Read wanga HOSEA 4 Bible Online

HOSEA 4 - wanga bible

HOSEA 4

¹Inywe abandu ba Isiraeli, hulile, okhuba OMWAMI Nyasaye atulanga abandu boosi abamenyanga mushialo shino naboola ari, “Obwisiikwa kata obuheeli shibuliho mushialo khandi ta, kata abandu shibamanyilekhwo mbu nisie Nyasaye tawe.

²Abandu betsubanga ebiitsubo, nibaboola akobubeeyi, beeranga abandu, beebanga ebindu nende okhukhola akobuheyi. Baraatsinjia eshitsayi nibarondakhasia.

³Khulweshio eshialo shiosi shilooma, nabo abamenyangamwo boosi balasikha, kata tsisolo, amanyonyi nende tsinyeni biosi bilamululwa.”

⁴OMWAMI Nyasaye aboola ari, “Omundu yesi yesi shialatulakhwo abandu, kata okhubakondeshela ta, okhuba okhukondekha khwanje khuli khubesaaliisi.

⁵Mulesichirala eshiteere, nabo abalakusi boosi khandi balesichirala halala ninenywe eshilo.

⁶Abandu banje basikhanga khulwa okhubula okhuumanya isie, okhuba inywe abesaaliisi mwaloba okhuumanya isie nimuloba ameechesio kanje, kho siesi khandi emulobile inywe, ne shindalafuchilila abaana benywe okhuba abesaaliisi banje tawe.

⁷Shinga olwa inywe abesaaliisi mumeetekha, nolwa mumeeta okhunzonoonela khandi. Kho ndalakalukhasia oluyali lwenywe okhuba eshifwimbwa murwe.

⁸Muyindihalanga okhurula khubindu biobwonooni bwabandu banje, khulweshio mwikombanga mbu batsiililile okhwonoona.

⁹Kho mwesi khandi mulanyoola eshinyasio shinga eshia ndahelesia abandu abo. Ndalamuhelesia inywe eshinyasio, khandi ndalamurunga okhulondokhana nende ebikhole bienywe biobumayanu.

¹⁰Mulalia, nebutswa shimulekura ta, Mulakhola obutamba, nebutswa shimulebulana tawe. Okhuba mwandekha isie OMWAMI Nyasaye, ne nimwinamila abanyasaye bandi.”

¹¹OMWAMI Nyasaye aboola ari, “Idivai nende idivai indoro, binuulanga abandu banje obumanyilisi!

¹²Abandu banje bareebanga obuchetsiyi okhurula khushindu shiabaatswa okhurula khumusaala! Eshindu eshibaatse shiabwe eshio nishio eshibaboolelanga akabakhola. Obwikombi bwokhukhola obuheyi bwabakosia, bandekha isie OMWAMI Nyasaye wabwe nibakhola obuheyi khulwa okwinamila abanyasaye bandi.

¹³Bakholelanga emisango khubimalilo biemisango bili khubutenje bwetsingulu, khandi bahaananga ebihaanwa khubikulu, nende mushiinikha shiemisaala emirambi khandi emirabaafu, okhuba eshiinikha shiachio neshilayi muno. Okhurulana nende ako, abaana benywe abakhaana bakholanga obutamba, nabo abeha babasiani benywe bakholanga obuheyi.

¹⁴Nebutswa shindalahelesia abaana benywe abakhaana eshinyasio olwa bakhola obutamba, kata abakhasi babasiani benywe olwa bakhola obuheyi tawe. Okhuba inywe abasaatsa beene ninywe abayilananga nabatamba, nimukhola halala ninabo emisango chiobuheyi muhekalu. Khulweshio inywe abandu ababulamwo obumanyilisii mulasikha!

¹⁵Ne kata inywe Abaisiraeli nimuli abatamba, shimulakhole abandu beshialo shia Yuda okhuba neshikha ta! Shimulatsiekhwo habundu hatakatifu Egiligali ta, kata shimulatsiekhwo Betsi-Aweni[2] tawe. Khandi shimuletsubakhwo nimuboola muri, ‘Shinga olwa OMWAMI Nyasaye aliho mwoyo,’ tawe.”

¹⁶Abaisiraeli nabandu abamakosi amoomu, kho mbushiina isie OMWAMI Nyasaye embaliisie shinga ouliisia ebimeeme biamakondi mubwayilo?

¹⁷Abandu ba Efuraimu beyinjisiye khukebifwanani, leshe babe bario!

¹⁸Nomukanda kwabameesi okwiyinjisinjia mubutamba, Baheela akeshifwimbwa murwe okhushila akoluyali lwabwe.

¹⁹Omuyeka kweshimbalakusi kubatuumuulile, ne balafwimbwa omurwe khulwemisango chiabwe khubanyasaye bobubeeyi.