Read wanga HOSEA 1 Bible Online

HOSEA 1 - wanga bible

HOSEA 1

¹Buno nibwo oburume bwa OMWAMI Nyasaye yaboolela Hosea omusiani wa Beeri munyanga tsia Uzia, Yotsamu, Ahazi nende Hezekia bali nibali abaruchi ba Yuda, naye Yeroboamu omusiani wa Yehoashi nali omuruchi wa Isiraeli.

²Olwa OMWAMI Nyasaye yachaaka okhuboola nende Abaisiraeli okhubirira mu Hosea, yaboolela Hosea ari, “Tsia oteeshie omukhasi omuheyi, wibule ninaye abaana bobuheyi, okhuba abandu belihanga lino baheyanga muno khulwa okhundekha isie OMWAMI Nyasaye.”

³Kho Hosea natsia nateeshia Gomeri omukhaana wa Dibulaimu. Gomeri nahela inda, mana niyebula omwana omusiani.

⁴OMWAMI Nyasaye naboolela Hosea ari, “Kulikha omwana oyo eliira mbu, ‘Yezirili’[1] okhuba endi ahambi okhuhelesia omuruchi wa Isiraeli eshinyasio khulwa eshitsayi shia Yehu kuukanyene, yaraatsia olwa yeera omuruchi mwibanda lia Yezirili. Khandi ndilirusiaho oburuchi bwelihanga lia Isiraeli.

⁵Khandi khunyanga tsana eyo, mwibanda lia Yezirili ndilisasia obunyali bwabelihe ba Isiraeli.”

⁶Gomeri nahela inda khandi, mana niyebula omwana omukhaana. Mana OMWAMI Nyasaye naboolela Hosea ari, “Omukulishe eliira mbu, Lo-ruhama, eshisina mbu, ‘Oulabeelelelwa ta,’ okhuba shindilibeelelelakhwo aboluyia lwa Isiraeli, kata okhubaleshela obwonooni bwabwe khandi tawe.

⁷Nebutswa ndilibeelelela aboluyia lwa Yuda, khandi ndilibahonokosia. Isie OMWAMI Nyasaye, Nyasaye wabwe, ndilibahonokosia, nebutswa shindilikhoonyela obuyingo, noho olukanga, noho obulwani noho tsifarasi, kata abakhupanilanga khutsio tawe.”

⁸Olwa Gomeri yalekha okhununia Lo-ruhama, yahela inda khandi, ne niyebula omwana undi omusiani.

⁹OMWAMI Nyasaye naboolela Hosea ari, “Kulikha omwana oyo eliira mbu, ‘Lo-ammi,’ eshisina mbu, ‘Shimuli abanje khandi ta,’ okhuba inywe shimulikhwo abandu banje, kata isie shiendikhwo Nyasaye wenywe tawe.”

¹⁰Abaisiraeli baliba abanji shinga omuyeshe kwokhunyanza, okulanyala okhuchelwa noho okhubalwa tawe. Ne aha Nyasaye yali niyababoolela ari, “Shimuli abandu banje ta,” bulano alibaboolela ari, “Muli abaana ba Nyasaye ouliho mwoyo.”

¹¹Aboluyia lwa Yuda nende aboluyia lwa Isiraeli balihambasibwa halala khandi. Boosi baliiyahulila abeene omuruchi mulala, ne khandi baliyindihala mushialo shiabwe. Inyanga eyo yiliba ikhongo muno mu Yezirili.