Read wanga DANIELI 8 Bible Online

DANIELI 8 - wanga bible

DANIELI 8

¹Mumuyika kwa khataru kwomuburuchi bwa Beleshasa, isie Danieli ndalola lilolelo lindi, okhumeeta khu lia ndali neranjiliile okhulola.

²Mwilolelo elo, ndenyoola nendi mwitookho likhongo lia Susa, eliomulukongo lwa Elamu. Ndali nesinjiile ahambi khumwalo kwa Ulayi.

³Olwa ndachinguula tsimoni tsianje okhuhenga ikulu, ndalola limiiku nilisinjiile khuluchinga lwomwalo okwo. Limiiku elo liali netsinzika tsibili tsirambi, nebutswa olwika lulala lwali olurambi okhushila olundi, ne olurambi olwo lwarombookha olunyuma lwolundi olwo.

⁴Ndalola limiiku elo niliseera buli shindu eshiali elubeka lwomumbo, olwemasaba nende olwemulambo. Yibulaho isolo yosi eyateema okhusinjila imbeli walio, noho okhwihonokokha okhurula khubunyali bwalio. Liakhola buli shindu eshia lienya okhukhola, mana niliba eliamaani muno.

⁵Olwa ndali neshiyililisinjia khu ako, ndalola imbusi ikhole niyitsa tsimbilo okhurulila elubeka lwomumbo, mbu kata shiyasena hasi tawe. Ikhole eyo yali nolwika lulala olukhongo hakari wetsimoni tsiayo.

⁶Ne niyitsia ewa limiiku lia ndali nenduutsi ahambi khumwalo nilili netsinzika tsibili. Ne niyiliseera namaani kayo koosi.

⁷Ikhole eyo yaseera limiiku elo muno mana niyifunaka tsinzika tsialio etsio. Limiiku elo shiliali namaani kokhulwana nende ikhole eyo tawe. Ikhole eyo yakhupa limiiku elo hasi, mana niyilisenachilaho. Omundu yesi shiyaliho owakhahoniye limiiku elo tawe.

⁸Mana ikhole eyo niyiba eyamaani khandi niyiikhulumamia muno. Nebutswa olwa yali niyili namaani muno, olwika lwayo olukhongo nilufinikha ne mubukono bwalwo tsinzika tsindi tsine tsiarombokhamwo mana nitsilolekha obulayi. Tsiali nitsihenjile mutsimbeka tsine tsiokhushialo.

⁹Ne okhurula mululala khutsio, olwika olutiti lwarombookha, ne niluba namaani muno, obunyali bwalwo nibukhongoya nibuhenjile elubeka lwa Emulambo, olwa Ebukwe nende olweshialo eshilayi.

¹⁰Olwika olwo nilukhula niluba namaani amanji okhuula khubilonje biomwikulu. Nilukwisia bilala khubilonje tsana ebio nende tsing'ining'ini hasi khushialo nilubisenachilakhwo.

¹¹Olwika olwo nilwikhulumamia kata okhuula khumukhongo wamahe komwikulu. Nilumurusiakhwo omusangokwe omusambe kwa buli nyanga, khandi nilulikulula habunduwe hatakatifu.

¹²Mana abandu nibakhola obwonooni habundu yaho mushilenje shiokhukhola omusango okukhoyeele kwa buli nyanga, mana obwatoto nibusukunwa hasi khwiloba. Olwika olwo lwanyalilwa mubuli eshindu shia lwakhola.

¹³Mana nembulila omumalaika mulala nareeba oundi ari, “Amakhuwa ka khulutsi mwilolelo kano, kalatsiililila okhuula liina? Noluhono shiina lwobwonooni bulatsiililila okhukholwa mushilenje shiokhukhola omusango kwa buli nyanga. Amahe akomwikulu nende habundu hatakatifu bilatsiililila okhusenachilwa hasi okhuula liina?”

¹⁴Mana omumalaika undi oyo namukalusia ari, “kano kalatsiililila okhwikholekha khulwa tsinyanga eshikhumi shilala, neshikhumi shilala namakhumi karano (1,150), ne kalatsiilila kario khu buli ingolobe nende mukamba olwa emisango chia buli nyanga nachibule okhuhaanwa. Mana habundu hatakatifu yaho nahakalusibwe habundu waho ahakhoyeele.”

¹⁵Olwa isie Danieli ndali nenduutsi lilolelo elo, ndenya okhumanya eshisina shialio. Mana nendola oundi owafwana shinga omundu nasinjiile imbeli wanje.

¹⁶Ne nembulila omwoyo kwomundu nikulanjilisinjia ahambi nomwalo kwa Ulayi nikuboola kuri, “Gaburieli, mwinoosie eshisina shialilolelo lialuutsi.”

¹⁷Mana omumalaika Gaburieli niyetsa ahambi aha ndali nesinjiile. Nasi oburi nibundila nengwa hasi mafumama. Nebutswa yamboolela ari, “Omwana womundu, omanyilisie eshisina mbu lilolelo elo, liboolanga khukeshihesi shiobumalilishi.”

¹⁸Olwa yali nashiboolanga ninasi ario, isie ndayilwa netsindoolo tsisiro, nengonile hasi mafumama. Nebutswa yandilakhwo, ne niyasinjisia.

¹⁹Mana niyamboolela ari, “Rechelesia, enzia okhukhuboolela akalekholekha mutsinyanga tsieliruma lia Nyasaye, okhuba lilolelo elo nelieshihesi shieshialo.”

²⁰Limiiku lioluutsi, nilili netsinzika tsibili elo, nibo abaruchi babili ba Media nende Perisia.

²¹Nayo ikhole eyo niyo omuruchi wa Ebugiriki. Olwika olukhongo olubeele hakari mumoni mwayo, niye omuruchi wambeli.

²²Ne olwika olufinishe mana mubukono bwalwo, tsinzika tsindi tsine nitsirombokhamwo, eshisina shili mbu, lihanga elala elo lilikabukhanamwo, mana nilirulamwo amahanga kandi kane, nebutswa amahanga ako shikaliba namaani shinga lihanga liambeli elo tawe.

²³Mutsinyanga tsiobumalilishi tsioburuchi bwa amahanga ako, lwobumayanu bwako buliba nibwimeeteshe muno, omuruchi undi alibuukha oweitswoni khandi owobusitsa.

²⁴Aliba nobunyali obukhongo, alimulula eshialo muno, khandi alinyalilwa mubuli eliakhola. Alimulula abamaani, nende abandu ba Nyasaye.

²⁵Khulwa obuchesibwe, alanyalilwa mumakhuwake akobukaati. Alechinjimisia omwene. Alimulula abandu abanji metsukhana. Aliyinga kata omukhongo wabaruchi boosi. Nebutswa alimululwa harali obunyali bwomundu tawe.

²⁶Nalio lilolelo eliemisango chiobwile nende echiomumabwibwi, elia oluutsi neliahabwene. Nebutswa olibiishe obutinyu mumasilisi. Okhuba tsilahwa tsinyanga tsinyinji nilishili okhuusibwa.

²⁷Mana isie Danieli, nekhaywa, ne nemba omulwale khulwa tsinyangakhwo. Ne olwa ndahona ndabuukha ne nenzililila nemilimo chiomuruchi. Nebutswa lilolelo elo lianjenyia, ne shindamanyilisia eshisina shialio tawe.