli nende Asaria akali nikekholeshe.

¹⁸Yababoolela mbu basabe Nyasaye womwikulu tsimbabasi, khandi bamureebe abenoosie eshisina shielibiso elio kho baleshe okhwirwa halala nabachetsiyi bandi ba Babuloni.

¹⁹Mana mushilo tsana eshio, libiso elio nilifunulilwa Danieli mwilolelo lieshilo. Naye Danieli niyetsoomia Nyasaye womwikulu,

²⁰naboola ari, “Eliira lia Nyasaye litsoomibwe ebisoni nebisoni, okhuba obuchesi nende obunyali nebibie.

²¹Ye akalukhasinjia ebise nende tsinyanga. Yemekhanga abaruchi khandi abarusiaho. Ye ahananga obuchesi khubachesi, khandi obumanyilisi khu abo abali nobumanyilisi.

²²Afunulanga amakhuwa akali muusi khandi akebisa. Amanyanga akali mushiilima, nabwo obulafu bwamubotookhana.

²³Iwe Nyasaye wabaakuuka banje, ekhukhupila orio khandi ekhwitsoomia, shichila niwe owambelesia obuchesi nende amaani, ne bulano ohulile amasaayo kanje. Khandi okhumanyiye aka khunyala okhuboolela omuruchi.”

²⁴Kho Danieli natsia khu Arioku, owa omuruchi yali nalachile okhwira abachetsiyi ba Babuloni. Namuboolela ari, “Shioleera abachetsiyi ba Babuloni tawe. Habula umbile imbeli womuruchi nasi ndalamuboolela eshisina shieliloorolie.”

²⁵Mana Arioku nayila Danieli imbeli womuruchi Nebukadineza bwangu namuboolela ari, “Omuruchi, enyolile mulala khubahambe okhurula Ebuyahudi, ounyala okhukhubuulila eshisina shieliloorolio.”

²⁶Omuruchi nareeba Danieli (oweliiralie lindi liali Beliteshaza) ari, “Onyala okhumboolela lilooro elia endoorire nende eshisina shialio?”

²⁷Danieli namukalusia ari, “Omwami wanje, abulaho omufumu, omuroobi, owebitsohelo kata omuchesi khuketsing'ining'ini ounyala okhukhubuulila eshisina shielilolelo lioreebile elo tawe.

²⁸Nebutswa aliho Nyasaye womwikulu oubisulanga amabiso. Niye oukhumanyisiye iwe omuruchi Nebukadineza akeetsa okhwikholekha mutsinyanga etsitsanga. Bulano ndeenya okhukhubuulila eshisina shielilooro nende amalolelo ka waluutsi noli mundoolo.

²⁹Kali kari: olwa iwe omuruchi wali nokonanga waloora amakhuwa aketsa okhwikholekha olunyuma. Ne Nyasaye oubisulanga amabiso yakhumanyiye akeetsa okhwikholekha.

³⁰Nebutswa isie shiekhufunulilanga libiso lino shichila mbu endi omuchesi okhushila abandu bandi boosi ta, habula, mbu iwe omuruchi omanyibwe eshisina shielilooro nende amapaaro aketsile khwiwe.

³¹“Iwe omuruchi, muliloorolio walola eshifwanani eshikhongo nishisinjiile imbeliwo. Shiali eshiamaani, khandi eshing'inang'inu. Eshifwanani eshio shiali eshiokhurisia muno.

³²Omurwe kwashio kwali okwa itsahabu inzeleleshe, eshilifu shiashio nende amakhono kashio biali ebia ifeetsa. Inda nende amarango biashio biali ebiomukasa.

³³Ebilenje biashio biali bieshibia, nako amalaaro kashio elubeka kali akeshibia neundi nikaba akelitoyi.

³⁴Olwa wali noshihenganga, lichina lialikulukha eliene nililatililwekhwo ta. Liatuya ebilenje bieshibia nende litoyi bieshifwanani eshio mana nilibitubulula.

³⁵Mubwangu eshibia, litoyi, omukasa, ifetsa nende itsahabu biosi halala nibitubukha mana nibifwana shinga omukhuutsi okuli mulwanyi olwokhuseselakhwo mutsinyanga tsieshimiyu. Omuyeka nikubituumuula ehale, obulalekhakhwo eshindu shiosi tawe. Nebutswa lichina eliatuya eshifwanani eshio liakalukhana nilikwa eshikulu eshikhongo, ne nilifunikha eshialo shiosi.

