Read wanga DANIELI 4 Bible Online

DANIELI 4 - wanga bible

DANIELI 4

¹Isie Omuruchi Nebukadineza eruma amakhuwa kano khubandu boosi abamahanga koosi, abetsinzibulo nende abetsinimi tsiosi abamenyanga mushialo. Emboola mbu, mube nomulembe!

²Endola mbu nobulayi emuboolelekhwo khukokhuchenya nende akamakana ka Nyasaye Omukhongo Muno yamanyiye.

³Lolekhwo shinga olwa akokhuchenyake kali amakhongo! Lolekhwo shinga olwa akamakanake kali akobunyali! Oburuchibwe noburuchi bweinziayo, obwamibwe butsiililila ebisoni nebisoni.

⁴Isie, Nebukadineza ndali nendi hango munzu yanje yoburuchi nindikhoyelanga obwale.

⁵Nebutswa olwa ndali nindiyalisiye khushitali nendi mundoolo, ndaloora lilooro eliariisia. Amapaaro nende amalolelo ka ndalola karisia.

⁶Kho ndahana lilako mbu, abachesi boosi ba Babuloni baeerwe imbeli wanje mbu bambuulile eshisina shielilooro tsana.

⁷Ne olwa abafumu, abalakuli, abebitsohelo nende abachesi khuketsing'ining'ini beetsa imbeli wanje, shibanyala okhumboolela eshisina shielilooro elo tawe.

⁸Olunyuma lwa abo, Danieli yetsa imbeli wanje, (owakulikhwa eliira lindi mbu Beliteshasa eliali eliira elia omunyasaye wanje, khandi owa iroho ya abanyasaye abatakatifu yili muye). Ndamuboolela aka ndali nindoorire mbu,

⁹Iwe Beliteshasa, omukhongo wabafumu, emanyile mbu, iroho ya abanyasaye abatakatifu yili mwiwe, khandi mbu, libulaho libiso liosi elinyala okhukhukhaya okhubuula. Lilooro lia ndaloora ndielino, mbuulila eshisina shialio.

¹⁰Olwa ndali nindiyalisiye ningonanga, ndalola lilolelo lino; ndalola omusaala omurambi muno hakari weshialo.

¹¹Omusaala kwatsilila okhukhula nikukhulumana. Obutenje bwako nibuula mwikulu. Kwanyala okhulolekha kata okhuula khushihesi shieshialo.

¹²Amasaafu kakwo kali akobukondo obulayi. Kwali nebiamo ebinji ebinyala okhulibwa nabandu boosi khushialo. Tsisolo etsiomubulimo tsiahuluushila mushinikha shiakwo, nako amanyonyi nikombakha ebitsu ebiokhumenyamwo mumasaka kakwo. Buli eshilonje shianyoola eshiokhulia okhurula khukwo.

¹³Olwa ndali neshipaaririsinjia khukelilolelo elo, ndalola omumalaika niyekhanga okhurula mwikulu.

¹⁴Yalanjilisia nomwoyo omukhongo naboola ari, “Reme omusaala kuno mana mutsosole amasaka kakwo. Bungulusie amasaafu kakwo nimusalaasia ebiamo biakwo. Londe tsisolo okhurula hasi wakwo nende amanyonyi okhurula khumasaka kakwo.

¹⁵Nebutswa muleshe eshisichiri nemisi chiakwo mwiloba nishiboyilwe nomunyololo kweshibia nende omukasa mumuboka kwomukunda. Leshe lime liame khumundu oyo; leshe omukabokwe kube okhumenya netsisolo nalia obunyasi bwomubulimo.

¹⁶Khulwa emiyika musafu, shinabekhwo namachesi shinga akomundu ta, nebutswa nabe namachesi shinga akeisolo.

¹⁷Lino nelilako elibisibwe nabalindi, likhuwa elirumbulwe nabatakatifu kho mbu abalimwoyo bamanye mbu Nyasaye Omukhongo Muno, ali nobunyali khuburuchi bwabandu khandi anyala okhuhelesia omundu yesi owachamile oburuchi kata oyo oulali omukhungo ta.”

¹⁸Omuruchi Nebukadineza namalilisia okhuboola ari, “Lino nilio lilooro liandaluutsi. Bulano, iwe Beliteshasa, mboolela eshisina shielilooro tsana. Abachesi boosi abomuburuchi bwanje bakhayilwe okhumbuulila eshisina shialio, nebutswa iwe onyala shichila roho yabanyasaye abatakatifu yili mwiwe.”

¹⁹Mana Danieli owalangwa khandi mbu Beliteshasa nang'ang'aala khulwa ebise, nabula eliaboola. Omuruchi namuboolela ari, “Beliteshasa, lilooro lio nende eshisina shialio bilakhurisia tawe.” Beliteshasa namukalusia ari, “Omwami, bwakhabele obulayi lilooro lino neshisina shialio nibiakhabele khubasukubo.

²⁰Waluutsi omusaala okwakhula mana nikuba omukhongo, khandi nikurambiha okhuula mwikulu, aha kunyala okhulolwa buli habundu khushialo.

