Read wanga HOSEA 9 Bible Online

HOSEA 9 - wanga bible

HOSEA 9

¹Inywe Abaisiraeli, shimulekhoya ta! Shimulakholekhwo amasabo shinga amahanga kandi kakholanga ta, shichila mwakholile obuheeyi khulwa okhulekha okhuba abesiikwa khu Nyasaye wenywe. Musangalilanga omurungo kwobutamba khubuli olwanyi lwokhuhuulilakhwo imele.

²Imele nende idivai shibilahela okhubaliisia ta, kata idivai indoro shibalaba ninayo tawe.

³Abaisiraeli shibalamenya mushialo shia OMWAMI Nyasaye ta, Abaefuraimu balakalukha mubuhambe mushialo shia Misiri, khandi balalia ebiokhulia biomusilo mushialo shia Ashuru.

⁴Shibalahaanila OMWAMI Nyasaye emisango chieidivai ta, kata shibalamusaangaasia nemisango chiabwe echio tawe. Ebiokhulia biemisango chiabwe bilaba shinga ebiokhulia biamasika, boosi abalabiliakhwo balaba abomusilo. Ebiokhulia bino bilaba ebiabwe abeene, ne shibilareerwakhwo muhekalu ya OMWAMI Nyasaye tawe.

⁵Ne namukhole shiina khunyanga yelisabo eliahule, inyanga yelisabo lia OMWAMI Nyasaye?

⁶Kata nimuba nimwihonokokha okhusasibwa, Abamisiri balamubunjelesia, ne mulayabilwa Memufisi. Liswa lilayumba mumabikho kenywe keifeetsa, khandi amahwa kalamela mumaheema kenywe.

⁷Tsinyanga tsieshinyasio tsimalile okhuula, tsinyanga tsiokhumala eshikwoli tsiulile, Abaisiraeli okhuula bashimanyilisie! Inywe muboolanga muri, “Omulakusi nomuyingwa, omundu owimililungwa nende roho wa Nyasaye, nomulalu.” Muboolanga murio khulwa obumayanu bwenywe obukhongo, khandi khulwa okhuba muli neisila ikhongo khuye.

⁸Omulakusi niye omuliindi wa Abaisiraeli mushilenje shia Nyasaye, nebutswa buli habundu aha atsia, arekungwa neshireko shinga linyonyi. Bamutililanga isila kata nali munzu ya Nyasaye.

⁹Bahweela mukhukhola obwonooni, shinga butswa olwa bali Gibea. Nyasaye aletsulila obumayanu bwabwe, khandi alabahelesia eshinyasio khulwa obwonooni bwabwe.

¹⁰OMWAMI Nyasaye aboola ari, “Ndanyoola Abaisiraeli, nibali shinga tsinzabibu mushitsiimi. Ndanyoola abakuuka babwe, nibali shinga eshiamo shiambeli shiomukhuyu. Nebutswa olwa boola khushikulu shia Peori, beyahula abeene nibachaaka okhwinamila omunyasaye weshisinyo Baali, mana boosi nibekhola abeshisinyo shinga butswa omunyasaye tsana wa baheela oyo.

¹¹Oluyali lwa Efuraimu lulapulukha nilutsia shinga linyonyi, abakhasi babwe shibalebulakhwo abaana, kata okhuhela tsinda, noho okhubelekha tawe.

¹²Kata nibaba nibakhusia abaana, ndalabeera boosi pe. Tooto mwene balaba mushilaamo shiobubi olwa ndalabarulakhwo.”

¹³Shinga butswa olwa ndarumbula, olwambeli Abaefuraimu bali shinga omusaala kwelishindu, okushisebukha mwibanda linulu, nebutswa bulaano okhuula bahaane abaana babwe okhwiirwa.

¹⁴Iwe OMWAMI Nyasaye, obahelesie eshinyasio, okhole abakhasi babwe okhuba abakumba, khandi bakhaywe okhuba namabeele akokhunuunia abaana babwe.

¹⁵OMWAMI Nyasaye aboola ari, “Obumayanu bwabwe bwosi bwachaachila Giligali, habwene yaho, niho aha ndachaachila okhubasinyishila, khulwa obumayanu bwebikhole biabwe, ndalabalonda okhurula mushialo shianje. Shindalabaheelakhwo khandi ta, khandi abemilisi babwe boosi nabakhayi.

¹⁶Abandu ba Efuraimu bakhupilwe, bali shinga omusaala okwemisi chiakwo chiumile, khandi okulanyala okhwama ebiamo biosi tawe. Kata nibaba nibebula abaana, ndaleera abaana babwe ababaheela muno.”

¹⁷Nyasaye wanje alabaloba, Shichila shibaamuhulila ta, khandi balakwa abokhuchendachenda mumahanga kandi.