Read wanga HOSEA 7 Bible Online

HOSEA 7 - wanga bible

HOSEA 7

¹Buli olwa enzenya okhuhonia abandu banje ba Isiraeli, obumayanu bwabandu ba Efuraimu, nende obwonooni bwabandu ba Samaria bwibisulanga habulafu, okhuba bemililungwa nobubeeyi, abefi bafunaka nibenjila mutsinzu, nabo abanuuli banuulanga abandu khutsinjila.

²Nebutswa shibetsulilangakhwo mbu, isie nditsulilanga obumayanu bwabwe bwosi tawe. Bulano obumayanu bwabwe bubafumbeleele koosi aka bakhola kali imbeli wanje.

³Basaangaasinjia omuruchi nobumayanu bwabwe, khandi basangasinjia abemilisi nebikhole biabwe biobubatsa.

⁴Boosi nabaheyi, bali butswa shinga obunoro bwomulilo kwomuteeshi wemikaate alasunda ta, okhurula khushise shianyooba obusie okhuula olwa bufiimba.

⁵Khunyanga yelisabo liomuruchi, banywesia abakhulundube idivai nibameela, naye omuruchi asanjilananga nabakokonyi.

⁶Emioyo chiabwe chisambanga neliruma shinga omulilo kwobunoro bwomulilo. Eshilo shiosi liruma liabwe lituumanga shinga omwosi, ne mumabwibwi lirulikha shinga tsimbenu tsiomulilo.

⁷Boosi basambanga neliruma shinga obunoro bwomulilo, basishinjia abakhongo babwe. Abaruchi babwe boosi bafwa, ne abulaho owilushilanga khwisie khulwa obuhabinwi.

⁸OMWAMI Nyasaye aboola ari, “Abandu ba Efuraimu betsochile nabandu bamahanga kandi. Abandu ba Efuraimu bali shinga omukaate okufubile okhuyia.

⁹Abandu bamahanga kandi bamala butswa amaani kabwe, nebutswa Abaefuraimu beene shibamanyile tawe. Tsimbutsi tsitsuule khumirwe chiabwe, nebutswa shibamanyile tawe.

¹⁰Okhwichinjimisia khwa Abaisiraeli khwilolesia habulafu, ne kata kario shibangalushilanga isie OMWAMI Nyasaye wabwe, kata okhukhaaba tawe.

¹¹Abandu ba Efuraimu bali shinga lihusi elibulamwo amachesi, Belushila khu Abamisiri, khandi belushila khu Abashuru.

¹²Olwa barula nibatsia ndalabambula olurimba lwanje okhubatiila, ndalabeeshia hasi shinga owishia amanyonyi akapulukha ikulu, ndalabahelesia eshinyasio okhulondana nende obumayanu bwabwe bwa bakhola.

¹³Bali mushilaamo shiobubi shichila bashiukhaane nibaarulakhwo. Bali mushilaamo shiobubi shichila bakhayile okhumbulila. Ndakhabahabiine, nebutswa baboolanga akobubeeyi khwisie.

¹⁴Baahabilanga, nebutswa shibaahabilanga nomwoyo kwa tooto ta, bakhupanga butswa tsimbungu nibeyalisiye khubitali biabwe. Besalaka abeene olwa baasaba imele nende idivai, nebutswa nabakhayi khwisie.

¹⁵Nisie owabaralisia, nebutswa berechekhanga okhuukholela obumayanu.

¹⁶Belushilanga abanyasaye bobubeeyi, bali butswa shinga obuyingo obwafinikha. Abemilisi babwe baleerwa nolukanga, khulwa amakhuwa kabwe akobukhayi. Ne khulweshio, balatseshelelwa mushialo shia Misiri.”