Read wanga DANIELI 3 Bible Online

DANIELI 3 - wanga bible

DANIELI 3

¹Omuruchi Nebukadineza yalaka mbu eshifwanani shietsahabu shikasibwe. Oburambi bwokhutsia ikulu bwali tsimita amakhumi kabili nende munane (28 m), ne obuchiikha bwashio bwali tsimita tsitaru (3 m) Yalaka mbu shisinjisibwe mumuhololokhwe kwa Dura, mulukongo lwa Babuloni.

²Mana omuruchi nalaka abemilisi boosi okhukhung'ana halala. Bali abaami, abasinjilili, abakafuna, abakofu beshiina, ababishi bamapesa, abayaasi, abakhalachi bemise nende abemilisi bandi boosi betsingongo. Balangwa okhutsia khumulukha kwokhusayila eshifwanani eshiomuruchi Nebukadineza yali nasinjisiye.

³Kho abaami, abasinjilili, abakafuna, abakofu beshiina, ababishi bamapesa, abayaasi, abakhalachi bemise nabemilisi boosi betsingongo nibakhung'ana khulwa omulukha okwokhusayila eshifwanani shiomuruchi Nebukadineza yali nasinjisiye. Olwa bali nibasinjiile imbeli weshifwanani tsana,

⁴omurumwa womuruchi yakhupa omulome nalanjilisia ari, “Inywe abandu betsimbia, abamahanga nende tsinimi tsiosi, kano niko akamulachilisibwa okhukhola.

⁵Olwa mulahulila amayoosi kolwika, nelilele, litungu, eshilili, limuka nende amayoosi akobukhana bwetsimbia tsiosi, mwikhupe hasi khulwa okhwinamila eshifwanani shiomuruchi Nebukadineza yasinjisiye.

⁶Ne omundu yesi ouleekhupa hasi nashiinamila ta, alasukunwa mushisambilo shiomulilo omululu.”

⁷Kho olwa abandu boosi bahulila amayoosi tsana, bekhupa hasi nibenamila eshifwanani shieitsahabu eshiomuruchi Nebukadineza yali nasinjisiye.

⁸Mubise ebio, abachesi bandi khu ke tsing'ining'ini beetsa okhufukula Abayahudi.

⁹Baboolela omuruchi Nebukadineza bari, “Iwe omuruchi, omenyeho inziayo!

¹⁰Iwe omuruchi, iwe wahaana lilako noboola mbu, abandu boosi abahulila amayoosi kolwika, lilele, eshilili, litungu, limuka nende obukhana obwetsimbia tsiosi, bekhupe hasi nibenamila eshifwanani shieitsahabu.

¹¹Ne omundu yesi oulekhupa hasi nashiinamila ta alasukunwa mushisambilo shiomulilo omululu.

¹²Baliho Abayahudi bandi abawaraho okhusinjilila amakhuwa kolukongo lwa Babuloni, nabo ni Shadaraka, Meshaka nende Abedineko abalalondanga lilakolio tawe. Shibakhalabanilanga abanyasayebo kata okhwinamila eshifwanani shieitsahabu shiawasinjisiye tawe.”

¹³Habwene yaho, omuruchi yatilwa noburuma obukhongo mana nalaka mbu Shadaraka, Meshaka nende Abedineko bareerwe imbeliwe. Kho abandu abo nibareerwa imbeli womuruchi.

¹⁴Yabareeba ari, “Nakatoto mbu inywe; Shadaraka, Meshaka nende Abedineko mulobile okhukhalabanila omunyasaye wanje nende okhwinamila eshifwanani shieitsahabu eshia ndasinjisiye?

¹⁵Kho bulano, olwa muhulila butswa amayoosi kolwika, lilele, indongooli, litungu, eshilili, limuka nende akobukhana bwetsimbia tsiosi, mwikhupe hasi nimwinamila eshifwanani eshio. Ne nimulakhola murio ta, mulasukunwa bwangu mushisambilo shiomulilo omululu. Mupaaranga mbu aliho Nyasaye undi ounyala okhumuhonia?”