²¹Kwali namasafu kobukondo obulayi nende ebiamo ebinji ebinyala okhuliibwa nabandu boosi. Natsio tsisolo nabulimo nitsihulushila mushinikha shiakwo, nako amanyonyi akomwikulu nikombakha ebitsu ebiokhumenyamwo mumasaka kakwo.

²²Kho iwe omwami, niwe omusaala okwo. Wakhula mana noba owamaani. Obukhongobwo bwakhula okhuula mwikulu, nabwo obwamibwo bwalaanda okhuula khundulo khweshialo.

²³Ne olwa wabele noshihenga, omumalaika yeshile okhurula mwikulu mana nalachilisia ari, ‘Reme omusaala okwo, mukusasie, nebutswa muleshe eshisichiri nemisi chiakwo mwiloba, nishiboyilwe nomunyololo kweshibia nende okwomukasa mumuboka kwomukunda. Muleshe omundu oyo anyiriisibwe neliime, omukabokwe kube okhumenya netsisolo etsiomubulimo khulwemiyika musafu.’

²⁴“Omwami wanje, eshisina shieloorolio njieshino mbu, Nyasaye Omukhongo Muno amalile okhulaka mbu kano kakhekholeshe khwiwe.

²⁵Wakhalondwe okhurula mubandu, ne wakhamenye netsisolo nabulimo. Wakhaye obunyasi shinga ing'ombe khulwemiyika musafu, ne wakhakonenje elwanyi mubushindu aha liime liakhame khwiwe. Wakhamenye obulamu obwo khulwemiyika musafu, mana mukhuhelelesia nolwa olimanyilisia mbu Nyasaye Ouli Omukhongo Muno niye ouli nobunyali muburuchi bwosi bwabandu, khandi niye ouhelesinjia omundu yesi owachama oburuchi obwo.

²⁶Nalio lilako eliokhulekha eshisichiri nemisi chiashio mwiloba eshisina shialio njieshino mbu: Iwe omuruchi wakhakalusilibwe oburuchi olwa wakhamanye mbu Nyasaye niye ourukanga eshialo shiosi.

²⁷Khulweshio, iwe omwami, hulila obuchetsiyi bwanje. Lekha obwonoonibwo nende obumayanubwo, mana okhole kobulunjishi, khandi obeele tsimbabasi abo abasandibwa. Haundi tsinyangatsio tsiomulembe tsilametekha.

²⁸Amakhuwa kano koosi kamala kekholeshe khumuruchi Nebukadineza.

²⁹Olunyuma lwemiesi ekhumi nachibili okhuhwa, omuruchi Nebukadineza yali nachendanga khushitsafu shieinzuye eyoburuchi ya Babuloni,

³⁰mana naboola ari, ‘Lolakhwo Babuloni, litookho likhongo lia ndayombashe khulwa amaani kanje mbu libe eshimenyo shianje shioburuchi, khandi khulwa oluyali lwanje!

³¹Ne lwomuruchi yali nashiboola, omwoyo kwarula mwikulu nikuboola kuri, Iwe omuruchi Nebukadineza, rechelesia amakhuwa kemboola khwiwe kano. Obwamibwo bukhurulilekhwo!’

³²Olalondwa okhurula mubandu. Ne eshimenyoshio shilaba netsisolo etsiomubulimo, olayaanga obunyasi shinga ing'ombe! Olamenya orio khulwemiyika musafu, okhuula lwolamanya mbu oyo ouli Omukhongo Muno niye ouli nobunyali muburuchi bwabandu, khandi niye ouhaananga oburuchi khumundu yesi owachama okhuhelesia.”

³³Mana amakhuwa ako nikekholekha kario khu Nebukadineza. Yalondwa okhurula mubandu, mana niyaaya obunyasi shinga ing'ombe. Liime liaama khumubilikwe. Liswilie nilirambiha shinga amabaha akeindutsu, amatereke nako nikarambiha shinga amatere kamanyonyi.

³⁴Olwa emiyika echio chiali nichihwele, isie Nebukadineza ndachinguula tsimoni tsianje nihenga mwikulu, ne obuchesi bwanje nibungalushila. Ndetsoomia Nyasaye ouli Omukhongo Muno, nemuhelesia oluyali oyo oumenyanga inziayo. Okhuba oburuchibwe noburuchi bweinziayo, ne obwamibwe butsiililila okhubaho ebisoni nebisoni.

³⁵Abandu bokhushialo boosi shiabalolanga okhuba eshindu ta, khandi akholanga koosi akayenya okhukhola khubamalaika bomwikulu, nende khubandu abokhushialo. Abulaho ounyala okhumukaya, kata okhumureeba mbu, “Okholanga shiina?”

³⁶Habwenaho, amachesi kanje kangalushila, mana nengalusilibwa oluyali, olukoosi nende ifuma eyoburuchi bwanje. Abakofu banje beshiina nende abami banje betsa nibakhaaba. Ndakalusibwa khuburuchi bwanje, khandi nenyoola oluyali olukhongo okhushila kata olwa ndali ninalwo olwambeli.

³⁷“Ne bulano, isie Nebukadineza nditsoomia omuruchi womwikulu nimuhelesia oluyali nende ifuma; okhuba koosi akakholanga nakatoto, khandi tsinjilatsie nitsiahabwene. Atutuyinjia boosi abechinjimisia.”