Read wanga HOSEA 12 Bible Online

HOSEA 12 - wanga bible

HOSEA 12

¹Abandu ba Efuraimu baayanga omuyeka, balondachililanga omuyeka kwebukwe eshiteere tulu, khandi benjiyinjia obubeeyi nende induli, bakaasinjia indakano nende abandu ba Ashuru, khandi bachiinganga amafura nibayila Misiri.

²OMWAMI Nyasaye ali neshikha khubandu ba Yuda, alahelesia Abaisiraeli eshinyasio okhulondana nende tsinjila tsiabwe, khandi alabarunga amabi okhulondana nende ebikhole biabwe.

³ Yakobo nashili munda mwa nyinamwana, yatiila eshisisilo shia Esau omusiani wabwe, ne nali omukofu, yalwana nende Nyasaye.

⁴Yalwana nende omumalaika, ne namuhula, yalila amasika, ne nasaba mbu abeelwe tsimbabasi. Yaakaana nende Nyasaye Betseli, mana ebweneyo Nyasaye naboola ninaye.

⁵Oyo yali OMWAMI Nyasaye, Nyasaye Mwene Mahe, ne OMWAMI Nyasaye nilio eliiralie.

⁶Khulweshio inywe, okhuula mumukalushile Nyasaye wenywe, musimbiile khubuheeli oburalilu nende obukhalachi bwa habwene, mana mutsiililile okhumuliindilila Nyasaye wenywe.

⁷Efuraimu nomukholi weinganga owikhoonyelanga iratili yobukaati, owachama okhusandia abandu.

⁸Efuraimu yeyitsiala naboola ari, “Endi omuyinda muno, ndayekhung'asiliye obuyinda obunji, mubuyinda bwanje buno bwosi, obumayanu shibulimwo ta, khandi shindayonoonakhwo tawe.”

⁹Nisie OMWAMI Nyasaye wenywe owamurusia mushialo shia Misiri, ndalakhukhola okhumenya mumaheema khandi, shinga olwa mwamenyanga mutsinyanga tsiamasabo amaahule.

¹⁰Ndaboola nabalakusi, ninzinjiyia amalolelo kabwe, khandi okhubirila mubo, ndarumbula tsinjelo.

¹¹Ne kata kario ebifwanani biabanyasaye bishiinamilungwa mu Giliadi, nebutswa ababiinamilanga balafwa. Bashikholanga emisango chietsisurusi Giligali, nebutswa ebimalilo biemisango ebiliyo bilakwa ebituuli biamachina mumukunda okulimilwe.

¹²Yakobo yelushila mushialo shia Aramu, ne nali ebweneyo yakhalabana emilimo khulwa okhunyoola omukhasi, yaaya amakondi khulwa okhuteeshia omukhasi.

¹³OMWAMI Nyasaye yekhoonyela omulakusi okhurusia Abaisiraeli mushialo shia Misiri, khandi yekhoonyela omulakusi okhubaliinda.

¹⁴Abandu ba Efuraimu basinyisiiye muno OMWAMI Nyasaye. Nebutswa OMWAMI Nyasaye alabarunga khulwa obwonooni bwabwe, khandi alabahelesia eshinyasio khulwa obumayanu bwa bakhola.