³⁶“Iwe omuruchi, elio nilio liloorolio. Ne bulano khutsia okhukhuboolela eshisina shialio.

³⁷Iwe, omuruchi, oli omuruchi omukhongo okhushila abaruchi bandi boosi. Nyasaye womwikulu yakhuhelesia oburuchi, obunyali, amaani nende oluyali.

³⁸Yakhukhola okhuba omuruchi mushialo shiosi eshia abandu bamenyangamwo netsisolo tsiomubulimo nende amanyonyi akokhwikulu. Iwe niwe omurwe kweitsahabu kwa waluutsi.

³⁹Iwe nomalile okhuruka, oburuchi bundi bwakhabeho, ne shibwakhabe obukhongo shinga obubwo tawe. Olunyuma lwobwene obwo, obundi bwakhataru bwakhabeho obuli obwomukasa. Obwo bwakharuche eshialo shiosi.

⁴⁰Mana nolwa khwakhabeho nende oburuchi bwakhane obwamaani shinga eshibia, eshiarakanga nende okhutubula buli shindu shiosi. Shinga butswa olwa eshibia shiarakanga buli shindu nolwa oburuchi obwo bwakhaarache nibutubula oburuchi bwosi obwaranjilila.

⁴¹Khandi walola ebilenje nende tsinzala ebieshifwanani eshio, ebiali elubeka eshibia nayo eundi litoyi. Yako kamanyinjia mbu oburuchi obwo bwakhakabukhanemwo, nebutswa bulibamwo amaani keshibia shinga olwa walola eshibia nishitsokasibwa nelitoyi lilonje.

⁴²Ne shinga tsinzala tsiebilenje tsiali tsieshibia elubeka, nalio litoyi elubeka undi, kho oburuchi tsana bwakhabe obwamaani elubeka, ne elubeka undi bulibula amaani.

⁴³Shinga olwa walola eshibia nishitsokasibwe nelitoyi, ako kamanyinjia mbu abaruchi boburuchi obwo bakhateeme okhulimasia abandu khulwa okhuteshania, nebutswa shibakhalimaane halala ta, shinga eshibia olwa shilanyala okhutsokasibwa nelitoyi tawe.

⁴⁴Ne mutsinyanga tsiabaruchi abo, Nyasaye womwikulu yakhareho oburuchi obulasasibwa, kata okhubukulwa nabandu bandi tawe. Bwakhamulule oburuchi bundi obwo bwosi okhuula khushihesi, ne bwakhabeho inziayo.

⁴⁵Eshio nishio eshisina shielichina okhwakukha okhurula khushikulu omukhono kwomundu nikulatililekhwo ta, niliaraka eshifwanani tsana eshiakasibwa khushibia, omukasa, litoyi, ifeetsa nende khutsahabu. Nyasaye omukhongo akhumanyiye iwe omuruchi amakhuwa akakhekholeshe mutsinyanga tsitsanga. Elio nilio lilooro eliawaloora. Lilooro lilio neliatoto, khandi eshisina shialio shili habwene.”

⁴⁶Mana omuruchi Nebukadineza nafumama hasi namwinamila Danieli nende okhulaka mbu areererwe amalesi keshing'ari khandi akholelwe omusango.

⁴⁷Omuruchi naboolela Danieli mbu, “Toto mwene, Nyasaye wenywe niye Nyasaye omukhongo mubanyasaye boosi, Omwami wabaruchi, khandi niye oubisulanga amabiso, okhuba iwe onyalilwe okhwinoosia libiso lino.”

⁴⁸Mana Omuruchi niyemekha Danieli khushifumbi shikhongo muburuchibwe khandi namuhelesia ebihanwa ebinji. Yamwemekha okhusinjilila olukongo lwa Babuloni khandi namukhola okhuba omwimilisi wabachesi boosi mu Babuloni.

⁴⁹Danieli yareeba omuruchi, ne omuruchi niyemekha Shadaraka, Meshaka nende Abedineko okhuba abasinjilili bamakhuwa kolukongo lwa Babuloni. Nebutswa Danieli yasikala mulwanyi lwomuruchi.