Read wanga DANIELI 5 Bible Online

DANIELI 5 - wanga bible

DANIELI 5

¹Inyanga yindi omuruchi Beleshasa yakaasia lisabo khulwa abakhongobe eshikhumila shilala (1,000), mana nanywa idivai halala ninabo.

²Ne olwa yali niyakhameela idivai, Beleshasa yalaka mbu bamureerere ebikombe nende ebirobotobo biitsahabu nende ifeetsa ebia omuruchi Nebukadineza, samwana, yali niyabukula okhurula mu Hekalu ya Yerusalemu. Omuruchi yarumasia mbu bireerwe kho mbu ye, abaamibe, abakhasibe nende abakhasibe ababikha banywelemwo idivai.

³Kho ebikombe ebio nende ebirobotobo ebio ebiali nibiabukulwa muhekalu nibireerwa. Mana omuruchi, abaamibe, abakhasibe nende abakhasibe ababikha nibanywelamwo idivai.

⁴Banywa idivai nibetsoomia abanyasaye abakasibwa okhurula khutsahabu, khufetsa, khumukasa, khushibia, khumisaala nende khumachina.

⁵Mubwangu obwo eshitonye shiomukhono kwomundu shialolekha, mana nishichaka okhuhandika khwisisi lieinzu yomuruchi, ahobulafu bwetsitaha bwali nibukhosinjia nende okhwakha muno. Omuruchi yalola eshitonye shiomukhono okwo nishihandika.

⁶Mana mumonimwe nimusaamuukha, indenga niyimutiila, amakumbake nikafwonokha, nabio ebilenjebie nibichaaka okhutechela.

⁷Omuruchi Belishasa nalanjilisia nomwoyo omukhongo mbu bareere abafumu, abaroobi nende abachesi khuketsing'ining'ini abo. Olwa bareerwa, omuruchi yaboolela abachesi ba Babuloni abo ari, “Omundu yesi oulasooma amahandiko kano, mana yamboolele eshisina shiako, alafwalwa ebifwalo bieisambarau khandi alafwalwa mwikosi olunyolo lweitsahabu, mana alahebwa eshisala eshiakhataru muburuchi.”

⁸Mana abachetsiyi abomuruchi boosi nibeetsa, nebutswa shiyalikhwoho kata mulala khubo owanyala okhusooma amahandiko ako kata okhuboolela omuruchi eshisina shiako ta.

⁹Kho indenga niyimeeta okhutiila omuruchi Beleshasa, namwo mumonimwe nimumeeta okhusaamuukha, nabo abemilisibe nibaba noburi obunji.

¹⁰Ne olwomukhaye nyinamwana omuruchi yahulila oluyoka lwomuruchi nende abemilisibe, yetsa niyenjila munzu yelisabo tsana mana naboola ari, “Iwe omuruchi, omenyeho inziayo. Shiolaria noho okhusaamuukha mumoni tawe.

¹¹Aliho omundu mushialo shiorukanga owa iroho yabanyasaye abatakatifu yili muye. Olwa papawo Nebukadineza yali nali omuruchi, yanyoolekha okhuba nobumanyilisi nende obuchesi shinga obuchesi bwabanyasaye. Omuruchi Nebukadineza, papawo, yamwemekha okhuba omwimilisi wa abafumu, abaroobi, abebitsohelo nende abachesi khuketsing'ining'ini abo.

¹²Ali namapaaro amalayi, okhumanyilisia nende okhubuula eshisina shiamalooro, okhukalusia emine nende okhurimbulula amatinyu. Kho rumasia omusaatsa oyo Danieli, owomuruchi yakulikha mbu Beliteshasa yetse. Alakhuboolela eshisina shia mahandiko kano.”

¹³Mana Danieli nareerwa imbeli womuruchi. Omuruchi namureeba ari, “Niwe Danieli, mulala khu Abayahudi ba papa wanje, omuruchi Nebukadineza yareera okhurula Yuda?

¹⁴Embuliile mbu, iroho eya abanyasaye abatakatifu yili mwiwe, khandi oli nobumanyilisi nende obuchesi obulayi muno.

¹⁵Abafumu nabaroobi bareerilwe mbu basoome amahandiko kano mana bamboolile eshisina shiako, nebutswa bakhayilwe.

