Read wanga DANIELI 7 Bible Online

DANIELI 7 - wanga bible

DANIELI 7

¹Mumuyika kwambeli kwa Beleshasa yali omuruchi wa Babuloni, Danieli yaloora amalooro nende okhulola amalolelo eshilo nakonile mushitalishie. Mana nahandika amalolelo ako ari,

²“Isie Danieli endoorire amalooro eshilo, enduutsi emiyeka chine echiomwikulu nichituubuula inyanza ikhongo.

³Mana emisolo emikhongo chine nichitikulukha okhurula munyanza eyo; Buli okusolo kubele nikwahukhane okhurula khukundi.

⁴Okusolo kwambeli kufwanile shinga italanyi, nebutswa kubeele netsimbaha shinga etsia indutsu, ne neshihenganga, tsimbaha tsiakwo etsio tsiyiishe nitsikurulakhwo. Mana nikuchinguulwa ikulu nikusinjisibwa nebilenje bibili shinga omundu, mana nikuhesibwa amachesi shinga akomundu.

⁵“Okusolo kundi nikulolekha, okwakhabili, nakwo kufwanile shinga itubu; nikusinjisibwa khubilenje biakwo bieinyuma. Kubeele netsimbafu tsitaru mumunwa, nikulumile nameeno kakwo. Mana nikuboolelwa mbu, bukha, lia inyama inyinji shinga lwonyalilwa.

⁶“Olunyumakhwo olwa embeele neshihenganga, okusolo kundi khandi nikulolekha, kufwanile shinga ingwe, nebutswa khumukongo khwakwo kubeelekhwo netsimbaha tsine shinga etsia linyonyi, khandi nikuba nemirwe chine. Mana nikuhebwa obunyali.

⁷“Neshili mumalooro ako, khandi okusolo kundi okwakhane nikulolekha, nakwo kubeele okwokhuhuchisia, okwamarisia khandi okwamaani amanji muno. Kubeele nameeno amakhongo khandi akeshibia, nikulia, nikutubula nende okhusenachila ebisikale nebilenje biakwo. Nakwo kubele nikwahukhanekhwo nende emisolo chindi echikuranjilile, kubeele netsinzika ekhumi.

⁸Olwa erangalile khutsinzika etsio enduutsi olwika lundi olutiti nilurombokha mutsinzika tsindi etsio. Khulwa okhuhana obwiyangu khulwa olwika luno, tsinzika tsitaru etsibeele imbeli walwo tsikhulilwe halala nemisi chiatsio. Olwika luno lubeele netsimoni shinga tsiomundu, nende omunwa okuboolile amakhuwa kokhwichinjimisia.

⁹“Olwa embeele neshihenganga, ebifumbi bioburuchi birenjekhwe yaho, ne omukofu owakhale owalinjiho okhurula khumusule niyetsa niyekhalaho. Abeele nafwalile ebifwalo ebilafu shinga itsaluchi, liswilie nalio nilifwana shinga obwoya bwamakondi obulafu tswe. Eshifumbishie shioburuchi shibeele netsinzese tsiomulilo, nachio emikurutumu chiashio chibeele nomulilo okwakhanga.

¹⁰Okhurula khushifumbishie eshio, akhachela khomulilo kharulilemwo nikhakholomokha. Abandu eshikhumila shieshikhumila (1,000,000) bamukhalabanila, nabo abandu ebikhumila eshikhumi eshieshikhumila eshikhumi (100,000,000) basinjila imbeliwe. Mana eshiina nishichaaka okhuyalwa, nabio ebitabu nibibambulwa.

¹¹“Olwa embeele nishihenga embuliile olwika olutuutu nilwiyitsialanga nende okhwichinjimisia. Ne nishihenganga endio okusolo kwakhane okwo kwirirwe, ne omubili kwakwo nikusukunwa mumulilo nikusasibwa.

¹²Emisolo chindi echio chinulilwe obunyali bwachio, nebutswa nichifuchililwa okhutsiilila okhumenya khulwa oluhoono lutiti.

¹³“Mumalolelo keshilo ako, enduutsi eshifwanile shinga omwana womundu niyetsa mumaleesi kelikulu. Mana niyetsa khumukofu wakhale, owalinjiho okhurula khumusule, nibamureera imbeliwe.

