Read wanga HOSEA 8 Bible Online

HOSEA 8 - wanga bible

HOSEA 8

¹OMWAMI Nyasaye aboola ari, “Khupe olwika! Omusuku yetsanga bwangu shinga indutsu okhuseera abandu ba OMWAMI Nyasaye, okhuba bafunaache indakano yanje, khandi balobile okhulonda amalako kanje.

²Abandu ba Isiraeli baahaabilanga nibaboola bari, ‘Nyasaye wefwe, ifwe Abaisiraeli khukhumanyile iwe’

³Nebutswa Abaisiraeli baloba amakhuwa amalayi, khulweshio abasuku balabataafia.

⁴Beyahulila abeene abaruchi ba ndalayaahulakhwo ta, beyemeshela abeene abemilisi ba ndalarakhwo omukhono tawe. Bekaasilia abeene abanyasaye okhurula khufeetsa nende itsahabu, khulwa okhwisasia abeene.

⁵Inywe Abasamaria, eshifwanani shienywe shieshimoosi eshilobile. Liruma lianje libabuushiilekhwo. Balatsiililila okhukhola obumayanu okhuula liina?

⁶Okhuba Eshimoosi shia mwinamilanga eshio, shiakaasibwa nomubaatsi okhurula mu Isiraeli, ne shishili Nyasaye kata nahatuutu ta! Khulweshio eshifwanani shia Samaria eshio shilatubulwa.

⁷Baraaka omuyeka, nebutswa balafuna eshimbalakusi! Ebiraache biabwe bieimele ebili mumikunda, shibilaamakhwo imele tawe. Ne kata nibiba nibiama, ebiamo biabio bilaliibwa nabandu bebialo bindi.

⁸Abaisiraeli bamalile okhumilwa, bulano bali hakari mumahanga, shinga eshindu butswa eshibula inganga.

⁹Okhuba Abaisiraeli batsiile okhukhaaba obuhabinwi okhurula khu Abashuru, bali butswa shinga isishili eyichendachendanga yonyene, Abaefuraimu bakula abatamba.

¹⁰Ne kata nibakula abatamba okhurula mumahanga kandi, isie ndalabakhung'asia halala. Mana balasandibwa muno, hasi wabaruchi nende abakhongo.

¹¹Abandu ba Efuraimu beyumbashiile ebimalilo biemisango ebinji, mana ebimalilo biemisango ebio binjiyiiyie obumayanu bwabwe.

¹²Kata olwa ndabahelesia amalako kanje akhandi akhanji, bakaloba nibakalola shinga amalako kabandu bandi butswa.

¹³Bachama okhumala emisango, nende okhulia inyama yachio, nebutswa isie OMWAMI Nyasaye shiefuchililanga emisango echio tawe. Isie nditsulilanga obumayanu bwabwe, ndalabahelesia eshinyasio khulwobumayanu bwabwe, ndalabakalusia mubuhambe Misiri.

¹⁴Abaisiraeli bebiliile omulonji wabwe, beyumbashiile abeene tsinzu tsikhongo. Nabo abandu ba Yuda benjiyiyie amatookho ketsingoba, nebutswa ndalaruma omulilo okhusamba amatookho kabwe ako, khandi kulamulula tsingoba tsiabwe etsio.”