¹⁶Ne embuliile mbu, onyala okhubuula eshisina shiamalooro nende okhwinoosia amabiso amatinyu. Kho noba nonyala okhusooma amahandiko kano, mana umbuulile eshisina shiako, oba olafwalwa ebifwalo bioburuchi ebia obukondo bweisambarau, nende olunyolo lweitsahabu mwikosilio, khandi olemekhwa khushifumbi eshia khataru muburuchi buno.”

¹⁷Danieli nakalusia omuruchi naboola ari, “Iwe omuruchi, tong'a nebihanwabio, noho ohelesie omundu undi. Ne kata kario enzia okhukhusomela amahandiko ako, mana ekhuboolele eshisina shiako.

¹⁸Iwe omuruchi, OMWAMI Nyasaye ouli Omukhongo Muno, yahelesia Nebukadineza papawo oburuchi, ifuma, oluyali nende olukoosi.

¹⁹Ne khulwa okhubela obukhongobwe, abandu boosi, abamahanga boosi, nende abetsinimi tsiosi bamuria khandi nibatechela khulwa ye. Nebukadineza yeraanga omundu yesi owa yenyanga okhwira, ne yalekhanga okhubaho mwoyo omundu yesi owa yenyanga okhulekha mbu abe mwoyo. Yemekhanga yesi owa yenyanga okhwemekha, khandi yarusinjia khushisala yesi owa yenyanga okhurusia khushifumbi shioburuchi.

²⁰Nebutswa olwa yachaaka okhwilola, naba oweshikala marwi nende okhukhola injinia, yarusibwa khushifumbi shioburuchi mana nakosia oluyalilwe.

²¹Yalondwa okhurula mubandu, obuchesibwe nibukholwa shinga obweisolo nabulimo. Namenya netsishili etsiomubulimo, niyaaya obunyasi shinga ing'ombe. Omubilikwe kwanyiririsibwa neliime okhuula olwa yamanya mbu Nyasaye ouli Omukhongo Muno niye ourukanga amahanga kabandu. Khandi ahelesinjia oburuchi omundu yesi owachama okhuhelesia.

²²Nebutswa iwe Beleshasa, omwanawe, kata olwa wamanya amakhuwa ako koosi shiwayetutuyia tawe.

²³Habula Wechinjimisia nofukula Omwami womwikulu. Walaka mbu ebikombe netsindabo ebiomuhekalu eya Omwami bireerwe imbeliwo. Iwe, nabemilisibo, nabakhasibo nende abakhasibo ababikha mwanywelamwo idivai nimwitsoomia abanyasaye abakasibwa okhurula khutsahabu, ifeetsa, omukasa, eshibia, khumusaala nende khwichina; abanyasaye abalanyala okhulola, okhuhulila kata okhumanya eshindu shiosi tawe. Ne shiwamuhelesia Nyasaye oluyali, oukhuhelesinjia obulamu, nakhulinda mukoosi akokholanga tawe.

²⁴Kho Nyasaye arumile omukhonokwe okhuhandika amakhuwa kano.

²⁵“Amakhuwa tsana akahandikwa ngakano mbu; ‘MENE, MENE, TEKELI nende PARESINI.’

²⁶Eshisina shiako njieshino mbu, MENE: Nyasaye ubasiye tsinyanga tsioburuchibwo mana ubwakamiye.

²⁷TEKELI: Nyasaye ukhuchelile khushichelo, mana onyooleeshe noli omuleemu muno.

²⁸PARESINI: Nyasaye ukabule oburuchibwo nabuhana khu Abamedi nende Abaperisia.”

²⁹Mana omuruchi Beleshasa nalaka abakhalabanibe mbu, bafwale Danieli ebifwalo bioburuchi, ebiobukondo bweisambarau, ne mwikosimwe bamufwale olunyolo lweitsahabu. Mana niyemekha Danieli khushifumbi eshiakhataru muburuchi.

³⁰Mushilo shieinyanga tsana eyo omuruchi Beleshasa owa Abakalidayo niyeerwa.

³¹Naye Dario, omumedi nabukula oburuchi nali nemiyika amakhumi kasasaba nende chibili.