Read wanga HOSEA 6 Bible Online

HOSEA 6 - wanga bible

HOSEA 6

¹Balaboola bari; “Chende khukalushe khu OMWAMI Nyasaye, okhuba niye owakhusaalisiye, nebutswa alakhusilikha, niye owakhufumiire, nebutswa alakhuboha amakonzo.

²Olunyuma lwa tsinyanga tsibili alakhusakulusia, ne khunyanga ya khataru alakhulamusia, kho mbu, khubeho mwoyo imbeliwe.

³Chende khumumanye OMWAMI Nyasaye, chende khuteeme muno okhumumanyilisia. Tooto mwene alakhuloleshela shinga eliuba olwa lifwindanga mumabwibwi, OMWAMI alakhwitsila ifwe shinga ifula, alakhwitsila shinga ifula yeirotso olwa yitosinjia eshialo.”

⁴Nebutswa OMWAMI Nyasaye aboola ari, “Nekhukhole endie iwe Isiraeli? Nekhukhole endie iwe Yuda? Obuheeli bwenywe buli butswa shinga ling'ong'ong'we liomumabwibwi, khandi shinga liime elikhamulukhanga bwangu.

⁵Khulweshio ndabarumiile abalakusi banje okhubasiomela, ndabasasiye namakhuwa komunwa kwanje, khandi obukhalachi bwanje bwitsa shinga eliuba liomumabwibwi.

⁶Okhuba eshienzenyanga nobuheeli oburalilu, emisango ta, enzenya mbu mumanye Nyasaye, tawe okhuhana emisango emisambe.

⁷Nebutswa bafunaka indakano yanje shinga olwa Adamu yafunaka, baloba okhuba abesiikwa khwisie.

⁸Giliadi ni litookho liabandu abamayanu, lietsulamwo eshitsayi.

⁹Shinga olwa abanuuli bakoneshelanga omundu khunjila, nolwa abesaaliisi boosi bakoneshelanga abandu bario. Beeranga abandu khumuhanda okutsia Shekemu, bakholanga obumayanu obubi muno.

¹⁰Ndaluutsi likhuwa lieshisinyo muno mu Abaisiraeli mbu, Abandu ba Efuraimu belushilanga abanyasaye bandi, nabo Abaisiraeli bakholile eshifwabi.

¹¹Nenyu abandu ba Yuda, emalile okhurechekha eshise shiokhumuhelesia eshinyasio, olwa ndilikalusilia abandu banje tsikhabi.”