Read wanga HOSEA 11 Bible Online

HOSEA 11 - wanga bible

HOSEA 11

¹OMWAMI Nyasaye aboola ari, Isiraeli nashili omwana, ndamuheela, okhurula mushialo shia Misiri, ndamulanga mbu, omwana wanje.

²Nebutswa olwa ndameeta okhubalanga, nabo nolwa bameeta okhusita ehale okhurula khwisie. Batsiililila okhukhola emisango khulwa omunyasaye Baali, nende okhusamba obubaane khubifwanani ebibaatse.

³Ne nisie owechesia Efuraimu okhuchenda! Nisie omwene owabalela namakhono kanje, nebutswa shibamanyilisinjia mbu, nisie owabakhusia tawe.

⁴Ndabemilila nomwoyo kwetsimbabasi, khandi ndabemilila nomwoyo kwobuheeli. Ndachinga nerusiaho likokolo eliali khwikosi liabwe.[3] Omwene ndeenama hasi nebaliisia ebiokhulia.

⁵Okhuula balakalukha mushialo shia Misiri, khandi omuruchi wa Ashuru alaba omuruchi wabwe, shichila balobile okhungalushila.

⁶Olukanga lulabura mumatookho kabwe, lulamulula abesaaliisi babwe bobubeeyi, lulabamulula khulwa obumayanu bwa bakholanga.

⁷Abandu banje bareerekhwo omwoyo okhuurulakhwo. Balaahabila khulwelikokolo lili khubo, nebutswa shindalabahabinakhwo kata nahatuutu ta.[4]

⁸Iwe Efuraimu, ndakhakhulekha endie? Iwe Isiraeli ndakhakhwibala endie? Ndakhakhusasia endie shinga olwa ndasasia litookho lia Adama? Ndakhakhukholela endie amabi shinga aka ndakholela litookho lia Zeboimu? Omwoyo kwanje kunzikalilanga, eshisa shianje khwiwe neshinji muno.

⁹Ndalekalila liruma lianje, shindalasasiakhwo Efuraimu khandi ta, okhuba isie endi Nyasaye, ne shiendi omundu namundu tawe. Isie ouli Omutakatifu endi ninenywe, ne shindaleetsa okhumusasia inywe tawe.

¹⁰“Balanondakhwo isie OMWAMI Nyasaye, isie ouhoolanga shinga italanyi. Olwa ehoola abandu banje balachelela, balachelela okhurula mumbo nibatechela.

¹¹Balachelela okhurula Misiri, nibatechelanga shinga amanyonyi, balachelela okhurula Ashuru, nibapulukha shinga amahusi, nasi ndalabakalusia mumataala kabwe, nolwa isie OMWAMI Nyasaye emboola.”

¹²OMWAMI Nyasaye aboola ari, “Abandu ba Efuraimu bambotokhaane nobubatsa, nabo aba Isiraeli bambotokhaane nobubeeyi, Nebutswa aba Yuda batsiililila okhuba abesiikwa,[5] khwisie Nyasaye Omutakatifu.”