¹⁴Mana omukofu wakhale owalinjiho okhurula khumusule oyo, namuhelesia obunyali, oluyali nende oburuchi, kho mbu abandu boosi, namahanga koosi, nende tsinimi tsiosi bamukhalabanile. Obunyalibwe nobweinziayo, ne shibulahwaho ta; nabwo oburuchibwe shibulisasibwakhwo ta.

¹⁵“Nasi, isie Danieli, omwoyo kwanje kubeyabeyile mwisie, ne amalolelo ako nikarisia.

¹⁶Ne nenzia khumulala khu ababeele nibasinjiileho, nimureeba mbu yanzinoosie eshisina shiamalolelo ako.

¹⁷Mana niyamboolela ari, ‘Emisolo emikhongo chine echio, nabaruchi bane, abalibukha khushialo.

¹⁸Nebutswa abatakatifu ba Nyasaye Omukhongo Muno, bakhahebwe oburuchi obwo, nabwo bwakhabe obwabwe inziayo.’

¹⁹“Mana ninzenya okhumanyilisia obwatoto khukusolo kwakhane, okubeele nikwahukhane khumisolo chindi chiosi, okubele okwamarisia muno, nameeno keshibia nende amatere komukasa, okulile, nikutubula khandi nikusenachila hasi ebisikale nebilenje biakwo.

²⁰Ninzenya khandi okhumanyilisia khuketsinzika tsiakwo ekhumi etsibeele khumurwe khwakwo, nende khu akolwika olutiti, olufwindile, ne khulwa okhuhaana obwiyangu khulwo, tsinzika tsitaru tsikhuulilwe. Olwika olwo lubeele netsimoni nende omunwa okuboolile amakhuwa kokhwichinjimisia. Olwika tsana luloleeshe okhuba olwa amarisia okhushila etsindi tsiosi.

²¹“Ne olwa embeele neshihenganga, olwika olwo luseerire abatakatifu ba Nyasaye, ne nilubahula.

²²Mana omukofu wa khale, khandi owalinjiho okhurula khumusule niyetsa, ne nakhalaka eshiina, ne eshiina eshio nishifwila olwika olwo, nabo abatakatifu ba Nyasaye nibahula. Ne nilwo olwa induukho yoola khulwa abatakatifu abo okhubukula oburuchi.

²³“Mana omukofu oyo niyanzinoosia naboola ari, okusolo kwakhane okwo nibwo oburuchi bundi bwa khane obulitsaho, oburuchi obwo bwakhahukhane nende oburuchi bundi bwosi, nabwo bulisishia oburuchi bundi bwosi khu eshialo, nibusenachila hasi oburuchi bundi obwo bwosi nende okhubufunaka.

²⁴Ne tsinzika ekhumi etsio, nabaruchi ekhumi abaliruka lihanga elo. Ne omuruchi undi alibukha munyuma mwabwe. Naye aliahukhanakhwo nabandi abambeli abo, alihula abaruchi bataru.

²⁵Yakhaboole amakhuwa kokhunyeka Nyasaye ouli Omukhongo Muno, khandi alisandia abatakatifu ba Nyasaye. Aliteema okhukalukhasia tsinduukho tsiamasabo kabwe nende amalako kabwe. Abatakatifu ba Nyasaye baliba hasi woburuchibwe khulwemiyika chitaru nende inusu.

²⁶Nebutswa eshiina shilikhala, ne nishichaaka okhuyaala; mana balimulula oburuchibwe ne nibamusasilia elala.

²⁷Oburuchi nende obwami, nende obukhongo bwoburuchi bwosi obuli hasi welikulu bulihelesibwa abatakatifu ba Nyasaye ouli Omukhongo Muno. Oburuchi bwabwe bwakhabe obweinziayo, khandi amahanga koosi kakhabakhalabanile nende okhubahelesia oluyali.

²⁸“Amakhuwa ako kakamila yaho. Nasi Danieli, ndahenda muno, mumoni mwanje nimukalukhana, nebutswa ndabiikha amakhuwa ako mumwoyo kwanje.”