Read wanga DANIELI 9 Bible Online

DANIELI 9 - wanga bible

DANIELI 9

¹Mumuyika kwambeli kwa Dario omusiani wa Ahasuwero owomulwibulo lwa Abamedi, yeemekhwa okhuba omuruchi owelihanga lia Babuloni,

²isie Danieli ndali nesoomanga mumahandiko amatakatifu, ne nemanyilisia eshisina shialikhuwa lia OMWAMI Nyasaye yaboolela omulakusi Yeremia okhulondana nemiyika echio amakhumi musafu, echia Yerusalemu liliba mubusasishi.

³Mana nesaya khu OMWAMI Nyasaye nomwoyo kwosi, nemulilila, nehonga inzala, nindifwala tsingubo tsiamagunia khandi nindikhala mwikoshe.

⁴Ndasaya khu OMWAMI, Nyasaye wanje, nindiyama obwonooni bwabandu banje, nemboola mbu, “Iwe OMWAMI, niwe omukhongo khandi oukhoyile okhuribwa. Olindanga indakanoyo khandi ololesisinjia obuheelibwo oburalilu khu abo abakhuheelanga nende okhuhulila amalako koko.

⁵“Ifwe khwakholile obwonooni khandi nikhukhola amabi, khwakholile obumayanu khandi nikhuloba okhuba abahulili, khwashiukhaane nikhurula khu amalako ko nende amalachilisioko.

⁶Shikhwahulila amakhuwa kabakhalabanibo abalakusi, ababoola muliiralio khu abaruchi befwe, abemilisi befwe, nende khu abakuuka befwe nende khu abandu boosi tawe.

⁷Iwe OMWAMI buli lwosi obetsanga omulunjishi, nebutswa ifwe buli lwosi khubetsanga neshifimbwa murwe. Kano nakatoto khwifwe fwesi abamenya mu Yuda, abamenya mu Yerusalemu, nende khu Abaisiraeli boosi abawasalasia nibatsia okhumenya mumahanga kali hambi nende akali ehale khulwa okhubela shibali abesiikwa khwiwe tawe.

⁸Eshifimbwa murwe shili khwifwe, iwe OMWAMI, nende khubaruchi befwe, abemilisi befwe, nende khu abakuuka befwe shichila khwakhola obwonooni khwiwe.

⁹Iwe, OMWAMI Nyasaye wefwe, oli nomwoyo kwetsimbabasi khandi okwokhubeela obwonooni kata olwa khuba nikhukholile obwonooni khwiwe.

¹⁰Ifwe khwaloba okhukhuhulila iwe OMWAMI Nyasaye wefwe; shikhwalonda amalako ko, aka wakhuhelesia okhubirira mubakhalabanibo abalakusi tawe.

¹¹Abaisiraeli boosi bafunaka amalako koko, bashiukhana nibakhulekha, nibaloba okhukhuhulila. Khulwa okhubela khwakhola obwonooni khwiwe, khwanyoola ebilaamo biobubi nende ebitsubo ebiahandikwa mushitabu shiamalako ka Musa omukhalabaniwo.

¹²Wakholile aka walaka mbu wakhakhukholele ifwe halala nende abemilisi befwe khulwa okhuhaana eshinyasio eshikhongo khwitookho lia Yerusalemu okhushilakhwo eshia amatookho kandi koosi khushialo.

¹³Wakhuhelesiye eshinyasio shinga olwa kahandikwa mushitabu eshia amalako ka Musa. Ne kata kario, okhuula olwa leelo luno, OMWAMI Nyasaye wefwe, ifwe khushili okhukhusabakhwo obulesheli khulwa okhulekha obwonooni bwefwe noho okhuyililisiakhwo khubwisikwabwo tawe.

¹⁴Khulweshio iwe OMWAMI Nyasaye wefwe werechekha okhukhuhelesia eshinyasio, ne nokhola orio, shichila buli lwosi iwe okholanga aka habwene, nefu shikhwakhuhulila tawe.

¹⁵“Ne bulano, OMWAMI Nyasaye wefwe, owarusia abandubo okhurula mushialo eshia Misiri khulwa obunyalibwo obukhongo mana nokhola eliiralio okhuhebwa oluyali muno okhuula khunyanga yolwa leelo, khuboola mbu khwonoonile khandi khukholile obumayanu.

