Read wanga HOSEA 10 Bible Online

HOSEA 10 - wanga bible

HOSEA 10

¹Abaisiraeli balinji shinga omutsabibu okwanera, okwamanga tsinzabibu tsindayi, shinga olwa ebiamo biakwo biemeeta, nolwa khandi boosi bameeta bario okhumbakha ebimalilo biemisango. Shinga olwa eshialo shiabwe shiatsiililila okhuyindihala, nolwa khandi boosi bameeta okhung'ona tsisiilo tsiabwe.

²Emioyo chiabwe chietsulamwo obubeeyi, bulano okhuula abeene betuushe obwonooni bwabwe. OMWAMI Nyasaye alafunaka ebimalilo biemisango biabwe, khandi alasasia tsisiilo tsiabwe.

³Nolwa baliboola bari, “Shikhuli nomuruchi ta, shichila shikhuritsanga OMWAMI Nyasaye ta, ne kata kario omuruchi tsana nakhukholele shi.”

⁴Aka baboolanga namakhaya butswa, betsubanga nibasuubisia akobubeeyi butswa, khulweshio obukhalachi bumelanga shinga ebiraache biobufila, ebisebukha mumukunda kulimilwe.

⁵Abandu bamenya mwitookho lia Samaria batechela, khulwa okhurusibwaho khweshifwanani shieshimoosi eshili Betseli. Abandu abo balekhuula khulwa eshifwanani eshio, kata abesaaliisi abashikhalabanilanga balakhupa tsimbungu. Balekhuula shichila oluyali lweshifwanani eshio lulaba nilurusiibweho.

⁶Eshifwanani eshio shilachingwa nishiyilwa Ashuru, shilayilwayo nishirungwa shinga obushuru khumuruchi omukhongo. Abandu ba Efuraimu balafwimbibwa omurwe, nabo aba Isiraeli balatiilwa tsisoni khulwa eshifwanani eshio.

⁷Omuruchi wa Samaria alasikha, shinga eshitonye shiomusaala eshiyilwa namaatsi.

⁸Habundu hachinguukhu hokhwinamila abanyasaye ha Aweni, aha Abaisiraeli benamilanga abanyasaye babwe halasasibwa. Ebisisia nende amarakalu bilamela khubimalilo biemisango biabwe. Mana balaboolela tsingulu bari, “Khufuunishe,” nende ebikulu bari, “Mukhukwekhwo!”

⁹Inywe Abaisiraeli, mwachaaka okhukhola obwonooni okhurula munyanga tsia mwali Gibea, ne mutsiililanga okhuula bulano. Toto mwene lihe lilamumulula Gibea eyo.

¹⁰Ndaleetsela abandu abakhayi bano okhubahelesia eshinyasio, abandu bamahanga kandi balakhung'ana okhubaseera, ne balahebwa eshinyasio khulwa obwonooni bwabwe obunji.

¹¹Abandu ba Efuraimu bali shinga ing'ombe eyali niyechesibwa obulayi, khandi eyali niyachama muno okhuhuula imele. Nebutswa bulano ndalaboha likokolo khwikosi liayo elianera, Abandu ba Yuda balalima neimbako, nabo abandu ba Isiraeli balakhwesa imbako yokhulima netsing'ombe.

¹²Mwiraachile abeene obulunjishi, ne mulachesa obuheeli oburalilu. Lime emikunda chienywe echiali nichiakonela, okhuba eshise shiokhuukhaaba isie OMWAMI Nyasaye shiulile, nasi ndalamutsushilila tsikhabi shinga ifula.

¹³Nebutswa inywe mwaraaka obumayanu, ne muchesile amasila, mwaliile ebiamo ebiobubatsa bwenywe. Inywe Abaisiraeli mwesika amaani kenywe abeene, nende obunji bwabelihe benywe.

¹⁴Khulweshio indiri yelihe yilabuukha mubandu benywe, tsingoba tsienywe tsiosi tsilakwisibwa hasi, shinga olwa omuruchi Shalimani yasasia litookho lia Betsi-arabeli mwihe, olwa abanyina nabaana babwe banyalulwa.

¹⁵Nolwa kalekholekha kario khwinywe abandu ba Betseli, khulwa obumayanu bwenywe obukhongo. Eshialo nibutsia okhushia, omuruchi wa Isiraeli aleerwa.