Read wanga HOSEA 5 Bible Online

HOSEA 5 - wanga bible

HOSEA 5

¹Hulile kano, inywe abesaaliisi! Recheresie, inywe Abaisiraeli Reche amarwi, inywe abeinzu ya oburuchi! Okhuba eshiina shili khwinywe! Inywe mwali nimukhoyile okhukhola aka habwene, nebutswa mwekhola omubero nimuli Mizipa, khandi mwekhola olukhanda lwabambulwa khushikulu shia Tabori,

²mwayaba obuko oburambi Shitimu, nebutswa isie ndalabahelesia eshinyasio inywe mwesi.

³Okhuba isie emanyile abandu ba Efuraimu, khandi Abaisiraeli shibayebisa okhurula khwise tawe. Inywe abandu ba Efuraimu mwakhola obutamba, khandi abandu ba Isiraeli boosi bekholile abomusilo.

⁴“Ebikhole biabwe ebimayanu shibibafuchilila okhukalukha khu Nyasaye wabwe ta. Okhuba roho wobutamba ali mubo, kata shibaamanyilekhwo isie OMWAMI Nyasaye tawe.

⁵Obwichinjimisi bwa Abaisiraeli, bwilolesinjia khubo habulafu. Abandu ba Efuraimu balesichirala khushikha shiabwe, nabo abandu ba Yuda balesichirala halala ninabo mubwonooni bwabwe.

⁶Balatsia nebiayo biabwe nende emiruko chiabwe, okhuukhaaba isie OMWAMI Nyasaye, nebutswa shibalaanyoola ta, okhuba isie OMWAMI Nyasaye ebaleshile.

⁷Balekha okhuba abesiikwa khwise OMWAMI Nyasaye, Bebula abaana abalali abanje tawe. Bulano amasabo kabwe komwesi omutoro, kalabasasia halala nemikunda chiabwe.

⁸Inywe abandu ba Benjamini, khupe olwika lwelihe mu Gibea, khupe itarumbeta mu Rama! Khupe oluhungu lwelihe mu Betsi-Aweni.

⁹Efuraimu yilakwa likunda, khunyanga yeshinyasio. Erumbula akeetsa tooto okhwikholekha mutsimbia tsia Abaisiraeli.

¹⁰Abemilisi ba Yuda bali shinga abandu abasiulanga efikhoni fiokhumanyisia olwakho. Ndalabasundulila liruma lianje, shinga omuyembo kwamaatsi.

¹¹Abandu ba Efuraimu basandibwa muno, bakosiye akobulaame bwa bahebwa, shichila behaana okhukhaaba amakhuwa ka butswa.

¹²Ndalareera obusasishi khubandu ba Efuraimu, khandi ndalamulula abandu ba Yuda.

¹³Olwa abandu ba Efuraimu balalola obulwale bwabwe shinga olwa bwali, nabo ba Yuda nibalola amafumire kabwe, habwenaho Abaifuraimu balatsia khu Abashuru, okhusaba obuhabini okhurula khumuruchi omukhongo, nebutswa shialanyala okhubahonia tawe.

¹⁴Okhuba ndalaseera abandu ba Efuraimu shinga italanyi, nabo abandu ba Yuda ndalabaseera shinga italanyi imbuukha. Isie omwene ndalabarandula nende okhutsia butsia ndalababukula, ne abulaho oulabahonokosia tawe.

¹⁵Ndalakalukha khandi habundu wanje, okhuula olwa baleyama obwonooni bwabwe nibangalushila, mana mukhunyakhana khwabwe balaakhaaba.”