¹⁶Shadaraka, Meshaka nende Abedineko nibakalusia omuruchi nibamuboolela bari, “Iwe omwami Nebukadineza, ifwe shikhuleterera khumakhuwa kali imbeliwo ta.

¹⁷Nikakhaba mbu, Nyasaye wa khukhalabanilanga anyala okhukhuhonia ifwe okhurula mushisambilo shiomulilo omululu, nende okhurula mumakhonoko, alakhola ario.

¹⁸Nebutswa, iwe omuruchi, kata nikaba mbu shialakhuhonia ta, omanye mbu, ifwe shikhulakhalabanila abanyasayebo kata okhwinamila eshifwanani eshieitsahabu shia wasinjisiye tawe.”

¹⁹Mana Nebukadineza natiilwa neliruma lilulu khu Shadaraka, Meshaka nende Abedineko, khandi nakhuunia obwenibwe khulwa liruma. Nalaka mbu, omulilo kweshisambilo khumeetwe akhandi musafu okhushila shinga olwa kwakhanga khase.

²⁰Nalaka abelihebe abamaani abomwihelie okhuboha Shadaraka, Meshaka nende Abedineko mana babasukune mushisambilo shiomulilo.

²¹Kho abandu abo nibabohwa, nibefwalile tsikanzu tsiabwe, tsilong'i, tsikofia nende ebifwalo bindi, mana nibasukunwa mumulilo okwo.

²²Ne okhuba mbu lilako liomuruchi liali litinyu okhushila, nashio eshisambilo nishiyile pia, olumemu lwomulilo lwera abelihe ababukula Shadaraka, Meshaka nende Abedineko okhubasukuna mumulilo.

²³Ne olwa Shadaraka, Meshaka nende Abedineko, bali nibashiboyilwe, bakwa mushisambilo shiomulilo omululu.

²⁴Omuruchi Nebukadineza yachenya nasinjila matetekhana. Nareeba abakhulundu bomushiinashie ari, “Shikhusukune abasaatsa bataru mumulilo nibaboyilwe?” Nabo nibakalusia bari, “Iwe omwami, kali kario.”

²⁵Naye nakalusia ari, “Ne endolanga abandu bane abalaboyilwe ta, bachendanga mumulilo hakari, nakwo shikubasambangakhwo tawe. Owakhane afwana shinga omumalaika.”

²⁶Mana Nebukadineza natsia ahambi khumuliango kwelirumbi liomulilo omululu elio nalanga ari, “Shadaraka, Meshaka nende Abedineko, abakhalabani ba Nyasaye Omukhongo Muno, rule mwitse hano!” Nabo nibarula mumulilo okwo bwangu.

²⁷Abaami, abasinjilili, abakafuna nabakhulundu beshiina shiomuruchi nibakhung'anaho okhulola abandu abo. Omulilo shikwalikhwo nobunyali bwosi khumibili chiabwe ta. Liswi liemirwe chiabwe shiliasambwakhwo ta, kata tsikanzu tsiabwe shitsiayiakhwo kata okhuhunyakhwo omwosi tawe.

²⁸Kho omuruchi Nebukadineza naboola ari, “Nyasaye wa Shadaraka, Meshaka nende Abedineko yetsoomibwe! Arumile omumalaikawe khandi nahonia abakhalabanibe abamwisikanga. Bakhayile okhuhulila lilako lianje, ne nibahaana obulamu bwabwe, okhushila okhukhalabanila noho okhwinamila omunyasaye undi, oulali Nyasaye wabwe ta.

²⁹Khulweshio ehana lilako mbu, omundu yesi owelihanga liosi liosi, oluyia noho olulimi lwosi lwosi, oluboola likhuwa liosi libii khu Nyasaye wa Shadaraka, Meshaka nende Abedineko alatonywamwo ebitonye ebitonye nayo inzuye niyilikululwa yosi pe, okhuba abulaho omunyasaye undi yesi ounyala okhuhonia abandu ario tawe.”

³⁰Kho omuruchi niyemekha Shadaraka, Meshaka nende Abedineko khubisala ebikhongo mulukongo lwa Babuloni.