Read wanga HOSEA 2 Bible Online

HOSEA 2 - wanga bible

HOSEA 2

¹Bulano kulishe abasiani benywe mbu, “Abandu banje,” nabo abakhaana benywe mbu, “Ababeelwa tsimbabasi.”

²Halabile nyinenywe, mumuhalabile, okhuba bulano ye shiashili omukhasi wanje ta, nasi shieshili omusaatsawe tawe. Mumuhalabile aleshe obuheyibwe, khandi yehanye okhurula khubutambabwe.

³Naba nalalekha ta, ndalamufwalula tsingubotsie atoonye eshiechenye, ndalamukhola atoonye shichula shinga inyanga ya yebulilwakhwo. Ndalamukhola abe shinga eshitsiimi, ndalamukalukhasia yoome shinga eshialo eshihangalafu, mana emwiire nobuloho.

⁴Ne shindalabeelelelakhwo abaanabe ta, okhuba nabaana abebulwa mubuheyi.

⁵Nyinabwe yaheya, ye owababelekha yakholile akeshifwimbwa murwe. Okhuba yaboolile ari, “Ndalatsia khubatia banje, abambelesinjia ebiokhulia nende amaatsi, bambelesinjia ebifwalo ebilayi ebiobukusi, ebieikitani, amafura nende idivai.”

⁶Khulweshio ndalasira injilaye nolukaka lwa amahwa, khandi ndalombakha lisisi okhumubotokhana kho mbu, akhaywe okhurula elwanyi.

⁷Alaloondachila abatiabe, nebutswa shialaboolakhwo ta, alabakhaaba, nebutswa shialabanyoola tawe. Mana alaboola ari, “Ndalakalukha khumusaatsa wanje wambeli, okhuba obulamu bwanje bwalinji obulayi olwenolwo okhushila bulano.”

⁸Shiyamanyanga mbu, nisie owamuhelesinjia imele, idivai nende amafura ta, khandi shiyamanyanga mbu nisie owenjiyinjia ifetsaye nende itsahabuye ebia yekhoonyelanga okhwinamila omunyasaye Baali tawe.

⁹“Khulweshio, ndalamuyiniakhwo imele yanje khushise shielichesa, khandi ndalamuyiniakhwo idivai yanje khushise shiayo. Ndalamuyiniakhwo ebifwalo bianje ebilayi biobukusi, nende ebieikitani, ebiali biokhufuunikha eshiechenyeshie.

¹⁰Bulano ndalamufwimbula eshiechenyeshie imbeli wabatiabe, ne abulaho oulamuhonokosia okhurula mumukhono kwanje tawe.

¹¹Ndalaakamia okhwitsatsahasiakhwe khwosi, ndalaakamia amasaboke, akomwesi omutoro, akeisabato, nende amasaboke koosi amakhulundu.

¹²Ndalasasia emitsabibuchie nende emikhuyuchie chiaboolanga mbu, ‘Chino nichio omurungo kwanje kwabatia banje bambelesiye.’ Ndalachikwisia omutsuru, natsio tsisolo nabulimo tsilachimulula.

¹³Ndalamuhelesia eshinyasio khulwa tsinyanga tsia yakholela omunyasaye Baali amasabo, olwa yamusambilanga obubane, niyesiaha netsingakatsie nende ebimilibie, nalonda khubatiabe, ne niyanzibilila isie,” nolwa isie OMWAMI Nyasaye emboola.

¹⁴Khulweshio, ndalamuhombelesia, nemuyila mushitsiimi, nemboola ninaye, nemulemia omwoyo.

¹⁵Ebweneyo, ndalamukalusilia emikundachie chiemitsabibu, ne ndalakhola libanda liamatinyu lia Akori okhuba obwinjililo bwobunaayi. Ebweneyo alambulila shinga olwa yambulilanga mutsinyanga tsioluraakalwe, olwa yarula mushialo shia Misiri.

¹⁶OMWAMI Nyasaye aboola ari, “Khunyanga eyo, iwe wakhaananje mbu, ‘Omusaatsa wanje,’ shiolinangakhwo mbu, ‘Baali wanje,’ tawe.

¹⁷Okhuba ndakharusie eliira liomunyasaye Baali mumunwakwo, kata eliira elo shiliakharumbulwekhwo mumunwakwo tawe.

¹⁸Khunyanga eyo ndakhakaasie indakano netsisolo nabulimo, amanyonyi halala nende ebilonje biosi ebimoolanga khushialo mbu, bileshe okhukhusaalisia. Ndakhafunache obuyingo nolukanga, nerusiaho amahe mushialo kho mbu, omenye nomulembe.

¹⁹Ndakhakhuteeshie obe omukhasi wanje inziayo, wakhabe omukhasi wanje mubulunjishi nende mubwatoto, mubuheeli oburalilu nende mutsimbabasi.

²⁰Mana ndakhakhuteeshie nobwisiikwa nawe wakhamanye mbu, nisie OMWAMI Nyasaye.”

²¹OMWAMI Nyasaye aboola ari, “Khunyanga eyo, ndakhalachilisie likulu nalio liakhakwisie ifula khushialo.

²²Nashio eshialo shiakhetsulemwo imele, idivai nende amafura; nabio ebindu bino biliusia obwenyi bwa Yezerili.

²³Ndakharalisie abandu banje mushialo, nebakhola okhuyindihala, ndakhabeelelele owa ndali nindakulikha mbu, Lo-ruhama ‘Oulabeelelelwa ta,’ ne aba ndali nindakulikha mbu, Lo-ammi ‘Shimuli abandu banje ta,’ ndakhabalanje mbu, Ammi, ‘Abandu banje,’ nabo bakhaboole mbu, ‘Oli Nyasaye wefwe.’ ”