¹⁶Iwe OMWAMI, khulwa ebikholebio biobulunjishi khukhusaya mbu olasinyikha noho okhutilwa noburuma khulwa litookho lia Yerusalemu, eshikulushio eshitakatifu tawe. Abamenyani befwe boosi bachayanga litookho lia Yerusalemu nende abandubo, khulwa okhubela obwonooni bwefwe nende obumayanu bwabakuuka befwe bakhola.

¹⁷Khulweshio Nyasaye wefwe, ohulile amasaayo kanje nende amalilo kanje isie omukhalabaniwo. Khululwo omwene, olinde obulayi Ihekaluyo eyili butswa likuunda.

¹⁸Reka eshirwishio mana okhurecheresie. Lolakhwo obutinyu bwa khuli ninabwo, nende obutinyu bwalitookho elilangungwa eliiralio. Shikhureera amasaayo kefwe imbeliwo khulwa okhubela mbu khuli abalunjishi ta, habula khulwa okhubela tsimbabasitsio tsinyinji.

¹⁹Iwe OMWAMI Nyasaye, okhuhulile mana okhubele tsimbabasi, okhurecheresie mana okhukhonye; khululwo omwene, OMWAMI Nyasaye wefwe, nende khulwa litookholio nende abandu abalangungwa eliiralio olashinda ta.

²⁰“Olwa ndali nishisayanga endio, nindiyamanga obwonooni bwanje nende bwabandu ba Isiraeli, khandi nisayanga khulwa eshikulu eshitakatifu shia Nyasaye wanje.

²¹Neshisaayanga endio, omumalaika Gaburieli owa ndali ninduutsi mwilolelo liambeli, yeekha bwangu niyetsa wa ndali, biali ebise ebiokhuhana omusango kwokhungolobe.”

²²Yetsa mana niyamboolela ari, “Danieli, ndakhetsa bulano okhukhuhelesia obuchesi nende obumanyilisi.

²³Olwa ochachile okhusayakhwo, Nyasaye ahulile amaliloko mana nakhukalusia likalusio. Kho enzitsile okhukhwinoosia likalusio elo, khulwa okhuba Nyasaye wakhuheela muno. Khulweshio reka eshirwi omanyilisie eshisina shialilolelo elo.

²⁴“Emiyika musafu akhandi amakhumi musafu chialakwa khulwa abandubo nende litookholio litakatifu okhumalilisia obukhayi, nende okhulekha okhukhola obwonooni nende obumayanu, okhureera obulunjishi obulahwaho ta, kho mbu amalolelo nende obulakusi buusibwe; mana khandi Ihekalu indakatifu yibakhwe amafura obuyiakha.

²⁵Kho omanye khandi omanyilisie lino mbu, okhurula khunyanga ya lilako eliokhumbakha Yerusalemu obuyia lilihanwa okhurula khu khwitsa khwa oyo omukhulundu owatsushililwakhwo amafura, chilahwa emiyika musafu okhuula akhandi musafu. Mana Yerusalemu lilombakhwa obuyia nende emihanda nende tsingoba tsiamaani. Mana lilaralila khulwemiyika musafu okhuula akhandi amakhumi kasasaba nachibili, nebutswa echio chilaba emiyika echia amatinyu amanji.

²⁶Mana olunyuma lwokhuhwa khwemiyika echio, omuruchi waahulwa nende Nyasaye yakherwe nalalikhwo neshikha shiosi ta. Litookho nende Ihekalu biakhamululwe nende abelihe liomuruchi wamaani. Mana eshihesi shiakhetse shinga omukhula kwifula nikureera lihe nende obusasishi bwa Nyasaye yarechekha.

²⁷Omuruchi oyo alikhola indakano yiralilu nende abandu abanji khulwemiyika musafu, ne olunyuma lwokhuhwa khwa inusu yemiyika echio, aliakamia emisango nende ebihaanwa. Khubutenje bweihekalu shilisinjisibwaho eshifwanani shieshisinyo, mana shilitong'aho okhuula lwoyo owashiraho yakhole khushihesi shia Nyasaye yamurecheshela.”