Read wanga DANIELI 6 Bible Online

DANIELI 6 - wanga bible

DANIELI 6

¹Omuruchi Dario yakabula lihangalie lioburuchi mutsingongo eshikhumi shilala nende amakhumi kabili (120) mana niyemekha omwimilisi mubuli lukongo.

²Okhumeetakhwo, yaahula Danieli nende abandi babili okhusinjilila emilimo echiabemilisi abo nende okhulola mbu koosi akomuruchi yenyanga kakholwa obulakosiakhwo eshindu shiosi ta.

³Mubwangu Danieli yalolekha okhuba oweshinani khumilimo okhushila abasinjilili nende abemilisi bandi boosi, okhuba yali nende iroho indayi muno muye. Khulweshio omuruchi yali naparaanga okhumwemekha okhuba omwimilisi owelihanga liosi.

⁴Abasinjilili nende abemilisi abo bateema okhukhaaba eshifunane shiokhwinjilila Danieli itookho shinga olwa yasinjililanga amakhuwa akoburuchi, nebutswa shibashinyoola ta, shichila yali omwisiikwa khandi shiyakhola likhuwa liosi libi noho okhuba neshikha shiosi tawe.

⁵Kho abandu abo nibaboola mbu, “Shikhwitsa okhunyoola eshifunane shiokhwinjilila Danieli itookho ta, habula khukhabe eshikha eshilondana namalako ka Nyasayewe.”

⁶Bamala nibafuchilisania nibatsia khumuruchi nibamuboolela mbu, “Omuruchi Dario omenye inziayo!

⁷Ifwe fwesi abawemekha, abasinjilili, abaami, abakofu beshiina nende abakafuna khufuchilisaniye mbu, iwe omuruchi okhoyile okhuhaana lilako mana lihandikwe obutinyu. Ohane lilako mbu khulwa tsinyanga amakhumi kataru omundu yesi oulenamila omunyasaye undi noho omundu undi yesi, nalali iwe ta, asukunwe mubwina bwetsitalanyi.

⁸Kho omwami omuruchi ohaane lilako lino mana orekhwo iseyi yiyo kho mbu lileshe okhukalukhasibwa. Libe shinga amalako ka Abamedi nende Abaperisi akarakalukhasibungwa tawe.”

⁹Mana Omuruchi Dario nahandika lilako khandi narakhwo iseyi.

¹⁰Olwa Danieli yamanya mbu lilako elo liali nilimalile okhuhandikwa khandi nilirerwekhwo iseyi, yatsia ingo munzuye, niyenjila mushisikashie shia hekulu, eshia amatirisha kashio kali nikahenga Yerusalemu. Buli inyanga yasikamanga hasi akhandi khataru nasaya Nyasaye nende okhumukhupila orio shinga olwa yakholanga olwambeli.

¹¹Abasukube beetsa mana nibamunyoola nasayanga nende okhusaba tsimbabasi khu Nyasayewe.

¹²Batsia khumuruchi ne okhulondana nelilako elo nibamureeba bari, “Iwe omuruchi shiwamala okhura iseyi khwilako lino mbu, khulwoluhoono lwetsinyanga amakhumi kataru, omundu yesi ousaba eshindu shiosi khumunyasaye yesi noho khumundu yesi narali iwe ta omwami, asukunwe mubwina bwetsitalanyi?” Naye omuruchi nakalusia ari, “Amakhuwa ako nakatoto shinga amalako aka Abaperisi olwa kali, akalanyala okhukalukhasibwa ta.”

¹³Nabo nibamuboolela bari, “Iwe omuruchi, Danieli ouli mulala khubahambe okhurula Yuda shiakhuhelesinjia iwe oluyali kata okhulonda lilako lia wahana tawe. Asayanga akhandi khataru buli khunyanga.”

¹⁴Olwa omuruchi yahulila amakhuwa ako yabelela muno. Yateema shinga olwa anyala okhunyoola injila yokhuhonia Danieli okhuula olwa eliuba liayeela.

¹⁵Kho abasuku ba Danieli nibakalukha khumuruchi nibamuboolela mbu, “Iwe omwami omanye mbu okhulondana nende amalako ka Abamedi nende Abaperisi lilako liomuruchi amalile okhuhaana shilikalukhasibungwa tawe”.

¹⁶Mana omuruchi Dario nahana lilako mbu, Danieli asukunwe mubwina bwetsitalanyi. Omuruchi oyo naboolela Danieli ari, “Lekha Nyasayewo wa winamilanga nomwoyo kwosi akhuhonie.”

¹⁷Mana lichina nilireerwa nilirenjekhwa khubwinjililo bwobwina obwo. Omuruchi naliboha nende ingakaye eyoburuchi nende tsingaka tsiabakhulundube kho mbu amakhuwa ka Danieli kaleshe okhukalukhasibwa.

¹⁸Mana omuruchi nakalukha munzuye eyoburuchi, nahonga inzala eshilo shiosi, khandi nalatsaatsahasibwakhwo ta. Mana khandi nafuba tsindoolo eshilo shiosi.

¹⁹Omuruchi yabuukha mumabwibwi nahuna khubwina bwetsitalanyi.

²⁰Ne olwa yoola ahambi khubwina bwa Danieli yalimwo yalanjilisia nomwoyo okweshibeela ari, “Danieli omukhalabani wa Nyasaye ouliho mwoyo! Nyasaye wokhalabanilanga buli inyanga akhuhoniye mutsitalanyi noho?”

²¹Naye Danieli namukalusia ari, “Iwe omuruchi ohindile inziayo!

²²Nyasaye wanje arumile omumalaikawe okhusunia eminwa chietsitalanyi, kata shitsisaalisiyekhwo ta, shichila imbeliwe enyooleshe nembula eshikha, khandi eshili okhukhukholelakhwo iwe omuruchi libi liosi tawe.”

²³Omuruchi yasaangaala muno mana nalaka mbu Danieli arusibwe mubwina obwo. Mana Danieli narusibwa mubwina obwo, ne nanyoolekha mbu shiasaalisibwekhwo ta, shichila yali niyesichile Nyasayewe.

²⁴Mana omuruchi nalaka mbu abandu abali nibenjiliile Danieli itookho khulwa okhuboola obubeeyi basukunwe boosi mubwina bwetsitalanyi halala nabakhasi babwe nende abaana babwe boosi. Ne kata olwa bali nibashili okhuula hasi wobwina obwo tsitalanyi tsiabatiila nitsibafunaka amakumba kabwe koosi mubitonye.

²⁵Mana omuruchi Dario nahandichila abandu abamahanga koosi netsimbia tsiosi nende tsinimi tsiosi mushialo naboola ari, “Mwesi muhindile muno.”

²⁶Ehananga lilako mbu, mumahanga koosi akali hasi woburuchi bwanje, buli omundu aritsenje nende okhuhelesia oluyali Nyasaye wa Danieli. Okhuba “Niye Nyasaye ouliho mwoyo, khandi alaruka khulwa inziayo. Obunyalibwe shibulasasibwa ta, khandi shibulahwaho tawe.

²⁷Ahoninjia khandi ahonokosinjia. Akholanga akamakana khandi akokhuchenya mwikulu nende mushialo. Yahoniye Danieli okhurula mubunyali bwatsitalanyi.”

²⁸Kho Danieli nahindila mutsinyanga tsioburuchi bwa Dario nende Koreshi owa Perisia.